完美中鋒

講開金球獎，歷來只有三個人能夠三度封王，除左荷蘭球王告魯夫（Johan Cruyff）及法國球王柏天尼（Michel Platini）之外，就只有荷蘭中鋒雲巴士頓（Marco van Basten）。

與兩位經典球王經歷不同，雲巴士頓職業生命非常短暫。由1988至1992年間盡現光芒，到28歲時無奈被迫掛靴，猶如彗星般一閃而逝，令佢嘅事蹟更添傳奇色彩。

雲巴士頓嘅技術特點就係「全面」，基本上，一個中鋒應該有嘅質素，響佢身上都發揮到最極限。佢擁有一流嘅速度、理想嘅身高（188cm）、上乘嘅腳法（單對單一對二話過就過）、良好嘅閱讀球賽能力，但最可怕嘅，係佢嘅射術。

如果大家有睇過雲巴士頓嘅入球雜錦，肯定會驚嘆於其入球能力。無論係單刀波、中距離、長程炮、執死雞、倒掛金鉤、左右開弓、凌空抽射、落葉自由球、插水式頭槌......佢都能夠做到舉重若輕，瀟灑有型！

世有伯樂，然後有千里馬，如果唔係時任AC米蘭會長嘅貝魯士科尼（Silvio Berlusconi）慧眼識英雄，歷史又可能會改寫。1987年時，立志要振興米蘭嘅佢，重手以破世界紀錄轉會費羅致左歐洲足球先生古列治（Ruud Gullit）之後，仲想搵多隻中鋒拍檔，結果佢用左一分鐘時間睇雲巴士頓響阿積士嘅錄影帶之後，就決定放棄收購當時名滿天下嘅「入球機器」魯殊（Ian Rush）。

跟住嘅三年，米蘭連奪意甲及兩隻歐洲杯錦標，雲巴士頓嘅入球居功至偉。期間仲包括左88年嘅歐洲國家盃冠軍，雲巴士頓果球「零角度射門」，更被領隊米高斯（Rinus Micheals）譽為「一生只能有一次」（Once in a lifetime）咁難能可貴，同時更被廣大球評家認為係史上大賽決賽中嘅最精彩入球。

結果，憑著88年嘅歐國盃、89年嘅歐洲冠軍球會盃（歐聯前身）、92年創下AC米蘭58場聯賽不敗戰績，讓雲巴士頓三度登上歐洲足球先生寶座，同時又令佢跌入傷患嘅深淵。

由於雲巴士頓實在太難防禦，意甲嘅後衛選擇用最後一招 — 職業犯規！雲巴士頓響正面對抗時雖然大獲全勝，但就經常被人從後攔截。結果，經常被踢嘅腳踭嘅傷患不斷，到左92年終於都支持唔住。經過幾次失敗嘅手術後，雲巴士頓被迫退休。

事件震驚球壇，世界足協為亡羊補牢，遂定立從後攔截條例，保護攻方球員。最諷刺嘅係，呢條新條例嘅最大得益者，竟然係雲巴士頓嘅宿敵 — 德國人奇連士文（Jurgen Klinsmann），奇連士文仲因為「充份地」利用條例獲益，成為史上首位獲得「插水王」（Diver）稱號嘅球員。

雲巴士頓黯然引退後，足足休養左十年，直至2002年先重出江湖執教阿積士青年隊，兩年後臨危受命掌管國家一隊，終於將一眾球星彈壓收服。性格剛烈如雲尼斯達萊（Ruud van Nisterooy），都只能敢怒不敢言，鬼叫雲巴士頓係所有荷蘭球員嘅偶像咩？

好多年輕球迷都會覺得大哨細哨技術一流，或者C.朗、托里斯等好波又靚仔，但講到中鋒嘅級數，我仍然覺得雲巴士頓係超晒班！

皇者霸氣

雖然有點out，但話晒都係球壇最重要個人獎項，點都要恭喜基斯坦奴朗拿度（Cristiano Ronaldo dos Santos Aveiro）榮獲本屆金球獎（Ballon D'Or）。

計落已經係近年第三位名為朗拿度嘅球星奪得金球，國內媒體稱肥哨為「羅尼」、朗拿甸奴為「小羅」，咁C.朗就順理成章變成「小小羅」，其實係唔多關事嘅。

因為Ronaldo只係C.朗middle name之一，原因也與大細哨無關。事緣佢父親大人嘅偶像係美國總統朗奴列根（Ronald Reagan），所以響乖仔名入面加左個Ronaldo以玆紀念。

