信念之戰

阿仙奴2 vs 1 曼聯

由於兵工廠天殘地缺，賽前一面倒睇好曼聯，連C.朗都話阿仙奴此時不破，更待何時？

費蛇可能都有一般嘅心思，週中歐聯刻意留力，收起朗尼、貝碧準備一舉擒敵。

攤出來個陣容就已經嚇得死人，前線C.朗、貝碧、朗尼金鑽三叉擊，中場安達臣、朴智星、卡域克活力十足，後防好難得加利仔、維迪、李奧、艾華、雲達沙「夫添」上陣！

後備席仲坐擁泰維斯、夏格、奧沙、科士打、布朗、伊雲斯、拿尼、傑斯、史高斯......真係B隊都夠贏英超。

相比起阿仙奴連老弱婦孺（施維斯達、丹尼臣等）、受傷未癒（禾確特、沙拿）都悉數正選，前線打賓特拿一件廢柴，可以話係地庄應戰，無論點都睇唔到曼聯輸波嘅理由。

愚以為紅魔之敗，敗在費格遜！

上週，阿仙奴作客史篤城，踢到成篤屎咁樣，仲畀對手笑佢地冇「吉士」，係冇勇氣嘅懦夫。

溫格領隊反駁：我覺得夠膽正面挑戰敵人先係勇敢，響人背後施暗算嘅先係懦夫（是役兩小兵被對手從後攔截傷出）！

話係講得冇錯，但今時今日咁功利嘅氣候之下，仲邊有人陪你堂堂正正公平決戰丫............除左費爵爺。

如果話溫格係天真嘅攻勢足球完美主義者，咁費格遜可以話比溫格起步再早左十年。23年來，經歷左幾個朝代，曼聯響費格遜嘅領導之下，只有一個信念 — 全力進攻！

響阿聯酋球場，佢選擇左光明磊落地對攻，對阿仙奴而言，簡直係求之不得。結果曼聯三叉擊集體失準之下，被阿仙奴成功反底。

費蛇心知肚明，其實曼聯最應該亦有本錢踢穩守突擊，既可磨蝕對手小兵嘅銳氣，又可立於不敗之地。

但佢仍然一意孤行，因為，佢要對自己嘅信念負責！正如溫格，寧願付出戰敗嘅代價，都堅持踢漂亮足球，無怨無悔。

為左一個信念，今屆英超桂冠以至歐聯錦標，都可能會與呢兩位天真嘅主帥無緣。但係，為左眼前嘅三分，輸左做人嘅原則，雖勝猶敗！

現代社會，實在有太多講一套做一套嘅人，為左個人利益，可以放棄任何原則。

正因代價如此沉重，更覺兩位老教練貫徹始終，身體力行，實在可敬可佩！

水深火熱

史篤城 2 vs 1 熱刺，三談熱刺鬧劇及賓特利。

在英國北部Yorkshire地區嘅候城（Hull City）主場，1比0挫敗韋斯咸，候城實現三連勝，穩坐聯賽榜三甲。隊中後衛安迪多遜（Andy Dawson）一直響低組別球會打滾，今次終於吐氣揚眉。

同一時間，安迪果個名氣大得多嘅細佬米高（Michael Dawson），正在離候城百里之外嘅史篤城陷入苦戰。

熱刺在客場先有比爾響禁區犯天條，食左紅牌兼輸球12碼，到下半場米高多遜入替時，球隊已落後1:2。多遜貴為英格蘭國腳中堅，領隊拉莫斯竟然以右閘哥路卡客串，都唔願意用佢。沉唔住氣嘅多遜以一記愚蠢嘅飛剷換來一張紅牌加三場停賽，可算係對主教練最狠毒嘅報復。

但多遜嘅爆發只係冰山一角，球隊組合嚴重失衡、過多新加盟球員、戰術過份單一化... 都使熱刺輸得一榻糊塗。更致命嘅係，隊中雖然粒粒皆星，但眾星表現都大走樣，表表者當數大衛賓特利（David Bentley圖）。

24歲嘅賓特利出生於倫敦，自細響阿仙奴青訓系統中，表現算得上光芒四射。但佢生不逢時，碰正溫格教授任內最強嘅「無敵軍團」（The Invincibles），無法打入一隊，轉而外借諾域治、布歷般等二、三線球隊，終於響布歷般鬧修成正果，榮升英格蘭大國腳。

