撥亂反正

繼熱刺鬧劇之後，另一家陷入危機嘅英超球會竟然係同城死敵阿仙奴！

聯賽踢左1/3，兵工廠已輸左五場，而且五場都係完敗！如果話阿仙奴仍然係奪標熱門，未免自欺欺人。

被候城反勝一役固然輸得肉酸，對熱刺大好形勢時，響補時連輸兩球被扳平，更加令元氣大傷。但要數兵工廠崩潰真相，相信要追溯到上季作客伯明翰城一仗。

溫格不愧為經濟學「教授」，數口好精，上季佢算到盡，將手上小兵潛能超額發揮，響聯賽早早發力，遙遙領先。但係，偏就算漏左伯明翰呢個大凶地。

該仗不但重創主力艾度亞度（Eduardo Da Silva），更嚴重嘅係暴露左隊長加拿斯（William Gallas圖左）性格上嘅缺陷。

原本，響阿仙奴陣中，無論資歷、球技、身價，31歲嘅法國老將加拿斯都算係名列前茅，處身一眾小兵群中，佢應該有足夠嘅威望領導群雄。

但係，加拿斯生性偏激（響車仔扭計鬧離隊時威脅會刻意擺老烏），行事我行我素（煲煙畀狗仔隊斷正），而且情緒容易波動（被逼和時坐地飲泣），絕非小將們的理想學習對像。

由於隊中確實並無大將，加上溫格有意攏絡加拿斯，所以一直隱忍至今。但到上週加拿斯主動向傳媒披露球隊內訌，終於令教授忍無可忍，怒斬加拿斯。

新隊長人選，正係眾望所歸嘅法比加斯（Francesc Fabregas圖右）。雖然法比仔只有21歲，但無論場內場外，佢都遠比大佢10年嘅加拿斯來得成熟。

阿仙奴鬧劇，又一次教訓大家：個人能力再高，都唔一定係好領袖。

戰意如紅

三年前，托定咸熱刺花左一千萬鎊買左一個保加利亞人，領隊約爾話：我地終於都擁有一個屬於我地嘅亨利（Thierry Henry）喇！

對呢句評語，費格遜爵士覺得十分中肯，於是，今年九月曼聯動用左超過三千萬鎊將佢羅致。

呢個人，名叫貝碧托夫（Dimitar Berbatov 圖）。

貝碧綽號「隱形戰機」，可以成場波都玩失蹤，但失驚無神會出現置你於死地。

一劍封喉，好瀟灑！問題是，輸波時佢仲玩信步閒庭就一定會成為眾矢之的，例如作客兵工廠呢場。

相信大部份有睇直播嘅觀眾，都只會記得貝碧「助攻」阿仙奴拿斯利輸左果球波。至於進攻，恕我眼拙，真係唔記得佢有乜貢獻？

同一比賽日，貝碧嘅舊拍檔羅比堅尼（Robbie Keane）終於響聯賽為利物浦開齋，連入兩球帶領紅軍升上英超榜首，領先曼聯8分之多，總算苦盡甘來。

開季前，好多人都話賓尼迪斯老襯，花二千萬買一個年紀偏老（28歲）、技術一般（相比起貝碧）嘅夕陽戰士返來做乜？

但堅尼與貝碧嘅最大分別不在技術，你睇堅尼無論響列斯、熱刺、利物浦都表現出永不言敗嘅鬥志，毫無保留地奔走。講到呢一點，貝碧托夫係永遠都比唔上堅尼！

所以話，性格決定命運，那怕有通天嘅才能，如果沒有「為勝利付出所有」的覺悟，一切也屬枉然。

否極泰來

主席利維（Daniel Levy)斧底抽薪,不但怒炒哥莫利,連教練拉莫斯都被連根拔起,歐陸總監制度正式宣報破產,熱刺鬧劇暫時告一斷落！

面對空前降班危機,利維選擇回歸基本,召用最傳統英式的領隊哈利列納（Harry Redknapp),並且給他管理的全權,可以話系又一個極端走到另一個極端.