與上兩屆金球得主朗拿甸奴及卡卡相比，C朗得獎並未得到相同的重視，反而有大量議論覺得佢名過於實，並為落敗的美斯（Lionel Messi）抱不平。平心而論，上季C.朗表現確實出類拔萃，42個入球鐵証如山，英超歐聯雙冠更加係不凡功業，佢拎金球獎都可謂實至名歸，仲有乜好拗呢？

原因好簡單，C.朗嘅公關形象太差。

首先講場內，C.朗初入曼聯時踢法非常獨食，畀人鬧足三季先有改善。而且佢球風偏軟，一碰即倒，並經常抱怨球證唔保護佢，係英超著名嘅「插水王」。加上響06世界盃「陷害」曼聯同袍英格蘭前鋒朗尼（Wayne Rooney），令佢經常成為被噓對象。

再講球場外，C.朗為人涼薄，唯利是圖。不顧費格遜對佢嘅栽培及保護，多次公然對皇家馬德里送秋波，並在轉會不成之際，叫經理人向曼聯施壓扭加薪（佢週薪本來已達12萬鎊之高）......忠誠及道義響佢眼中不值一文，自我中心得令紅魔球迷又愛又恨。

畢竟，C.朗只有23歲，加上條件太好成名太早，令佢成為一個被寵壞嘅孩子。佢果種世界圍著自己而轉嘅觀念，與80後一代年輕人如出一轍，難怪對C.朗嘅評價壁壘分明，愛之欲其生，惡之欲其死。比起細哨、卡卡之讓人心悅誠服，C.朗明顯係輸在欠缺皇者嘅氣質。

講到氣質，巴塞嘅美斯雖然更加年幼，但不論場內場外，阿根庭新球王所展現的霸氣都有凌駕C.朗之勢，除非曼聯今季仍有超卓成績，否則C.朗要衛冕金球，都可謂荊棘滿途。

無論如何，素有收集金球獎得主嘅皇馬一定會捲土重來，再次出手利誘C.朗，只要條件夠優厚，相信C.朗都唔會同老東家講仁義道德。下季佢到底會穿紅定著白，大家且拭目以待。

一時瑜亮(2)

呢個標題，原本係好行貨（已用過一次）。但係，多得吳宇森導演嘅作品《赤壁》，令到呢個成語多左一個「新意義」。

但講到球壇最不幸嘅一次命運相逢，就冇辦法唔再用呢個充滿幽默感嘅標題。

講嘅係兩個意大利球壇超頂級天才 — 羅拔圖巴治奧（Roberto Baggio）及迪比亞路（Alessandro Del Piero 圖）。

巴治奧嘅英雄事蹟可謂家傳戶曉，尤其是1994年世界盃以獨力帶領國家隊殺入決賽，最為人津津樂道。

至於迪比亞路，由於技術特點與巴治奧如出一轍，所以在非常長的一段時間都只被視為巴治迪嘅替身，直至後者退役，呢個陰影都冇消失過。

所謂人比人比死人，如果冇巴治奧，迪比亞路嘅日子應該過得好好。

因為佢係世上非常罕有嘅超級天才球星，有腳法、有速度、夠體力、有智慧，左右雙腳都一樣靈巧，兼備超一流射術，可勝任中鋒、輔鋒、左右雙翼、攻擊中場，甚至左右二閘各位置，遠射、執雞、頭槌、自由球...無一不達世界一級水平。

加上成名極早而且職業生命超長，年方弱冠就一直效力於歐洲最頂級球會（祖雲達斯）至今，令迪比亞路成為世上少有嘅富豪級球員。

就算從私生活衡量，佢都係無懈可擊。迪比亞路出名脾氣好，為人彬彬有禮，家庭生活幸福，從不鬧緋聞。而且對球會極度忠心（隨祖記降班意乙），兼且絕對服從指揮（卡比路執政兩年長坐冷板而無怨言），縱觀當今球壇，如此完人，只此一家別無分店。

偏偏，迪比亞路係好多意甲球迷嘅眼中釘。一方面係因為佢響祖記同國家隊，都搶走左萬人迷巴治奧個位，加上佢年輕時多次響關鍵戰役都表演失準，導致呢位好好先生遲遲得不到公允嘅評價。