雖然賓特利嘅偶像係柏金，但礙於身形單薄，無法應付正前鋒面對嘅衝擊，佢逐步走上另一英超傳奇嘅道路 — 大衛碧咸（David Beckham）嘅黃金右中場之路。

同屬倫敦人，同樣金髮俊朗，同樣以急勁傳中球見稱，甚至連姓名及國家隊編號都十分相似（DB7），賓特利開始以碧咸接班人自居，連髮型打扮都學到足。問題是碧咸老而彌堅，有排都唔似會退下來，欠缺耐性嘅賓特利又再次等唔切。為左上位，佢做左兩個令佢後悔不已嘅決定。

首先，為左同碧咸爭位踢歐國盃，賓特利臨時反口唔踢歐青盃，激到少帥皮亞斯跳起，同時亦搞㷫晒英格蘭球迷。自此逢親有佢落場踢太公波，主場球迷定必噓聲四起，咁又點會有運行？結果，英格蘭響外圍賽已經緣盡歐國盃，賓特利不但枉作小人，更落得一個反口覆舌嘅名聲，美夢到頭一場空。

其次，賓特利未有深切反醒，反而歸咎於效力布歷般呢種小球會嘅身份，決定要攀高枝 — 以1700鎊天價加盟國腳如雲嘅熱刺。結果，賓特利不但長期發揮失準，更連累狀態較佢好嘅艾朗連儂（Aaron Lennon）要轉打左中場，形成雙輸局面。

卡比路上場之後，不但完全冇考慮過賓特利，反而召左阿仙奴師弟禾確特（Theo Walcott）瓜代右中場一職，仲踢到識飛咁滯。見到師弟咁凌厲嘅表現，唔知賓特利會唔會後悔當初冇留響兵工廠呢？

縱觀賓特利嘅經歷，可以話係「機關算盡太聰明」，事情做得太盡，太過急功近利，簡直就係熱刺境況嘅縮影。

輸埋畀尾二嘅史篤城，熱刺終於打破百年紀錄，奪得有史以來最差開季成績。更大鑊嘅係，史上差不多從未有球隊開季咁差而最終唔洗降班嘅（1999年修咸頓係唯一例外）。

由於月尾開始硬仗連場（阿仙奴、利物浦、曼城），下仗主場對保頓就係最後一個打開勝利之門嘅機會。偏偏碰到比爾、多遜停賽，哥路卡、京治受傷，加上本身陣容失衡，熱刺前路可謂荊棘滿途。

處子登場

利物浦 2 vs 1 曼聯

雖然C朗尚未復出，但朗尼、泰維斯、貝碧托夫合組的攻擊鐵三角已經足夠令人期待。

果然，身價高達三千萬鎊嘅貝碧一開波已經表現出超卓嘅個人能力，妙傳泰維斯首開紀錄。果邊廂利物浦新兵尼亞拿表現生硬，更與隊友欠缺默契，對比強烈。

然而，貝碧及曼聯的強勢只維持左二十分鐘。佢嘅熱刺老拍檔羅比堅尼雖然全場冇乜建設性貢獻，但勝在鬥智旺盛肯緊迫曼聯後防。加上尼亞拿入局後越戰越勇，曼聯開始變得舉步為艱。

雖然缺少左皇牌謝拉特及托里斯，但利物浦沉著應戰，並以馬斯查蘭奴為首嘅硬朗攔截型中場線壓垮左曼聯！不但迫到布朗擺老烏、傑斯輸辜寒波，連一向穩建嘅維迪都魯莽領紅牌，下場作客車仔更會停賽。

