罷朗地柯

由今年開始，「歐洲足球先生」將會成為歷史名詞。

由歐洲最權威足球雜誌《法國足球》（France Football）主辦嘅金球獎（Ballon D'or）始於1956年，係足球界公認為至高無上嘅個人榮譽。

由於早年只限歐洲各國球員參選，故又稱「歐洲足球先生」（European footballer of the year）。金球獎獨領風騷五十年，一直令舉世球星魂牽夢縈。

與1991年由國際足協創辦，以各國足協教練團互選嘅世界足球先生（Fifa world player of the year）相比，金球獎以體育傳媒投票為主，使選舉結果更公平更具說服力。

例如2000年金球獎得主費高（Luis Figo）當年嘅表現，就明顯比世界足球先生施丹（Zinedine Zidane）更出色。一年後國際足協先至識選狀態已大幅下滑嘅費高補飛，證明國際足協嘅選舉制度太重球員名氣，實在搞笑！

但係，金球獎都有本難諗的經。由於早年足球資訊唔流通，冇衛星直播時更唔好講互聯網，所以選才範圍局限要係歐洲國民，結果做成與球王比利等南美球星緣慳一面。更離譜嘅係1986年，球王馬勒當拿以無敵強勢征服世界盃，但金球獎竟然落入名不經傳嘅貝倫諾夫（Igor Belanov）手上，令人啼笑皆非。

結果《法國足球》從善如流，自1995年容許響歐洲搵食嘅非歐盟外援球員參選，造就左前無古人嘅三料足球先生，來自利比利亞嘅佐治韋亞（George Weah）。此後巴西3R（Ronaldo、Rivaldo、Ronaldino）分別成為左四屆得主，令金球獎更有認受性。

隨著資訊發達，加上全球化趨勢，要睇到南美自由盃或日本J-league都已經唔係天荒夜談，精采賽事亦唔係歐洲聯賽嘅專利。例如上賽季被維拉利爾放逐到阿根庭小保加嘅列基美（Juan Román Riquelme）就差不多以個人之力奪得自由盃，如果因為唔係響歐洲落班而缺席候選名單，就實在係太大粒遺珠喇。

所以，《法國足球》決定再擴闊候選名單至全世界所有地區嘅球員，連投票資格都唔再局限響歐洲，只要有參加過世界盃決賽週嘅國家都有投票權（冇錯！中國都有份！）。

今後，奪得金球獎嘅球員，就係貨真價實嘅「世上最強的人」！

（但係，唔知中國代表會唔會投票畀華藉第一中鋒歐偉倫呢？）

同城死敵

熱刺 1 vs 3 阿仙奴

講開阿仙奴，就不得不提熱刺（Tottenham Hotspur）。

有別於其他打比戰，熱刺同阿仙奴絕對係歡喜冤家。不但因為佢地同係倫敦最有實力嘅傳統勁旅，而且兩隊更可以話係身負血海深仇。

首先，早在1913年阿仙奴遷址至北倫敦，好揀唔揀，揀著鄰近熱刺主場白鹿徑（WHite Hart Lane）嘅高貝利球場（Highbury）。呢下擺明踩場，已令兩會關係緊張。

估唔到幾年之後，英甲賽會改制，由18隊增至20隊，原本排包尾18名嘅熱刺有望留級，點知畀乙組排第五嘅阿仙奴，洗橫手搶走最後一個英甲位置。英國人最重視公義，熱刺黯然降班之餘，對阿仙奴嘅仇恨已到左不死不休嘅地步。

自此之後，每次兩軍交鋒都踢到飛沙劈石，以性命相搏。但自從二次大戰前阿仙奴傳奇領隊卓文（Herbert Chapman）出現並橫掃英倫之後，熱刺一直都活在兵工廠嘅陰影之下。

至今，阿仙奴已共奪得十三次頂級聯賽冠軍，熱刺則只有可憐嘅兩次。近年車路士獲得油王入股實力大增之下，更連贏兩冠超越左原本嘅「二哥」熱刺，更令其球迷恨得牙癢癢。

好喇！講返場波！熱刺賽前五戰三負一和，領隊祖爾已聞到魷魚香。今場仲係主場對死敵，更要加多兩錢肉緊。

15分鐘就由光芒四射嘅比爾憑死球打開紀錄，實在係不能再好嘅開局。但兵工廠「後勁王」美譽並非白叫嘅，下半場憑艾迪巴約及法比加斯連入三球反勝，熱刺應該敗得心服口服。

熱刺其實踢得唔曳，全場轉捩點係下半場1:1時，見碧托夫勁射被基列治護空門，轉頭就畀法比仔射球世界波反超前。加上見碧托夫及戴倫賓特兩次單刀失機，整定熱刺跌入水深火熱嘅命運。