不知不覺間，迪比亞路已連奪七屆聯賽冠軍，歐聯、世界盃等最高榮譽都一一成為佢囊中物。可惜，期間造就左隊友施丹、尼維特、簡拿華路等，佢就只能為他人作嫁衣嫦。

直至現在，34歲嘅迪比亞路仍然響歐聯發光發熱，雙殺皇馬之役佢就貢獻左三個精彩入球，連皇馬嘅主場球迷都忍唔住起立致敬。究竟意大利本土嘅球迷幾時先會放下成見，重新評價呢個上天賜畀佢地嘅奇材呢？

絕世強者

續談球王往事。

如果響82年有人問：馬勒當拿有乜咁勁？我真係答唔出。

論入球能力，意大利羅斯遠勝之；論大局觀，法國柏天尼贏到開巷；論個人技術，巴西眾星只有過之而無不及...1982年的馬勒當拿，只係一個技術唔錯的南美小球星。

但同一個問題，響四年之後會有一個好明確嘅答案：

迪高.艾文度.馬勒當拿，就係世上最強的人！

有睇過1986年世界盃嘅觀眾，都不能否認馬勒當拿嘅「強」—— 最純粹嘅強、最可怕嘅強、無可爭議無法抗衡嘅強！

歷史一再話畀我地聽：世界盃，只屬於世界上最強嘅球隊，只屬於地球上技術最好、默契最強、戰術最精嘅頂級球隊。就算技術再高狀態再好，想以一人之力捧走世界盃，絕對係妄想！

1958年瑞典世界盃，法國人方亭（Just Fontaine）6戰射入13球，技驚四座，最終被群星拱照o既巴西隊淘汰。1966年英國世界盃，葡萄牙球王尤西比奧（Eusébio）更以一己之力帶領國家隊打入三甲，但亦僅此而已，難再寸進。

直至1986年......

經過一個失敗嘅82世界盃、兩年噩運與傷病纏身嘅西甲之旅後，馬勒當拿響意大利小球會拿玻里（SSC Napoli）治療身心創傷，重拾狀態。過去四年的西甲、意甲經歷雖然令馬勒當拿吃盡苦頭，但同時將佢鍛煉得更快、更強、更狡猾！

86年的阿根庭隊，陣容比四年前更弱，巴薩里拉走左、阿迪尼斯走左、甘巴斯走左，隊中只有效力皇家馬德里嘅前鋒華丹奴（Jorge Valdano）叫做有少少名氣，其他隊員只係湊夠數而已。

唯一變強左嘅只有隊長馬勒當拿，所以阿根庭嘅戰術好簡單，仍然係： 搶波 > 交畀隊長 > 收工！

正因為戰術太簡單，無論任球隊對阿根庭，都會用返四年前果招「凍結馬勒當拿」，但今次個結果好唔同。

首先嘗試嘅係衛冕冠軍意大利隊，以防守能力稱霸世界嘅意大利派重兵釘防球王，加上已經一球在手，相信大局已定。但馬勒當拿冇放棄，佢把握住全場唯一機會用速度擺脫對手貼身攔截，再乘門將出迎間隙挑射空門，迫和1:1。阿根庭就憑呢場和局以首名晉級淘汰圈，成功避開左勁敵法國及巴西。

第二隊挑戰者，就係自66年世界盃冠軍隊以來最強o既英格蘭隊。由於實力旗鼓相當，加上最近在福克蘭群島英軍擊敗左阿根庭軍，令這8強大戰氣氛異常緊張，戰情陷入膠著狀態。

之後發生嘅事可以話係家傳戶曉，馬勒當拿先以超人彈跳力加上絕頂蠱惑嘅陰招「上帝之手」（見圖）打破僵局，再以驚世駭俗嘅技術扭過英格蘭6名球員（順序是：荷度、列特、森臣、畢查、芬域、施路頓），射入「世紀金球」，寫下世界盃史上最具爭議的一役。

賽後，英格蘭人十分無奈，既對卑鄙的「上帝之手」深惡痛絕，同時又被完美的「世紀金球」彈壓得心服口服。從此，兩國球隊就結下不死不休嘅世仇，禍延至今未停。

面對鋒芒畢露嘅球王，老「朋友」比利時信心十足，因為四年前正係佢地首創嘅「鐵桶陣」圍死左馬勒當拿。加上有當屆最佳門將樸夫（Jean-Marie Pfaff）把關，可以話係毫無破綻。