賓尼迪斯上任五年來聯賽首勝曼聯，除左令紅軍心理上佔左優勢之外，更加為其他強隊展示左打敗曼聯嘅良方。相信紅魔鬼呢隊雙料冠軍嘅衛冕之路將會十分崎嶇。

曼城 1 vs 3 車路士

貝碧雖然身價高，但英超標王始終係同城宿敵曼城隊嘅巴西國腳羅賓奴（圖）。

無獨有偶，呢位「新比利」一樣有個好開始，13分鐘已經用一粒世界級自由球征服車仔。加上倒戈相向嘅胡禮菲臘斯踢得特別搏命，曼城在上半場竟可與車仔打成均勢。

但羅馬唔係一日就建成，車仔亦唔係省油的燈。憑迪高指揮若定，卡華奴八面玲瓏，加上林伯妙絕嘅攻門，最終車仔反勝三球，盡顯四大豪門的絕強實力！

可惜泰利過於魯莽，竟然響領先兩球時大意職業犯規領紅，如果因此而缺陣下週戰曼聯一役，甚至會影響英超冠軍誰屬！

如果阿拉伯油王要認真挑戰傳統四強，恐怕要買左十幾件「標王」先有得傾。

兩個神童

克羅地亞 1 vs 4 英格蘭

唔係講笑，響英格蘭大戰克羅地亞之前已經預感禾確特（Theo Walcott 圖）會唻料，但點都估唔到佢一開齋就玩帽子戲法咁激。

老實講，禾確特響阿仙奴表現認真麻麻，鋒唔似鋒翼唔似翼，身體薄弱一撞就散，入球率低進步緩慢，令人懷疑溫格有冇入錯貨。卡比路畀佢正選出戰兩場重要大戰，其膽量不下於兩年前的艾歷臣。

難怪06世界盃後，謝拉特公開批評「禾確特根本冇資格入選國家隊」！

還好，禾確特仲有良師溫格護航保駕，溫帥話過：禾確特能夠響兵工廠一隊立足就證明佢夠晒資格踢國家隊 — 因為大把英格蘭國腳都未夠水平踢阿仙奴！

呢番說話固然係臭吋無比o既歪理，但以溫格孤寒成癖兼出名鳳凰無寶不落o既作風，肯出到一千萬鎊買一隻16歲小朋友，一定有點過人之處。

論潛質，禾確特不但有遠超同齡球員o既超卓球技，而且具有驚人的快放及變速能力。更重要係佢樸素而成熟o既生活習慣，不煙不酒不慕虛榮（佢仲係渣緊架VW Golf），響紙醉金迷的英超球圈猶如一股清流。

睇返場波，禾確特的三個入球其實唔算好清脆。第一球係對方後衛送禮，第二、三球就因為已經打多一件，加上朗尼o既靚直線，入得冇乜難度。

反觀朗尼就真係打出身價，一個入球兩個助攻，完全係世界級表現！22歲就已經有咁成熟演出，加上禾確特上位，卡比路督師，英格蘭真係前途無可限量。

無冕之王

個標題原本係屬於荷蘭嘅，但自從88年荷蘭勇奪國家盃之後，似乎用來形容西班牙更為貼切。

雖云西班牙曾經贏過64年國家盃，但上世紀六十年代西班牙仍身處暗無天日的弗朗哥獨裁政權之下，主場擊敗前蘇聯奪標，當中所含水份極高。

可能係因果報應，此後西班牙無論人腳有幾齊全，牌面幾高班，都難逃8強出局嘅命運。差不多半個世紀過後，當西班牙人自己都覺得冠軍只係水月鏡花之時，新一代鬥牛勇士卻打破宿命結界。

西班牙排在最難打嘅下線，連挫最大黑馬俄羅斯、頑強堅韌嘅瑞典、世界冠軍意大利、及大賽專家德國，六戰全勝，實至名歸。決戰雖然只係小勝德國一球，但全場所佔優勢並不比準決賽狂數俄羅斯一役為小。

老帥阿拉干尼斯繼續顯示其大膽果斷的作風，排出攻力最強嘅4-1-4-1戰陣，並在領先一球之後，英明地以防守力強的阿朗素取代被凍結的法比加斯，其後更換入古爾沙及卡蘇拿，保持西班牙的進攻活力，並有多次擴大優勢機會。

反觀德國，除左上下半場初段嘅虛火之外，因受制於西班牙精巧嘅互傳，全場食塵。波歷克帶傷上陣雖敗不辱，但普度斯基及史韋恩史迪加踢到章法全無，就更令人覺得德軍能入決賽十分符碌。

更冇章法嘅係領隊路維，以信心盡失嘅贊臣入替拿武固然係昏招之最，換入古蘭爾及高美斯打高波，更加係藥石亂投方寸大亂之舉。

對西班牙來講，贏得國家盃係為國家足球隊正名，首次堂堂正正地技壓群雄，登上歐洲之巔。但對世界球壇而言，重要性不止於此。

自88年國家盃荷蘭隊以攻擊足球橫掃奪冠之後，90及96年嘅德國、92年丹麥、94及02年巴西、98及00年法國、04年希臘及06年意大利隊，莫不以功利嘅穩守突擊稱霸一時，追求漂亮足球頓變過時嘅幻想。