反觀阿仙奴，上屆此時此地，同樣係早段失波而反勝兩球，最終響補時被熱刺中場贊拿斯勁射扳平，和局終場。今年面對同樣情況，一眾小兵不急不燥，逐點收復失地，踢起來信心十足。

五戰四勝一和高據榜首，又要再一次向溫格領隊至敬！

一語成箴

職業足球圈係名利場，好多人一朝得志都會語無論次。

車仔領隊摩連奴（José Mourinho）以吋出名，佢嘅名句包括：

"We have top players and, sorry if I'm arrogant, we have a top manager."（原諒我果人係咁直，我隊波唔止有最頂級球員，仲有最頂級領隊 - 即係我！）

"Please don't call me arrogant, but I'm European champion and I think I'm a special one."（唔好話我吋，作為歐洲冠軍，我諗我都算係好特別嘅領隊！）

自此之外，英國傳媒都諷刺地稱佢為「the special one」（跟Harry Potter世界嘅人叫Voldemot做"You-know-who"一樣，互相輝映！）。

另外，利物浦名宿阿倫漢辛（Alan Hansen 圖）響1995批評曼聯，話費蛇打算以碧咸、史高斯等小將為主力係失策之極，因為："You'll never win anything with kids."（靠果班仔，蛇都死啦！）

結果條費蛇當然冇死，班仔連三冠王都贏埋，可憐阿倫伯就畀人講到今日，成為英超史上最大笑柄。

但最估唔到，連生性謹小慎微嘅溫格（Arsène Wenger）領隊都領過嘢。

2002年阿仙奴全季只失三場捧盃，而且整季作客不敗。

溫格「博士」豪言要以全季不敗捧盃："It's not impossible. I know it will be difficult for us to go through the season unbeaten. But if we keep the right attitude it's possible we can do it."

點知話口未完，就響作客愛華頓一場被16歲嘅神童朗尼（Wayne Rooney）一腳射死。更慘嘅係，不敗身被破之後，兵工廠連輸五場，最後將幾已到手嘅冠軍讓畀曼聯。

費蛇當然唔放過機會，狠狠地嘲笑老對手嘅失言。但一年之後，費蛇就笑唔出喇。因為，2003/04英超球季，阿仙奴果然以不敗之身奪標，更創下49場不敗紀錄。

呢隊冠軍隊，史稱「無敵雄師」（The Invincibles）。

所謂遲到好過冇到，溫格領隊同費sir都畀人笑足一年，但時間最終會證明誰對誰錯。

巨星偶像

超級球星都係萬人偶像，但佢地自己o既偶像卻好多時會令人意外。

比較正常o既有前阿仙奴球星亨利，佢堅持要著14號球衣以表示對偶像告魯夫（Johan Cruyff）o既敬仰，今季佢轉投巴塞，穿上荷蘭球王留下o既14號球衣，可說心願得償。

亨利o既新拍檔細哨原名朗拿度，為左避佢偶像大哨朗拿度（Ronaldo)之諱，改稱「小朗拿度」（Ronaldino）。還好朗拿甸奴踏著偶像的足印，不但平左大哨三奪世界足球先生紀錄，更青出於藍，成為新一代巴西球王。

細哨少年時正值朗拿度如日方中，封佢做偶像一o的都唔奇。但當世第一球星o既偶像就十分之騎呢，AC米蘭巨星卡卡（Kaka）個偶像就係巴西傳奇球星蘇古迪斯..............個細佬萊爾（Rai）！萊爾曾經同卡卡一樣係巴西國家隊十號球衣o既主人，但佢響1990年世界盃o既表現就被廣泛評為「有史以來最弱的巴西十號」，十分丟架。