比利時人嘅自信來自強大的防守力，佢地嘅戰略亦執行得好徹底：放棄其他雜魚，全力凍結球王！

好可惜，雖然一堵四人組成嘅移動城牆完美地封死左對手嘅射門角度，但當日嘅馬勒當拿已經進入左無堅不摧狀態，個人連下兩城，報盡新仇舊恨。尤其是千里走單騎果一球，再次證明對英軍時嘅光芒，唔係靠撞彩。

至於往後如何擊敗西德，都已經無關痛癢，因為馬勒當拿已經創造左一個傳奇 —— 「以一人之力，奪取世界！」

對世上少數的強者而言，歷史，還是有許多例外的。

壹玖捌貳

講開老馬，本人對呢位阿根庭球王係特別有感情嘅。因為小時候冇乜點踢波，亦唔係特別喜歡睇足球，直至1982年小馬出現，情況先開始改變。

話說當年聽新聞報告，知道阿根庭有個號稱「新球王」嘅人以破世界紀錄（500萬鎊）轉會費投效巴塞隆拿，而佢將會隨母會小保加訪港，同精工足球隊踢一場表演賽。

後來睇《球迷世界》先知呢個只得21歲、五短身材（身高五呎五吋）、其貌不揚（小圖係球王穿上精工球衣的「雄姿」）嘅矮仔就係萬眾觸目o既明日之星？真係打死都唔信。

好奇之下睇返資料，原來馬勒當拿響1978年已經天才橫溢並已入選國家隊，但領隊文諾迪嫌佢太年輕，令佢錯過左國家首奪世界盃嘅機遇。

一年後，佢率領阿根庭青年隊以狂風掃落葉姿態勇奪世青盃，決賽3:1勝蘇聯一役更被視為經典決戰，主場嘅日本球迷睇到如癡如醉，難怪到今天響日本仍有大量「馬迷」。

到82年，馬勒當拿已貴為全球名氣最響嘅球星。政府大球場一戰，馬勒當拿帶領小保加以2:0擊敗左實力頗強嘅精工，但佢嘅表現平平，仍然唔知點解會值咁多錢？（大佬！八十年代五百萬鎊等如今日幾十億人仔咁多！）

眨下眼到左82年中，新球王率領阿根庭隊去西班牙衛冕世界盃。由於名氣太響目標太大，馬勒當拿首戰就被對手比利時隊特別「招呼」，眼見四個高大球員全場追纏圍毆一個矮仔，場面都幾震撼。結果阿根庭出閘脫腳輸0:1，面對超技術侵犯，呢個「球王」明顯唔夠經驗應付。

最後，阿根庭雖然勉強出到線入第二圈，但好不幸被編入死亡之組。首場對該屆最終冠軍隊意大利輸1:2，尾場硬撼被譽為「有史以來最強巴西隊」（包括薛高、蘇古迪斯、伊達、科高、祖利亞、加拉卡...每個都有歐洲足球先生級實力，太可怕喇！），慘敗1:3！

原本技不如人輸左波出左局，係衛冕失敗者，冇乜大不了，但馬勒當拿響臨完場前五分鐘，仲做左一件令佢終生遺憾嘅蠢事。

眼見踢足五場，場場孭重飛，唔係畀人踢到飛起，就係被對手搓到暈，獨力難支嘅小馬終於大爆發 — 以一記異常醜陋嘅飛踢，完全命中巴西中場巴迪斯達腹部！

一面紅牌！就係小馬響今屆賽事唯一得到嘅記念品。所謂「新球王」，以最醜惡嘅方式向世人宣告：馬勒當拿係一個最令人失望最名大於實嘅「次貨」。

雖然馬勒當拿嘅處子演出，可以用衰到貼地來形容，但我仍然覺得佢係十分值得同情嘅。

首先，雖說係阿根庭係衛冕冠軍隊，但78年時其實贏得唔多光彩（主場、造假、禁藥），更易成為眾矢之的。而且4年前果班骨幹球員已經狀態嚴重滑坡，加上球隊戰術單調，過份依賴小馬技術作個人突破。結果，全世界都知道擊敗阿根庭嘅「秘密」 — 凍結馬勒當拿！

賽後，78年冠軍隊成員如巴薩里拉、阿迪尼斯等淡出國家隊，阿根庭隊中再無具份量球員。馬勒當拿可算生不逢時，阿根庭歷來人才輩出，偏偏就響佢當打之年，碰到百年一遇嘅青黃不接危機，注定左佢要憑個人之力走出一條前無古人嘅「球王之路」。