終於，擇善固執嘅西班牙，堅持要贏取場面，仲要贏得比賽。結果佢地以瀟灑流麗嘅進攻足球，掃平群豪，奪標而回，可謂大快人心。

漂亮足球，萬歲！

百感交集

英超07最後一戰

一念天堂 韋斯咸 2 vs 1 曼聯

費蛇成日都話：冠軍球隊最重要嘅就係穩定，狀態好時固然會大勝，踢得唔好時都可以「淆」出勝果，尋日作客韋斯咸佢地就差啲做到左。

雖然大部份時間都被槌仔幫壓住來打，但皇牌C朗再顯神通，一個頭槌令曼聯領先上半場。

如果下半場佢球12碼入埋，又會係另一場曼聯表現一般但又險勝之役，可惜，今次嘅對手係格連（Robert Green）。

唔知係唔係因為知道格連響英超已經三度撲出12碼，C朗主射時攞得大盡而宴客，但若呢球入左，就唔會有之後嘅大逆轉。

由贏波英雄變輸波罪人，C朗果然係「關鍵先生」！

以貌取人 車路士 2 vs 1 紐卡素

近期，紐卡素領隊艾拿戴斯（Sam Allardyce）比較鍾意作客比賽，因為響主場佢會畀自己球迷噓到暈。

所以，尋日佢雖然輸波（仲輸得好唔抵），但睇到主場領隊格蘭（Avram Grant）被噓，應該會慨歎「吾道不孤」。

論表現，格蘭其實唔失禮，響戰術運用及臨場調度都有板有眼。

被噓？應該唔關戰績事，畀我估，應該係因為佢副尊容。

上手領隊摩連奴被公認為「世界第一靚仔主帥」，典型嘅拉丁情人，忽然換左個老醜、駝背、古縮嘅猶太老坑格蘭，反差的確太大。

所以，到左一月時，隨左襯轉會窗重開可以買下新球員，有時間格蘭都應該去美容院執執佢。

面對現實 愛華頓 1 vs 4 阿仙奴

過去七季作客愛華頓輸左四場，拖肥糖簡單直接又略帶細膩嘅踢法，比保頓更剋到阿仙奴。

上半場愛華頓佔盡優勢兼領先一球，早已預感兵工廠將會錄下第二場敗仗。

點知，下半場阿仙奴改變戰術，竟然大踢長傳急攻，仲竟然奏效！關鍵係因為佢地多左一個機會主義者達施華（Eduardo Da Silva）。

呢個前鋒，成場都冇踢過一腳好波，同其他隊格格不入，簡直好似搭檯一樣。但只要你將個波斬上去，佢就有本事送球入網，十分神奇。

溫格領隊多年來一直評擊英超對手高Q大棍，而自己堅持地面進攻，但今場四球中有三球係大腳擁入。

到底係教授自打嘴巴？定係佢已經學精左，知道「一招走天涯」行唔通呢？

皇牌殺手

利物浦 1 vs 1 阿仙奴

賓尼迪斯不愧為盃賽專家，連聯賽都一樣用淘汰賽戰術。

先偷一粒守到完場，車仔響歐聯上食過嘅悶棍，今日差D輪到兵工廠領野。

明知隊波冇態，賓帥好巧妙咁利用針對性嘅中場卡位，徹底堵塞阿仙奴嘅攻力泉源 - 法比加斯（圖中）！

尤其係馬斯查蘭奴，繼歐聯決賽成功凍結卡卡後，再次發揮「皇牌殺手」嘅本領，令法比仔一籌莫展。

可惜兩大主力托里斯及阿朗素相繼傷出，令紅軍呢支疲兵雪上加霜。終於在體力下降情況之下，臨完場前走甩左法比仔一次，就慘被扳平。

反觀阿仙奴，縱然開季成績理想，但始終未曾與四大豪門交手，真正實力令人質疑。

今番作客早早落後，加上主隊悉心佈防，眼見難逃一敗（賓尼迪斯執教以來，利記主場對兵工廠全勝）。

但小兵仍能沉著應戰，扳平一球時，攻方三人同時走位反越位兼扯散主隊防線，實在精彩絕倫！如果唔係兩次射中柱，真係贏埋都仲得。

過到呢關，證明阿仙奴初具王者氣質，下週主場迎戰冠軍曼聯，可謂「最強對最強」，絕對期待！

峰迴路轉

英超第九週賽事

曼聯 4 vs 0 韋根

睇比數，一場典型嘅主場大捷，其實曼聯贏得並不輕鬆。上半場對韋根老鼠拉龜之餘，維迪及奧沙都傷出，好彩下半場泰維斯打開缺口，C朗及朗尼發威，終於瓦解左韋根嘅頑抗。

要我選最佳球員，一定係傑斯！雖然已經三張幾野，但傑斯一舉手一投足都仍然係世界級。曼聯陣中幾個年輕新星名氣極響，但球隊嘅真正主宰，始終都係'92一代嘅人。

至於韋根，真係睇唔出佢有響英超生存嘅實力，相信命運會同打比郡一樣......