但賽場上永遠是成績說了算,列納上任後,效果可謂立桿見影.由八場不勝到主場兩球完勝保頓,打開勝利之門兼且表現虎虎有威.

難得是作客死敵阿仙奴,能夠在落後兩球之下在補時逼平對手,更凸顯出將士用命的氣勢,同拉莫斯時期的士氣低沉相比,直有雲泥之別.

贏保頓,有人話系行運醫生醫病尾,撞棍而已,但逼平兵工廠就絕對是超凡的表現.論執教功力,列納仲未到一流,但在知人善任鼓舞士氣方面,他肯定勝任有余.

上季紐卡素曾力邀列納執教,但卻被一口回絕,關鍵在于紐記堅持要保留足球總監制.如今熱刺一擊即中,全靠利維當機立斷,變得夠徹低.

雖然熱刺在積分榜還是奠底,但照這勢頭,護級大有希望.反觀紐卡素想變不敢變,前景仍然令人擔心.

畢竟,山不轉路轉,困境雖難撐,肯變自然通.

不在其位

續談熱刺鬧劇。

上季同期，托定咸熱刺一樣處身水深火熱境地，結果以解顧領隊約爾作結。一年之後，球會重蹈覆轍，但球迷並未有苛責領隊拉莫斯，反而將矛頭直指足球總監哥莫利（Damien Comolli）。

哥莫利何許人也？

法國人哥莫利高大英俊，儀表不凡，擁有法律學位，能操法、英、西斑牙幾種語言。

球員時代效力法甲摩納哥隊，及後執教該會青年隊，最大成就係響阿仙奴領隊溫格手下做過七年球探，期間發掘過高路托尼（Kolo Toure）及基列治（Gael Clichy）等潛質新星。

由於熱刺一直以同城阿仙奴為假想敵，主席利維就響05年禮聘哥莫利過檔，並委以足球總監重任，企圖將兵工廠網羅歐陸新秀嘅策略響熱刺複製。

哥莫利利用自己嘅球探網絡，為熱刺大舉搜羅各地球星，代表作包括貝碧托夫（Dimitar Berbatov）及比爾（Gareth Bale）。

聽落成績唔錯，問題係佢同時仲買左大堆高價庸才，例如犯規王索高拿（Didier Zokora - £8.2m）， 冷板王保定（Kevin-Prince Boating - £5.4m），烏龍王卡普爾（Younes Kaboul - £8.2m）等，不能盡錄，耗費上億英鎊。

入錯貨最多係唔見錢，最大鑊係呢個足球總監嘅權力仲大過領隊，經典事件莫如收購戴倫賓特（Darren Bent - £16.5m）。

上季約爾講明欠一個中堅，哥莫利竟然出高價（其時查爾頓已降班等錢洗）買來賓特，令本已擁有三大前鋒（貝碧、堅尼、迪科爾）矛盾激化。結果，約爾被炒，迪科爾被賤賣，貝碧及堅尼蟬過別枝，而賓特就響後備席雪藏一年，可說一練七傷，無人幸免。

正所謂他朝君體也相同，拉莫斯最善長442雙前鋒戰術，但今季熱刺前鋒線走淨賓特一件。原本領隊想買輔鋒艾沙雲（Andrei Arshavin）以補不足，偏偏哥莫利貪平，買左同賓特同類型嘅柏夫列真高（Roman Palvlyuchenko），搞到而家只能打單箭頭，每仗皆北。正因為犯錯連連，哥莫利開始成為眾矢之的。