皇者回歸

不甘寂寞的老馬又返來喇！

作為近代球壇最具爭議性o既人物，球王馬勒當拿（Diego Armando Maradona）終於重歸阿根庭國家隊 —— 以主教練的身份。

雖然阿根庭隊近況低迷，但戰績未至於不能出線世界，為乜要出到球王領軍呢最後一著呢？

所謂「最後一著」並非對球王有貶意，論人氣、論號召力、論江湖地位，馬勒當拿都係不二之選，問題是：呢個球王o既性格太難捉摸喇。

球員時代嘅馬勒當拿固然有嚴重嘅生活作風問題（吸毒、禁藥、私生子），佢退役之後都係是非不斷（癡肥、槍擊記者、心臟病發）。更可怕嘅係球王短暫o既執教生崖，實在毫無說服力（27戰3勝）。老馬從來都冇上過正式教練班，兩次執教國內小球會都係以賓主反面收場。

所以話，唔到山窮水盡，都唔好諗要搵佢老人家出山。

坐擁美斯、阿古路、列基美、馬斯查蘭奴等球星嘅阿根庭隊，實在同山窮水盡相去甚遠。但正因為隊中球星如雲，但國家隊長期冇盃捧，先至令足總壓力越來越大。

阿根庭近年響青年隊及奧運隊級別賽事上，可以話係所向披靡，偏偏響大國腳級別賽事總係鎩羽而歸。論牌面逐隻秤，阿根庭比起巴西、德國、意大利都有過之而無不及，奈何每到關鍵時刻就會走樣落敗，情況令人擔心。

究其原因，眾星唔團結固然係死症，欠缺求勝決心更加係致命傷。以球王神一般嘅號召力，班國腳當然唔敢說不，加上老馬響團結大軍鼓舞士氣方面亦有一手，搵佢執教可說對症下藥。

但作為一個戰術文盲，加上會隨時劈炮，老馬渣旗實在太唔穩陣，所以阿根庭足總買左個雙保險。首先，重召球王嘅老上司86年世界冠軍主帥比拉多（Carlos Bilardo）做球隊經理，再加舊同袍兼國奧隊主帥巴迪斯達（Sergio Batista）做副手，希望可以應付球王嘅「神來之筆」。

雖然未知效果如何，但老馬出山呢個話題本身就夠晒震撼，期待本月十九號首戰蘇格蘭，可以睇下「球王魔法」靈唔靈！

世紀黑仔

西班牙就打破左宿命，勇奪冠軍。但有個人就總係宿命難違，佢就係絕世黑仔王波歷克喇！

先別說2002年嘅四亞王事件，單係今季，唔計果隻盃仔慈善盾，克仔都「囊括」左聯賽盃、英超聯、歐聯三大賽事嘅銀牌，難怪畀人話「天生一條二奶命」。

六年前踢利華古遜時，球隊實力有限，但仍堅持三線作戰，難免顧此失彼。到加盟人強馬壯嘅車仔時，又撞正曼聯第三皇朝興起。響國家隊面對人材凋零，波歷克單天保至尊，能夠多次殺入決賽已算有交代。

西洋人說十三不詳，偏偏波歷克響球會及國家隊都穿上13號球衣，甚至連響車仔嘅週薪都係13萬鎊。結果搞成咁，你都唔好話唔邪！

艾度亞悼

寫左咁耐blog，從未有一刻好似而家心情咁沉重，希望有朝一日，能夠再見到呢個天才前鋒嘅場上英姿。

(敬告各位：唔好因為好奇而上youtube搵呢段片段來睇，因為過程實在太過凶殘喇。更可怕嘅係行凶者仲得到「斯文」、「君子」等讚語，令人十分費解。）

殘而不廢

球星，通常都得天獨厚。

靚仔如碧咸、聰明如告魯夫、有錢如朗拿度。

就算唔靚仔唔聰明唔有錢，起碼都一定有健康嘅體魄。

但係，世事總有例外嘅......