但更令人尷尬o既選擇係來自阿根庭首席球星美斯（Lionel Messi），雖然被公認為球王馬勒當拿o既最佳接班人，但佢o既偶像唔係老馬，竟然係薩拉哥薩中場艾瑪（Pablo Aimar）！美斯每次講起第一次取得艾瑪親筆簽名時，都會興奮得手舞足蹈，可憐艾瑪響阿根庭國家隊只係大後備，有得落場都只係能夠做美斯o既替補。美斯冇機會同偶像同場獻技，都只能夠怪自己太過好波，攪到佢偶像都冇得踢。

不過，最離譜o既應該係法國球王施丹（Zinedine Zidane），佢偶像當然唔係柏天尼，但都冇理由會係法蘭斯哥利（Enzo Francescoli）卦？法蘭斯哥利（見圖）係八十年代o既烏拉圭國腳，響歐洲球壇成就乏善足陳，但由於施丹係死忠馬賽隊（Olympique Marseille）擁躉，當年踢馬賽o既「王子」法蘭斯哥利o既球技令施丹著迷。廣為世人傳頌o既「施丹轉身」其實係模倣「王子」o既絕招「馬賽迴旋」（The Marseille Turn），施丹首次在法甲對陣馬賽時，仲追住偶像唔放要求交換球衣。後來，施丹仲將長子取名Enzo Zidane（個衰仔仲幾鬼好波，請看下面條link），估唔到施丹外表冷傲，原來竟然係一個瘋狂Fans！

每次接受訪問時，對於有一個比自己好波十倍兼出名一百倍o既「粉絲」，法蘭斯哥利都顯得十分尷尬兼冇癮。有時，受人愛戴都唔一係定係好事......

《Enzo Zidane's Video》

科技白痴

富咸臨完場前攻入追成二比二平手的一球，點知兵荒馬亂之際，米堡門將把已完全越過白界o既足球撥返出去，旁證竟然判入球無效，富咸因而全失三分。

富咸職球員當然唔服氣，但更經典o既例子，應該係兩季前熱刺作客曼聯，完場前文迪斯遠射中楣反射入白界超過一米，竟然都被判唔入！如果球證旁證唔係齊齊發雞盲，就一定係傳說中o既「曼聯法則」** 在作怪。

人地美式足球N年前就開始用即場視頻重播，幫助球證判定具爭議性判決，國際足協以「重播視頻會影響球賽流暢度」而否決。前幾年又有一間德國公司發明左一套判定越位球系統，又被否決。舊年Adidas提議用「晶片足球」幫助判定足球入白界問題，同樣被國際足協否決。

先別說NFL、NBA等不斷隨住科技進步而改進o既聯賽，就算保守到極o既英國溫布頓網球賽，今年都引入左鷹眼系統，減少司線爭拗。究竟國際足協班老鬼有高科技恐懼症丫？定係要留返o的「人為」o既元素畀球證去自己「演譯」﹙造波）呢？

** 笑話一則：盛傳英超球證在奧脫褔只能作出對曼聯有利的判決，原因為何就無從稽考。

虎父犬子

講起曼城，初初望見佢個龍個名，嚇左一跳，叫「舒米高」（Kasper Schmeichel），乜咁大整蠱？聽旁述講先知，原來真係丹麥傳奇鋼門舒米高個仔，唔怪得個樣咁鬼死似...小舒米高成就如何，有待觀察，但係球壇上名將第二代下場都唔多好，希望佢好自為之。

一心繼承父業o既有尤迪.告魯夫（Yordi Cruyff)，平心而論佢都算係技術出眾o既天才球員，踢過巴塞羅拿、曼聯、艾拉維斯等勁旅，以一般人來講，有佢咁o既成就都應該十分滿意。奈何佢老豆約翰（Johan Cruyff)名氣太大，相比起堂堂三屆「歐洲足球先生」、「二十世界歐洲最偉大球員」、「荷蘭球王」，小告魯夫o既表現實在上唔到台盤。

不過，另一個球王之後際遇更加不堪。號稱「球王中o既球王」比利（Pele）個仔艾甸奴（Edinho）曾經係山度士門將，職業生涯一事無成，咁都算喇。退役後佢仲衰謀殺、販毒，多次被判入獄，最近先出冊，唔知幾時又會發作。比利貴為巴西體育部長，真係乜面都畀佢丟晒。

含住銀匙出世，起步時固然快人一步，但係如果自己冇真材實料，父母o既顯赫反而害左佢。每次睇見李氏兄弟，都會諗起果句「養不教，父之過」，首富又如何......