放眼球圈之外，其實哥莫利呢種人無處不在。佢地深得大老闆信任，對公司大小事務能管則管，不厭其煩。而且自覺多才多藝，喜歡以外行管內行，累誤戎機。

響古代，大家都尊稱呢種大哥為太監，去到現代，佢地仍活躍於大大小小機構高層，可以話係一個歷欠不衰嘅行業。

欲速不達

最近英超新聞除左超級大笑柄紐卡素之外，就數包尾大幡熱刺最富娛樂性。

自1912年以年，熱刺從未試過開季七場不勝咁兜痞，今季人強馬壯，竟然只得二和五負，令人大跌眼鏡。

托定咸熱刺一直被譽為英超第五強，論牌面逐隻秤，真係粒粒皆星國腳如雲，比之四大豪門一點都唔失禮。

經過荷蘭教頭約爾（Martin Jol）努力調教之後，熱刺已有力連續兩季（06、07）獲得聯賽第五名，隊中擁有半支英格蘭國家隊，加上英超最強前鋒組合（貝碧托夫 + 羅比堅尼），進軍歐聯的目標，似乎觸手可及。

主席利維（Daniel Levy）係非常成功o既生意人，善長營運及講價。響佢領導之下，熱刺年生意額高達一億三千萬鎊，純利超過三千萬，而且係英超少數無負責球會。

利維覺得萬事俱備，只欠名帥，上季毅然利誘西班牙領隊拉莫斯（Juande Ramos）加盟，並將約爾無情地踢走。拉莫斯亦確係好腳頭，走馬上任隨即奪得聯賽盃，風頭一時無兩。

為確保今季能順利打入四強，拉莫斯重金收購左克羅地亞中場核心摩迪（Modric）、「新碧咸」賓特利（Bentley圖）、巴西鋼門高美斯，加上來自巴塞o既杜斯山度士及原有班底o既贊拿斯、索高拿、比爾，熱刺中場o既技術含量大大提升。

大好形勢之下出閘脫腳，熱刺歸咎於貝碧托夫同羅比堅尼跳草裙舞（最後分別去左曼聯及利物浦），搞到佢地冇前鋒用。但聞戰鼓思良將，上季中又係邊個天才堅持要送走英格蘭國腳迪科爾（Jermaine Defoe）呢？今季作客樸次茅夫被倒戈o既迪科爾首開紀錄時，唔知拉莫斯有乜感受？

如果話前鋒危機係因為內部兵變的話，咁中場線崩潰就真係咎由自取。雖則話一朝天子一朝臣，但拉莫斯偏重技術流球員，除左購入上述新仔之外，佢仲大手清除約爾留低o既珍貴「遺產」。占邦達、馬白蘭基、泰尼奧、羅賓遜等沙場戰將被集體拋售，拉莫斯希望一步到位，複製另一支技術細膩o既西維爾。

上手遺臣雖然未算頂班，但總算組成左一套行之有效o既作戰體系。拉莫斯急於求成，令熱刺充斥大量技術一流但欠缺英超經驗o既球員，加上磨合需時，所以呢支攻守失衡o既新軍，被英超中下游對手衝擊得潰不成軍。

所謂新官上任三把火，好多新領導都對舊人睇唔順眼，必欲盡去之而後快。問題是轉變需時，新人事未必即時見功，舊電池也有發光發熱之時。若不量才而用，僅以黨同伐異一刀切劃清界線，所冒風險實在太大。

熱刺經過幾年刻苦經營造就o既好形勢，會唔會因為一個錯誤決定而土崩瓦解呢？

小家碧玉

週中歐聯分組賽場上，英超四雄強勢依舊，兩勝兩和，但重回國內聯賽，就必需面對現實打爛仔交。

利物浦主場對升班馬史篤城，計正贏少過兩球都可以當輸，估唔到係一對光蛋，悶和！

領隊賓尼迪斯對開賽初段謝拉特嘅詐糊耿耿於懷，加上全場廿次角球及無數次射門都徒勞無功，難怪佢氣頂，但紅軍球員谷唔起係不爭嘅事實。

賓帥係「輪換之王」，今季雖已有改善，但馬斯查蘭奴及巴布兩員虎將仍被收起，面對史篤城嘅死守，猶如老鼠拉龜。上週力擒曼聯時，仲以為利物浦終於有力問鼎英超，點知一個星期唔到就打回原形。