早兩日，西維爾嘅年輕國腳佩亞達（Antonio Puerta），就因為比賽中心臟病突發，與世長辭，享年22歲。

跟佢同病相憐嘅前輩，有尼日利亞國腳簡奴（Nwankwo Kanu）。

簡奴18歲就奪得奧運金牌，加入豪門國米，
點知驗出有心臟病，結果要做心臟手術，仲休息左幾年。

好彩阿仙奴夠膽搏，平價將佢購入，仲成為兵工廠主力。
到今年三張幾野，仲響老樸搏到張新約，老而彌堅！

簡奴同期仲有荷蘭國腳戴維斯（Edgar Davis），佢比較好彩，
只係衰青光眼，結果佢比賽戴住果個特製眼罩，成為左佢嘅標誌。（圖）

好笑在，因為眼鏡贊助合約問題，
佢醫返好對眼後，仍然要戴住果對野比賽。

至於最出名果個，就梗係當紅炸子雞美斯（Lionel Messi）啦。

佢12歲時被發現生長激素出問題以致發育遲緩，
家人缺定搏一鋪，舉家移民西班牙，方便佢求醫。

好彩，巴塞球探慧眼識英雄，
不但負擔全部醫藥費，仲養起佢全家。

如今美斯貴為天皇巨星，仍然對巴塞忠心耿耿，
就係因為巴塞冇因為佢係病人而放棄佢。

但論身體有缺憾而成就最高嘅球星，
必定係巴西國腳加連查（Garrincha ）！

雖然佢天生殘缺（真係好殘，天生長短腳，左腳仲係攣嘅），
但仍被世人公認為「盤球之王」，
扭波時落腳方向刁鑽，鬼神莫測。

人稱球王比利三奪世界盃，其實1962果屆比利受傷冇得踢，
巴西之稱霸，全靠綽號「小鳥」嘅加連查單天保至尊。

可惜嘅係，加連查雖然克服到身體嘅殘障，
但始終都未能克服自己嘅心魔。

1983年，「小鳥」因嚴重酗酒逝世，
臨死時，家財散盡，妻離子散，享年49歲。

新太空人

都話中港融合越來越快，港人北上工作機會不斷增加（包括小弟），連香港足球界人士都唔例外。

最近NOW取得英超播映權，並招納資深旁述員丁偉傑，其實除左香港亞視體育，傑仔一直都有講開英超及歐聯，但就唔係香港o既電視台，而係廣州競賽頻道。響廣州東站撞過佢幾次，每次都行色匆匆面無表情，冇辦法，中港穿梭畢竟累人。

另一個香港球評人何輝溶入祖國就來得更徹底，離開星加玻ESPN後，佢就移居廣州長駐珠江體育，仲娶左珠江台o既靚女主持人，落地生根。但早排響廣州見到佢同件高少女拍緊拖（真係好索架！），喁喁細語，幾鬼煙靭，可能響呢方面輝哥都配合中國國情，入鄉隨俗，艷福不淺。

評述員北上，多少仲有點老本可咬，職業球員要北上發展就難得多喇。早年香港甲組足球聯賽走下坡後，香港足總曾建議香港球隊加入中國超級聯賽尋找出路，奈何中國早已非港燦眼中果個窮親戚，當然睬你都有味！要打入中超，唔係靠英文好、識吹水就得，靠o既係球員自己實力。好彩，香港仲有個吳偉超！（見圖）呢個南華小將23歲時毅然孤身北上試腳，吃盡苦頭，終於成為中超班霸上海申花o既主力，並以連續o既入球來證明自己。