阿仙奴 3 vs 2 新特蘭

挾著九連勝加上無敵主場，兵工廠應該大勝可期。事實上，13分鐘已領先兩球，更加令全世界都以為主隊贏硬。

可惜，小兵們傲慢輕敵嘅弱點又出現，加上新特蘭嘅「堅尼精神」驅使，大舊佬鍾斯兩次衝散左閘基治嘅城防，意外地扳成二比二平手。下半場頭三十分鐘都變成阿仙奴圍攻之勢，但場面又急又亂，又中楣又空門，就係冇入球。

但阿仙奴勝在底子厚，後備伊保、禾確特嘅高速改變左形勢。臨完場憑禾確特一個瀟灑無比嘅助攻，加上雲佩斯妙到毫巔嘅快射，險勝三比二。

雲佩斯終於都展現「新柏金」嘅射手潛質，禾確特仍有待琢磨，但兵工廠已經十連勝，霸氣越來越盛。

利物浦 2 vs 2 熱刺

利物浦週中剛踢出賓尼迪斯執教以來嘅最差敗仗（歐聯負馬賽0-1），碰到情況水深火熱嘅熱刺，非勝不可。

又係羅賓遜甩手讓利記早早打開紀錄，但謝拉特自由球中柱揭開左放虎歸山嘅序幕。

羅比堅尼在換邊前後兩度挑射得手，曝露左加歷查、希比亞兩人欠速度嘅弱點。更壞嘅係連中場都畀熱刺嘅流暢互傳控制左，利記連個勢都輸埋。

補時托里斯頭槌扳平，造成兩敗俱傷之局。熱刺聯賽只嘗一勝，領隊祖爾可以執定包袱。利物浦再失兩分，已被榜首三雄甩開，原本季初嘅良好開局煙消雲散。

曼聯擁有豪華嘅正選陣容，但後備力量薄弱。利物浦剛剛相反，後備強得嚇人，但總排唔出一支必殺嘅11人陣容。阿仙奴則由於正選表現太強，令一眾後備人滿為患，口出怨言。

英超三紅，各有各的煩惱。

物極必反

華倫西亞 1 vs 2 車路士

後摩連奴時代嘅車仔，厄運不斷。

聯賽四場不勝、陣中傷兵滿營、新教練格蘭被質疑唔夠班......

首場歐聯分組賽讓摩連奴落馬，次場對華西極可能係格蘭嘅最後遺作。

態沉勢弱嘅車仔，此時要作客對狀態大勇嘅華倫西亞，簡直係不能再差嘅時刻。

而且，華西主場密斯托拉球場（Estadio Mestalla）係著名嘅「英超墳墓」，不論利物浦、阿仙奴作客到此，一律有輸冇和。

巧合地，史上嘅唯一敗戰，就係上屆歐聯八強戰，被車仔反勝1:2一役。

所謂「趁佢病攞佢命」，華西報仇心切，九分鐘就由韋拿先開紀錄，之後更壓住來打，連穩健嘅馬基尼尼都出現大量傳送失誤，弱勢嘅車仔似乎面對一場大屠殺。

但係柳暗花明，車仔憑一個烏龍球扳平，下半場開始沉著應戰，此消彼長之下，華西反而越踢越沉。結果，全靠祖高爾一個世界級直線傳球，帶傷上陣嘅杜奧巴不負所託，以一個快速反擊完成驚天逆轉。