講到尾，賓尼迪斯嘅哲學係靠效率、紀率，加上球星嘅個人能力爆發。但係出死力壓制對手只能偶一為之，旨意個別球員靈光一閃就更唔可靠，聯賽流流長，咁踢法實在太易失分。

季初買唔成巴利，賓帥又怨球會唔肯投資，買唔到好球員，但係利記以經連續幾季四、五千萬鎊咁掟錢買人，咁係代表本身個班底太廢，定係領隊連續幾季都買錯人呢？

愚見係利記唔係冇洗錢，而係洗得好戇居。賓尼迪斯鍾意向中下游球隊出手「執筍野」，即係果D可能有潛質嘅中下價貨。例如賓納、高治、施素高、艾比路亞、奧拿里奧、杜辛拿之流。逐件計唔算貴，大約五至八百萬鎊，但加起來都用左幾千。

呢種球員雖未至於係濫竽充數，但就絕對唔係可以脫胎換骨嘅星級球員。睇返隊中真係叫有卡士嘅星，由托里斯、堅尼、巴布到阿朗素，邊件唔係過千萬鎊買返來呢？

先別說自給自足嘅阿仙奴，就算以往嘅「冤大頭」車路士，都比利記花得精明。雖然油王老細係大把，但史高拉利一上任就斬左賓希姆、保拉路斯、胡禮菲、薛維爾、舒夫真高等人，精簡人手，再重金補入保辛華及迪高兩人，針對性地解決左右閘及中場中嘅桎梏。人雖然係貴，但勝在有保證。

國內同胞講做事要「大氣」，手面闊除左要有銀彈支持，都好講「氣質」嘅。相比費蛇一擲千金面不改容，賓帥實在太鍾意計婆仔數。到佢響籮底執到隻靚橙出來，可能已經係二十年之後嘅事......

經濟危機

有人漏夜趕科場，阿聯酋油王君臨曼城，加劇左英超貧富懸殊局面。

同屬「中產階級」o既韋斯咸同紐卡素，分別傳出易帥消息，而且原因不約而同為「與球會高層產生嚴重分歧」。

個「分歧」係乜，就係錢囉！

首先下馬o既古比士利（Alan Curbishly）之下台，據韋斯咸官方答案講係「領隊為轉會事務失當而請辭」。

的而且確，古帥上季買入o既龍格堡、戴亞、比拿美可以講係「不能再差的收購」，領隊下台有理。但古帥前季助球隊奇蹟地護級成功，足可功過相抵，點解要響開咧第三週就手起刀落呢？

更加混亂o既係紐卡素，領隊基瑾（Kevin Keegan）實際上已經停職，但班主話冇炒過佢，基瑾又話自己冇請辭，好一出《羅生門》！對比起上季賓主相見歡o既情況，實在太過科幻。

兩間球會面對o既相同之處就係：閂水喉！

韋斯咸個冰島富豪班主，由上場後豪擲五千萬鎊招兵買馬，到今季大舉裁員錄得轉會盈利，關鍵在於祖家o既大水喉冰島銀行受環球金融危機影響，收入大跌，被迫開源節流。

同時，紐卡素o既運動用品大亨艾殊利（Mike Ashley）都係因為公司業績大倒退，惟有對增兵勒住勒住，減輕皮費。

本來，同老細共渡時艱，天經地義。偏偏呢兩位老細都選擇左相同o既應變手段 — 另請高明制肘主帥。

因此，古比士利身邊多左個體育總監拿尼（Nani），幫佢送走左主力球員費定南同埋麥卡尼。

而基瑾上面都請多左個韋斯（Wise）做行政總裁，越過領隊直接買賣球員，務求開源節流。

撞正兩位都係老派英式主帥，習慣人事戰術一把抓，自然激到生蝦咁跳。

所謂疑人莫用，用人莫疑，兩位班主o既節流手段太激進，搞到領隊響轉會事務上形同架空。就等如酒樓大廚，連買乜材料都無權置啄，又點會煮得出好菜呢？

大勢所趨之下，除左超重量級主帥如費蛇、溫格之流，英超眾領隊都面對前所未有壓力。

既要有成績、又要踢得漂亮、仲要響轉會市場交足功課？

人無完人，相信往後下台o既英超領隊有排都數唔晒......