比起好多自以為係香港人上到大陸就應該高人一等o既港燦，吳偉超o既成功來得特別珍貴，特別值得尊重！

講波之王

講到足球，當然不能不提華人足球評述員中o既皇者 - 燈神黃興桂！

Peter Wong除左買大開細專畀山埃貼士之外，更厲害o既係佢o既「創意」！唔係講笑，有時撞正場波悶到飛起，好彩有皮蛋黃插科打諢，真係齋聽佢9噏都值回票價。


附上網上流傳《燈神語錄101條》。

1. 領先一“粒”
2. 波係圓，係用來踢既
3. o係今場波邊隊能夠入一“粒”先，果隊就會有優勢
4. 睇波呢家野，睇得波多咪睇到多d好波囉
5. 防守“生”波
6. 罰波
7. 好急勁既罰波
8. 呢個罰波係o係右路偏左既位置
9. 每隊波都要有個好既死球專家 <-----經典...
10. 每隊波都要入“燕梳”既第二球
11. 所以話，現代既足球每隊波一定要有一個罰波專家12. 現代既足球，係將皮球送入網窩裡面既
13. 現代足球講求有實力，有速度
14. 現代足球最緊要攻守兼備
15. 呢球波拉得咁行，唔係用腳背，係用腳既肉心呀
16. 射波最緊要射中個龍門
17. “浪射”
18. 當一隊波進攻既時候，另一隊就需要去防守
19. 十二碼呢家野呢，有兩個可能性，一係入，一係唔入
20. 呢球波一係入，一係龍門救到，一係出界
21. 呢球波，如果冇龍門就入喇
22. 呢球波射得恰到好處，唔太高，唔太矮，唔太勁又唔太遠，總之就入啦
23. 一個好既守門員可以令到場波由輸變和，由和變嬴
24. 哈哈，龍門最好既朋友係邊個呀？咪係龍門柱囉
25. 呢球波 keeper 有反應
26. xx龍門又再一次勇救險球
27. 幾時都話，後防好緊要，紐卡素就差係呢度〔利記對紐卡素重覆了大約十次〕
28. 防守球員犯左腦筋上既錯誤
29. 拿…做防守球員最緊要係咩呀？咪“安全第一囉”
30. 條防線包得無深度，裝越位失敗，咁咪失波咯
31. 個防守球員回波比龍門回得唔好，不過唔緊要，佢地好friend架，唔會鬧佢架
32. 做前鋒最緊要有力
33. 識轉身既前鋒好值錢
34. 後生、有身材、有活力 (唔係講緊女丫)
35. 當打、有態、有身材 (都唔係講緊女丫)
36. 呢位球員打法好經濟
37. 呢隊波好有性格
38. 睇下隊波肯唔肯打d藍領足球
39. 場波已經擺左落雪櫃
40. o拿，傑仔！呢 D 咪就係好波囉
41. 波唔使講架，球迷自己識睇
42. 呢場比賽我只可以用“一個字”黎形容---精采
43. 嘩！睇呢場波就興奮過食興奮劑
44. 球迷們有福喇
45. 球迷們，足球就是這樣的
46. 好波不妨一睇再睇<---正
47. 本死無大害
48. 在傷口上加鹽
49. 有時呢 D 野真係時也命也喇
50. 陰溝裏反船
51. 陰philosophy裏反船
52. 西班牙球會奧沙辛拿(Osasuna)=「奧沙桑拿」
53. 新特“能”
54. D 利物浦球迷唱緊佢地既會歌——你永遠唔會一個人行路
55. 呢場波利物浦唔理嬴幾多球，總之一定要嬴
56. 呢球波係咪真係紅軍既利物浦出界架？好似擦到藍軍球員既波襪架喎
57. 愛華頓呢隊波蔗渣o既價錢，但係踢出燒鵝o既味道
58. 巴路士，淨係識得一味去，冇諗過交俾身邊既隊友
59. 利物浦的巴路士同列斯的巴基.....兩個都係姓巴........（英文名呀大佬）
60. 伯明翰同埋保頓，兩隊波都係“Ｂ”字頭
61. 保方保方，保住後方
62. 保定保定，保住就定
63. 梅度梅度，梅開二度，跟住加多句“林伯特差Ｄ入多球，變埋梅度”
64. 近排加利仔狀態唔夠fit呀–第一佢跑得慢！第二佢唔夠快！！第三速度唔高！！！
65. 呢球波史高斯好有機會入波，但係無機會起腳
66. 希斯基，力的表現!
67. “O”雲仔
68. 呢球波“O”雲仔好巧妙咁編(騙)過對手﹗
69. “O”雲仔一心自己去，一定架啦......英倫三島的前鋒係唔會交波架......
70. 呢球波碧咸傳得好靚架，不過前面羅唔到咋嘛
71. 亨利：12碼都唔入，30碼又點會入呀
72. 柏金呢隻老馬就好似星期三晚夜馬隻駿先鋒咁，追極都追唔到呀！
73. 托度咁好波，D前鋒邊夠膽射佢呀
74. 哈素賓基個名咁長，個 Shoulder 冇返咁橫都印唔晒個名
75. 沙華治係中場殺手，唔係情場殺手
76. 睇下巴布爾幾大力呀，條頸幾粗呀
77. 佢既全名係冼拿馬‧邦高利，如果是旦叫冼拿馬或者邦高利就係唔岩既，你有無人叫歐陽做阿歐架？歐陽就歐陽，司徒就司徒架嘛，佢就係咁樣樣喇，冼拿馬邦高利冼拿馬‧邦高利，如果我今晚叫到你全名6次，我就請你食宵夜
78. Free.......dle (注︰要拉長尾音)
79. 呢場波可能係英倫三島兩個最佳左後衛既對決 --- (阿仙奴 vs列斯--艾殊利高爾 vs 夏迪)
80. 做唔成英雄，就做罪魁
81. 打波既野有時要睇「食送」食飯。
82. 單蹄馬
83. 球証巴巴先生
84. 唔會俾牌，英倫三島既球證唔會咁易俾牌.......真係比喎.....球證太過嚴
85. 藍色衫打得好過紅色衫
86. 今日藍色波襪踢得好過白色波襪
87. 利物浦對車仔：球場上一係藍衫，一係紅衫
88. xx 球員，今日生日啦.
89. 呢d波仲唔生日
90. 列斯領先2:1︰領先緊一球就梗係同你死守,守住個勝果紐卡素扳平2:2︰拿,呢個就係打死守既後果
91. 阿仙奴開波幾分鐘就入波，好打好多。（被追和後）我都話，太早入波未必好架......因為有大把時間比人追丫嘛
92. 無論o係邊個時刻邊個時辰，英超既每一隊波都會有表現既
93. 領隊谷隊谷得好“應”！
94. ESPN–“超級星期天”變“和和星期天”
95. 呢D老鬼，食鹽多過你食米
96. 入到禁區就係皇帝
97. 又快又怪，又帶個波出界
98. 大家都係巴西腳，所以知你想點去架啦
99. 奧尼爾開心到跳起，跳得高過NBA果個奧尼爾
100. 睇佐敦，有今生，冇來世
101. Lets go, rock and roll