歷史再次重演嘅原因，除左係西班牙人慣性嘅後勁不繼，更重要嘅係車仔部署成功。

馬基尼尼、米基爾及艾辛三個力量型防中，將中後場空間都堵死，加上泰利、卡華奴呢對最佳中堅拍檔，今華西攻勢變成隔靴搔癢。

正所謂「瘦死駱駝都比馬大」，車仔雖然落難，但球員質素仍然超班。祖高爾、馬路達、杜奧巴等靈光一閃，就足以置敵於死地。

而且，領隊格蘭響以色列以善帶弱隊著名，初教強隊車仔面對弱旅死守顯得一籌莫展。難得對華西時被一面倒睇淡，被逼要踢穩守突擊，簡直係開正佢果瓣。

一場勝仗可以改變風向，如果車仔乘勝響英超再次奏捷，相信格蘭帥位暫時可保。

各奔前程

巴塞羅拿 3 vs 0 里昂
阿仙奴 3 vs 0 西維爾

由於身子孱弱，以致歐聯報告大遲到。

cut左畸寶之後，冇得睇西甲，好耐都冇機會睇亨利獻技。

呢個英超第一球星出走西甲，一方面令人對巴塞「神奇四俠」滿懷憧憬，同時又為頓失支柱嘅兵工廠擔心不已。

難得兩軍同日出擊，可以睇下邊個「活得比你好」？

里昂雖然係法甲六冠皇，但今季將帥出走，聯賽開局不利，已全然失去往日嘅霸氣。作客魯營球場，竟淪為巴塞嘅試招沙包，可算堪苛。

但巴塞都唔見得好好，細哨缺態，伊圖奧倦勤，全靠美斯單天保至尊。亨利踢足全場，但狀態、默契、光芒都欠奉，如果唔係補時執返一粒，實在愧對金靴美譽。

除左美斯，巴塞三個入球都係靠少年軍帶動，如「後備王」恩尼斯達、杜斯山杜士、及年僅17嘅小將赫傑（B. Krkic）。

果然，拳怕少壯！果邊廂「童子軍」阿仙奴更能證實呢句說話。

除左繼續閃耀嘅法比加斯之外，希比、雲佩斯及路斯基都十分出色。

不得不提左閘基治（Gael Clichy）同前鋒艾迪巴約（Emmanuel Adebayor）兩人無私嘅跑動，助攻助守，令實力超強嘅歐聯新丁西維爾上左慘痛一課。

亨利在兵工廠陣中享受住眾星拱月嘅禮遇，去到新東家要重新學習點樣做綠葉。反而一眾小兵響群小無首之際，竟然團結一至地踢出全能足球。遇合之奇，猶如做戲。

當初預言兵工廠會響英超四甲不入嘅專家，而家都應該收晒口。

藍獅憂鬱

車路士 0 vs 0 布力般流浪

如果唔係車仔前鋒S.卡奴（Salomon Kalou）嘅入球被枉判詐糊，如果唔係流浪個龍費度（Brad Friedel）撲到上身，車仔應該可以食魚生粥小勝。

但事實係，缺少左中場林柏特（Frank Lampard）及前鋒「魔獸」杜奧巴（Didier Drogba）嘅車仔，只係一隻冇牙老虎！

情況好似上季失去後衛泰利（John Terry）及鋼門施治（Petr Cech）一樣，佢地前、中、後、龍四人組成嘅中軸線，缺一不可。

作為富豪球會，車仔後備力量仍然強橫，可惜，缺態嘅舒夫真高（Andriy Shevchenko 圖）已非當日嘅米蘭金靴，射門軟弱無力，速度亦完全欠奉，多次門前失機。

來自雷丁嘅薛維爾（Steve Sidwell）瓜代「林伯」嘅中場分波工作，勤力有餘但卡士不足。覺得佢正走緊柏加（Scott Parker）條舊路，希望通過混入豪門再上層樓，無奈幾多成名國腳響車仔都爭唔到後備一席。

因為車仔有的是錢，隨時可以購入世上每個位置嘅最佳球員，根本唔會花時間培養本土人才。薛維爾睇來有點痴心妄想，睇怕坐多一兩年高薪冷板就要出去面對現，搵過頭好人家。

另一方面，錢又並非萬能。事實上，車仔近年買入嘅巨星都明顯水土不服，舒夫唔計，單係波歷克（Michael Ballack）就傷患纏身。始終拳怕少壯，球員過左而立之年，莫講話要適應新環景，能夠無傷無病落到場踢都偷笑。

車仔現在響主場仍然虎虎生威，靠嘅係領隊摩連奴嘅謀略。將一班技術一流嘅國腳級球員，操到肌肉橫生，再訓身全場緊逼踢擦鞋仔波。

場上一堆藍衣巨人橫衝直撞，面目模糊，乖巧嘅洛賓及杜夫下堂求去，以往充滿靈氣嘅祖高爾已被改造成筋肉超人，甚至連老鼠仔胡禮菲都變得硬朗蠻幹...成績係有左保證，但呢種功利足球絕非班主艾巴莫域所樂見。