決戰前夕

終於等到08球季最後一戰！

德國對西班牙，絕對唔係熱門嘅決賽戲碼。

一如以往，德國響分組賽踢得一榻糊塗，入到淘汰賽又脫胎換骨，過關斬將殺入決賽，經常發揮超水準，難怪係賽前最大熱門。

過往西軍號稱「外圍賽之王」，而且入到大賽分組都會斬瓜切菜段挺進次圈。但一入淘汰賽就即時走樣，曳兵棄甲。

今屆西班牙能夠一反常態，開局順利，而且越踢越有，與領隊阿拉干尼斯有直接關系。

過往西班牙空有巨星如雲，但內耗嚴重。由於歷史因素，象徵獨裁政府佛朗哥將軍嘅首都一哥皇家馬德里，同代表反政府勢力嘅加泰隆球會巴塞羅拿，一直關系都勢成水火。無論國家隊由皇馬系或巴塞系人掌權，隊內都出現壁壘分明的對抗。內爭不休，又談何團結一致槍口對外爭錦標呢？

然而，現任領隊阿拉干尼斯顯然是個異類，從球員時代到執教生涯，佢都係馬德里體育會嘅不貳之臣。既不屬皇馬，也跟巴塞沾不上邊，正好能中和隊中嘅對抗性。

結果，強如巴塞也只得佩奧、沙維及恩尼斯達入圍，聯賽冠軍皇馬更加只有門將卡斯拿斯及右閘拉莫斯入選。而本季狀態巔峰嘅皇馬隊長魯爾更被無情地放棄，阿拉公公可說盡地一煲。

相比之下，佢更加倚重護級隊華倫西亞（大偉韋拿、大偉施華及馬真拿）與英超兵團（法比加斯、阿朗素、雷拿、艾比路亞都入選大軍）。佢甚至為左安插法比加斯入正選而強行加插與沙維組成雙指揮塔怪陣，結果飽受評擊。

阿拉公公好偏心，但又好鐵腕。當年佢為左鼓勵雷耶斯話左亨利一句「死黑鬼」弄出軒然大波，搞到差D要落台，今年見雷耶斯響馬體會冇表現就即刻叮佢走。甚至連佢響馬體會由細睇到大嘅契仔托里斯都冇情講，國家盃場場都被換出。

結果，西班牙竟然達至前所未有般團結，除左兩炒俄羅斯光芒四射外，肴低意大利及瑞典兩場苦戰，更加顯出呢班後生仔嘅成熟一面。

所以，德國雖然仍係奪標呼聲最高嘅大賽球隊，但我仍然希望呢隊西班牙隊能夠打破宿命，威返一次！

英倫國殤

英格蘭隊終在峰迴路轉嘅情形之下出局，正式與08年嘅歐洲國家盃緣盡。

鞭撻大反派領隊麥卡倫嘅文章如山似海，對其戰術、用人、應變能力，都狠批得體無完膚，詳情不贅。

此時再加一腳抽抽水，已經全無意義。倒不如睇睇英格蘭足球究竟出左乜野事？

球員名過於實：論知名度，碧咸、朗尼、謝拉特、林柏特個個都響噹噹，絕對係家傳戶曉嘅名字。但係點解會唔夠克羅地亞砌呢？

球星名氣響，得力於英超嘅影響力，若論真功夫，英格蘭眾星嘅個人技術同一個巴西二流球員冇乜分別。加上英格蘭絕少有球員出外搵食，形成球風更單一化，遇上技術優秀嘅外援軍團克羅地亞，唔死就奇。

（ps. 英格蘭響世界盃外圍賽又抽中左克羅地亞，真係冤家路窄呢。）

本土帥材凋零：曾經名帥輩出嘅英格蘭，已經淪落到無人可選嘅地步，英超發展越蓬勃，本土領隊就越少空間。

英超成立十多年來，從來未有英藉領隊奪標，而對上一個響四大豪門執教嘅，已經係1998年離任嘅伊雲斯（Roy Evans）。反而，英超嘅雄厚財力成為左培植法國、西班牙、蘇格蘭、葡萄牙名帥逐鹿之地。