再加送燈神updated新經典：

# 魯爾係一個好有觸覺既球員，當佢冇觸覺個時，真係冇曬觸覺；但當佢有觸覺個時，入波阻都阻唔住。
# It ain't over till it's over!
# 正如一個魔術師，玩到完晒喇！比人除晒衫喇！都能夠啊……喺頂帽度啊……抽隻……白兔出嚟架！你話係咪魔術師喇吓？...
# Captain Fabulous 神奇隊長謝拉特！
# 神奇！頂級！超卓！任你點樣去演譯啊......都係，妙絕，嘅......
# (高治打倒掛失敗) 哎呀! 唔倒掛鳩勾...金勾哩個高佬下!
# 我欣賞車路士後衞泰利，因佢頭槌好、制空力強、同埋跳得高。
# 車路士出番依個彼德……施治會好好多，畢竟古迪仙尼都只係比較靈活。嗱，你睇下依球手鎚呀？真係龍門生得矮啲都打唔到呀！施治呢，我相信佢打多車仔兩年既話……就會開始……甩頭髮架喇！你睇佢今年嘅頭髮都已經少過舊年架喇！
# AC米蘭呢隊波好多老人牌桂格燕麥片。
# 利物浦嘅球迷們，你們唔怕了！三比一嘅記錄呀，奇蹟出現嘞利物浦。你唔會呢自己一個人行路嘞利物浦！(2004-05歐聯分組賽利物浦主場對奧林比亞高斯)
# 足球係要將個波射入網。
# 射罰球，最緊要唔好射高同埋射斜。
# 唔駛問阿桂……即係唔駛問我啦！
# 炮竹一聲除舊歲，好波共你賀新春。
# 盃賽決賽：我希望呢場波有雙冠軍啦！
# Stevy G 謝拉特。
# 「柏智星」(韓國球員朴智星Park Ji-sung誤讀做)。
# 江忠德，依家下半場打了四十五分之一。
# (2007歐聯決賽 AC米蘭對利物浦) 呢場波利物浦有兩個機會可以贏波，第一係渺茫，第二係冇機會。
# (2007歐聯四強次回合利物浦對車路士)呢啲波球證呢可罰就唔罰，因為利物浦佔主場之利，人之常情啫。
# (2007歐聯四強次回合利物浦對車路士)麥包夾火腿
# 百步穿楊即係跑左一百步之後射入咁解。
# 呢班人擊鼓……唔係鳴怨呀嘛？(佢自己都笑埋...果度係有班人半場休息時間係度打鼓表演姐)
# 打波要有火，講波都要有火呀！
# 孫繼海喺曼城真係越踢越好，更加可以融入球隊打法…… (三分鐘後) 最近孫繼海狀態表現麻麻，有好幾次曼城由贏波變和波，同埋和波變輸波，都係因為佢同施文配合得唔好，有誤會……
# 依個就係澳洲無能教練，教得澳洲一定係無能教練！(2007年亞洲盃分組賽 泰國對澳洲 對澳洲教練Graham Arnold的評價)
# 依個就係唔識入波既攻擊球員喇！(2007年亞洲盃分組賽 泰國對澳洲 對澳洲十四號球員Brett Holman的評價)
# 澳洲隊個教練冇翻雲覆雨嘅能力。

神奇！頂級！超卓！