而且，同一招「力量型」足球已經被睇穿，馬克曉士就話我地「暴力般」都有得出賣。結果，中游隊對車仔嘅恐慌不再，反而峙機偷雞。

車仔已連續兩場對中游隊失分，勢頭實在唔好，如果今屆仍然不能重奪英超桂冠，相信摩帥個位會凍過水。

同城死敵

熱刺 1 vs 3 阿仙奴

講開阿仙奴，就不得不提熱刺（Tottenham Hotspur）。

有別於其他打比戰，熱刺同阿仙奴絕對係歡喜冤家。不但因為佢地同係倫敦最有實力嘅傳統勁旅，而且兩隊更可以話係身負血海深仇。

首先，早在1913年阿仙奴遷址至北倫敦，好揀唔揀，揀著鄰近熱刺主場白鹿徑（WHite Hart Lane）嘅高貝利球場（Highbury）。呢下擺明踩場，已令兩會關係緊張。

估唔到幾年之後，英甲賽會改制，由18隊增至20隊，原本排包尾18名嘅熱刺有望留級，點知畀乙組排第五嘅阿仙奴，洗橫手搶走最後一個英甲位置。英國人最重視公義，熱刺黯然降班之餘，對阿仙奴嘅仇恨已到左不死不休嘅地步。

自此之後，每次兩軍交鋒都踢到飛沙劈石，以性命相搏。但自從二次大戰前阿仙奴傳奇領隊卓文（Herbert Chapman）出現並橫掃英倫之後，熱刺一直都活在兵工廠嘅陰影之下。

至今，阿仙奴已共奪得十三次頂級聯賽冠軍，熱刺則只有可憐嘅兩次。近年車路士獲得油王入股實力大增之下，更連贏兩冠超越左原本嘅「二哥」熱刺，更令其球迷恨得牙癢癢。

好喇！講返場波！熱刺賽前五戰三負一和，領隊祖爾已聞到魷魚香。今場仲係主場對死敵，更要加多兩錢肉緊。

15分鐘就由光芒四射嘅比爾憑死球打開紀錄，實在係不能再好嘅開局。但兵工廠「後勁王」美譽並非白叫嘅，下半場憑艾迪巴約及法比加斯連入三球反勝，熱刺應該敗得心服口服。

熱刺其實踢得唔曳，全場轉捩點係下半場1:1時，見碧托夫勁射被基列治護空門，轉頭就畀法比仔射球世界波反超前。加上見碧托夫及戴倫賓特兩次單刀失機，整定熱刺跌入水深火熱嘅命運。

反觀阿仙奴，上屆此時此地，同樣係早段失波而反勝兩球，最終響補時被熱刺中場贊拿斯勁射扳平，和局終場。今年面對同樣情況，一眾小兵不急不燥，逐點收復失地，踢起來信心十足。

五戰四勝一和高據榜首，又要再一次向溫格領隊至敬！

心理質素

阿仙奴 3 vs 1 樸次茅夫

主場加半場揸住兩粒，對兵工廠班後生仔來講，係順風波，好好踢。

好可惜，論盡嘅辛達路斯又一次闖禍食紅牌。

畀著上季，班小兵會頂唔住壓力自亂陣腳，然後畀如狼似虎嘅老樸追和。

但今次班小朋友成熟左，頂住對手反撲之餘仲偷雞整多一粒，縱使簡奴扳回一球，都改變唔到結果。

呢兩季，兵工廠綽號後勁王，下半場末段竟然壓住打多一件嘅老樸來打，初生之犢真係唔講得笑！

中場巨人

利物浦 6 vs 0 打比郡

雖然對手只係降班膽打比，雖然打比呢場亦發揮失常，但係六比零嘅戰果仍然未能反映賽程有幾一面倒。

阿朗素及托尼斯都梅開二度，連敗家仔巴布都開齋，但最令人印象深刻嘅，應該係阿根庭國腳馬斯查蘭奴（Javier Mascherano 圖）。

雖然馬斯仔五短身材（身高1.75米），但佢意識好、卡位靚、剷波準，加上超強嘅閱讀球賽能力，差不多每次一觸球就會轉守為攻。

利記全場佔盡優勢，瀟灑流暢，在當今英超所有球隊中，最具冠軍相！

光芒四射

曼聯 1 vs 0 熱刺

曼聯終於打開勝利之門，新兵蘭尼處子入球奠定勝局......但真正嘅光芒，來自兩個熱刺球員 - 貝碧托夫（Dimitar Berbatov）及比爾（Gareth Bale）。

貝碧托夫上季登陸英超，能傳善射，腳法、速度、自由球都有一流造詣，盛傳曼聯費sir早想收為己用。今次正面交鋒，更加證明費sir法眼無差，貝碧托夫雖然帶傷上陣，仍然令曼聯後防風聲鶴唳。如果唔係「奧脫褔法則」再次發功，佢早應射入兩球，而維迪及布朗都要食紅牌離場。