相比而言，麥卡倫雖然水皮，但佢已經係係英藉領隊中少有嘅好選擇。

青訓斷層湧現：英格蘭球員個人技術曳，已經唔係秘密。但以往英軍踢嘅所謂「血性足球」，高Q大棍，的確唔多需要技術。偏偏近年四大豪門都重用洋帥，大打歐陸足球，形成本土球員陷入兩頭唔到岸狀況。

而且，英超球隊過於急功近利，傾向買入外來嘅半成品加工（以阿仙奴為表表者），削弱左本土新秀嘅上位機會，令潛質新人只能廁身中下游球隊，大踢粗枝大葉嘅衝撞足球。

兼且，英足總原來想仿傚法國克萊楓丹學校(Clairefontaine)（曾培養亨利、安歷卡、查斯古特）建立國家足球中心，後來為重建溫布萊球場將預算耗盡，令國家級青訓計劃停頓。而家惡果浮現，只怪當初太過短視。

心理壓力太大：英格蘭一直以足球大國自詡，國內傳媒對國家隊成員死咬唔放，所以英軍領隊有「英國第二號人物」（僅次於首相）嘅稱謂。

球員若能榮登英國國腳，往往代表住以萬鎊計週薪及豐厚廣告合約。結果，未夠班嘅死往上爬（如賓特利David Bentley事件），上左位嘅，又怕犯錯驚失去席位，踢起來縛手縛腳。

結果，響名利壓力之下，英格蘭隊每每陷入「越強越強，越弱變弱」嘅怪圈。

講到尾，以巴域克（Brian Barwick圖）為首嘅英格蘭足總高層當然難辭其咎，傲慢、保守、僵化、官僚嘅作風，令國家隊發展停滯不前。如果呢班老X忽唔洗心革面，相信英軍只會繼續沉淪落去。

身後之名

英超嘅被炒三人組中，摩連奴嘅繼任人格蘭被喻為面對「不可能的任務」。

既要保持摩帥時代所向披靡嘅戰積，又要贏得精彩有娛樂性，仲要照顧油王佢老人家班同鄉，實在冇乜可能。

新來嘅荷蘭助教唐卡迪（Ten Cate），仲話車仔會以現有班底，踢出「巴塞式」嘅全攻型足球（佢係前巴塞助教），奪取各大錦標，油王一定覺得好啱聽。

問題是：得咩？

結果，車自從作客反勝華西一戰之後，長勝至今。本週大炒以防守堅強著稱嘅曼城6:0，更加證明車仔改踢進攻足球嘅決心。

贏波後，油王見牙唔見眼，似乎笑緊摩連奴：邊個話冇你唔掂呀？邊個話踢攻擊足球唔掂呀？

保頓由前西布朗領隊麥臣（Gary Megson）接任，保頓球迷就唔多領情，覺得佢唔夠班，未必可以令球隊護級成功。咁老實講，麥臣的確從未帶領任何一支英超球隊成功護級，難怪球迷咁悲觀。

至於熱刺，情況就好唔同。

雖然被炒嘅約爾廣受熱刺球迷歡迎，但佢嘅繼任人來頭更大，名氣更響。

西維爾領隊拉莫斯（Juande Ramos見圖）嘅履歷啪啪聲，國王盃、西甲超級盃、歐洲超霸盃，更重嘅係連續兩屆歐協盃霸主，成績之彪炳令人聯想到波圖時代嘅摩連奴，或者華西時代嘅賓尼迪斯。

而且，拉莫斯帶令一批二線球員（如熱刺棄將簡路迪、巴塞棄將沙維奧拿），發光發熱。途中更不斷賣出優質主力（如雷耶斯、巴迪斯達、沙治奧拉莫斯等）套現，仍無損球隊實力，可見其功力深厚。

就算要比約爾最自豪嘅攻擊足球，都一樣比唔上拉莫斯麾下嘅西維爾，上屆歐協四強戰，熱刺正正係畀西維爾K.O.。強如巴塞、皇馬都對佢地嘅攻勢足球聞風喪膽，令拉莫斯成為新一代領隊中嘅典範。

熱刺班主覺得球會萬事俱在，就欠一個頂級領隊，所以對拉莫斯垂涎已久。問題是斟介過程畀狗仔隊斷正，令約爾提早變成行屍走肉（Dead man walking），直接陷球隊於護級漩渦，手法實在太唔漂亮。

原本，拉莫斯嘅責任係打入英超前四，而家就變成護級大戰，實非始料所及。何況，眼見領導層對上手領隊之反面無情，恐防他朝君體也相同。

如果唔係傳說中嘅四百萬鎊年薪，相信拉莫斯係唔敢冒呢個險嘅，可見有錢洗得鬼推磨，實在不假。

死不瞑目

英超領隊「搏炒榜」上，摩連奴爆冷跑出。但結果榜首雙雄 - 保頓李森美同熱刺約爾（圖）都響一週之內「順利」下馬。

李森美自上季尾突然接任後，就一直冇人睇好過，加上成績糟糕，炒得順理成章。同是係由助教升正，約爾就走得更難堪。

以熱刺一嬲「穩佔」英超7至10名嘅實力，約爾執教嘅兩個full season都名列第五，僅次於四大班霸，不可謂無功。

而且，熱刺在約爾麾下，輕常能踢出流暢悅目嘅攻勢足球，連崇尚進攻嘅熱刺球迷都滿意收貨，此為其第二功績。

加上呢幾季，熱刺組軍出色。收購貝碧托夫、比爾、多遜、連儂等既年輕又出色嘅球員，都令人對熱刺前程產生無限憧憬。

約爾之死，原因有三：

一、班主急功近利 - 連續兩季熱刺爭取歐聯席位都失諸交臂，今季眼見穩守第四嘅阿仙奴隨著主將出走實力大減，熱刺主席利維（Daniel Levy）豪擲5000萬鎊，企圖一舉攻入前四名。問題是熱刺始終欠缺豪門底蘊，不但開季連敗，更被脫胎換骨嘅兵工廠作客大炒，難怪主席會遷怒領隊約爾。

二、領隊口不擇言 - 由於上兩季都超標完成，約爾就好似大部份荷蘭同胞一樣咁直腸直肚，開始語無論次。佢會直踩董事局自吹自擂要求加薪，更自誇外面有大把球隊等住請佢過檔。同時，佢又講明以熱刺現在班底而論，聯賽第五已是極限，要打入四強必須再大幅增兵先有得傾。最唔啱聽果句都講埋，老細點會唔搵佢祭旗。

三、人事角力敗陣 - 約爾之能上位，全靠有體育總監晏歷臣撐腰，結果篡位成功，有得坐正。但隨著晏歷臣去左車仔高就，約爾與新總監哥莫利（Damien Comolli）話不投機，受到處處制肘。致有要求買中堅，球會竟然用天價買左載倫賓特返來坐冷板，導致熱刺季初後防不穩嘅困境。