另外，熱刺小將比爾首次參戰英超，表現遠比名氣更大嘅修咸頓師兄弟禾確特（Theo Walcott）出色！佢不但未有怯場，更多次利用高速與盤扭撕破曼聯防線，而且更包辦熱刺大部份死球，落點準確急勁，甚具大將之風。

四戰三敗之後，熱刺想請教練約爾（Martin Jol）食炒魷魚之聲，甚囂塵上，觀乎約爾買入嘅小將質素，可知佢係有料之人。奈何熱刺班主三心兩意、急於求成，呢個荷蘭教頭未必有機會等到修成正果一日。

半場報告

熱拿亞 0 vs 3 AC米蘭（半場結果）

雖然冇再用畸堡，攪到冇得睇西甲，好在NOW仲有意甲，結果都睇返一場賀開「咧」！

睇牌面，強弱懸殊，歐洲冠軍對升班馬，米蘭基本上贏梗，但估唔到贏得咁輕鬆。A米基本上都係上屆季尾班底上陣，排個451，基拿甸奴單箭頭，算係畀面對手，當打少一個。基拿甸奴亦「不負眾望」，不斷犯越位之餘，面對空門亦冇浪費任何「撻Q」嘅機會。可以想像，如果出左F.恩沙基或者大哨，恐怕主隊半場起碼要吞半打光蛋。

但係，「十人應戰」嘅米蘭仍然係銳不可擋，冇傷冇病嘅尼斯達（Alessandro Nesta）（見圖）絕對係我心中嘅世界第一中堅，殺波神準，無懈可擊！左右二閘贊古諾夫斯基及奧度不斷上前助攻，話過就過。在中場掃蕩上岩布仙尼及加度素仍殺晒；施多夫在走位及入滲都繼續保持良好狀態；派路嘅長傳直情好似裝左雷達咁準確；至於卡卡，平時賴賴閒，一攞到波就爆開晒對手後防，半場梅開二道，兵不血刃。

縱觀米蘭表現，悅目流暢，攻堅守穩。而且後備席仍有大哨、大恩、新兵艾瑪臣、比圖等枕戈待發，可以話係當今歐洲球壇最可怕嘅球隊！至於場波，套句國內述語：真係「毫無懸念」，冇乜心機睇落去......

事有湊巧

阿仙奴 1 vs 0 曼城

「曼城終於失球」、「長勝之師斷纜」可能係呢場波響體育版嘅標題，但更吸引我嘅係下半場阿仙奴果球12碼。由雲佩斯操刀射小舒米高把關嘅大門？心中即時湧起不詳之兆。

諗返1999年足總盃準決賽中，阿仙奴領先一球之下仲得到一球12碼，柏金操刀畀舒米高撲出後，曼聯最後奇蹟反勝晉級，最終完成三冠王霸業。因為呢單野，柏金以後都唔敢再射12碼。

小舒米高固然有乃父之風，雲佩斯嘅綽號正是「新柏金」，兩代傳人交手嘅結果，係歷史再次重演，都係唔入，邊會有咁邪架？

好彩，阿仙奴不愧為「後勁王」，狂攻80分鐘之下，終於由法比仔奠定勝局，總算補返雲佩斯隻鑊。曼城雖敗不辱，全場與兵工廠打成均勢，問題是欠缺一個有卡士嘅前鋒殺手，相信班主他信又要破財喇。

第十二人

利物浦 1 vs 1 車路士

豪擲四千萬鎊之後，利物浦終於都展現皇者霸氣！面對宿敵車仔，利記首次在全方位擁有壓倒性優勢，不但防守嚴密，而且進攻流暢，托里斯開齋一球更加有亨利o既影子。連車仔一嬲o既強項 - 後備兵源都被利記壓倒，相信冇邊支英超隊擁有巴布、高治、馬斯查蘭奴、禾朗連、班拿約等球員，都能夠擺晒響冷板曬太陽。

車仔全場受壓，落後一球時亦冇板斧再變，勢估唔到球證史泰奧斯(Rob Styles)會「私人醒」一個子虛烏有o既12碼畀佢地，加上施治、艾辛演出神勇，車仔得以全身而退。利記球員投訴，球證仲整多件黃牌你嘆，真係好鬼型，a referee with Styles!

陰謀論時間：球證幾個關鍵判決都匪夷所思，唔通車仔表面上閂水喉唔再投資買大牌球星，實際上係「精鋼用在刀口上」，學意甲豪門一樣玩「打多一件」？