英超領隊響更衣室可以呼風喚雨，好容易令人忘記 - 其實佢只係一個打工仔。

唔識審時度勢，又唔曉韜光養晦，更唔識同高層打好交道，約爾只不過係楊修嘅翻版。

一時瑜亮

本週冇聯賽，睇左一場太公波，英格蘭主場強壓弱隊愛沙尼亞，結果仍然係3:0，無驚無險，但未到終點。

場波就冇乜睇頭，但焦點人物並非場上打生打死果堆，而係場邊坐冷板果個林柏特（圖），因為今次係四年來首次林伯被貶為後備。

最終佢都有得踢，但落場時竟引來主場球迷一片噓聲，實在尷尬萬分。

好多球評家都話唔明點解英國球迷唔鍾意佢，話晒都係英超最頂級中場球星，難得佢又願意為國效力，點解會遭逢此辱？

有人話係「車仔效應」，唔喜歡車路士財大氣粗嘅人，噓林伯洩憤，但點解又唔見車仔隊長泰利畀人柴台呢？歸根究底，主要係因為逢親林伯落場，英格蘭一定踢得唔好！

論球技，林伯係班霸車仔嘅中場發電機，球技毋庸置疑。但兩年來響國家隊未有佳作，開始有人話佢係「球會級球員」。

講到尾，林伯不受歡迎，罪不在己，在於同場仲有一個謝拉特！兩人同屬英超班霸嘅中場指揮官，不論年齡、踢法、位置，都與林伯十分接近，但謝仔係「大賽球員」，踢太公波時特別醒神。

以國家隊教練「將名氣最大嘅球員放晒落場」嘅鐵則，謝老四及林伯被迫「合作」左幾年。更大鑊嘅係領隊麥卡倫傾向以林伯為主、謝拉特為副嘅弱智擺法。結果，兩人走位重疊、隊友群龍無首、林伯浪射頻頻、謝仔疲於奔命......

林伯受傷後，替代嘅巴利與謝仔夾得出奇地好，只因巴利願意為謝拉特做擦鞋仔，等謝仔放心進攻。林伯並非球技不濟做唔到，只係響車仔做慣大哥，唔願意幫人做下手。

所以，林伯之犯眾憎，係因為太講面子，拖累大局，難怪球迷唔畀面佢。

雖然「以謝為主」嘅戰術既定，但英格蘭嘅問題又點呢一個。朗尼同奧雲、費定南及泰利兩對，都好有撈亂骨頭feel，領隊麥卡倫如果唔夠果斷，下下要顧住班大哥嘅面子，再輸波就隨時炒魷，冇得留低。

梟雄落難

車仔就仲未知能否重奪英超桂冠，但話口未完，領隊摩連奴就首先帥位不保，果然係「一語成箴」......

就算係摩連奴嘅敵人，都不得不承認佢嘅能力。三年英超生涯奪兩超聯、兩聯賽盃、一個足總盃，實在前無古人。

佢囂張、口臭、狂妄、自戀，但佢吋得起，亦冇人會介意。要數遺憾，相信就係車仔太過功利嘅踢法，同埋未曾染指嘅歐聯錦標。

偏偏，呢兩件就係油王最希望得到嘅野，亦成為賓主決裂嘅導火線。

風暴嘅核心 - 舒夫真高，坐擁英超最高轉會紀錄（三千萬鎊！）及十三萬磅週薪，但場上表現卻叫人不敢恭維。礙於老舒係油王老板嘅死黨，摩帥勉強重用，情形有D似港產片老細鍾意安插情婦做女主角力捧。

奈何名帥都回天乏力，責任卻盡在領隊身上，難怪摩連奴極之唔順超。

加上響車仔，左有行政總簡朗，右有球隊總監晏歷臣，分去左摩帥嘅行政及購買球員權力。今年仲新增一個技術顧問格蘭，擺明插手教波事務。

摩連奴心高氣傲，點會甘心被老細擺佈？

好多領隊羨慕摩連奴有無限金錢，可以組建世界明星隊，卻不知摩連奴嘅對頭費格遜及溫格先至令佢妒忌不已。

費格遜響曼聯有無上權威，一呼百應；溫格響兵工廠對財政、人事、營業事務都「一把抓」，說一不二，絕非飽受制肘嘅摩帥可比。

盛傳上季皇馬同國米都嘗試重金禮聘，但都不得要領，相信係因為兩會會長都有一舖「手指指」癮，鍾意插手球隊事務。摩帥正因前車之鑑，肯定會搵返間對佢絕對信任嘅新東家。

油王以為金錢無所不能，卻不知金錢只能買到多D選擇，但你揀人時人揀你。無足夠嘅尊重，真正嘅人才係唔會屈就嘅。

漂亮足球

（續）世界上，經營有道及目光如炬嘅領隊都有唔少，但同時能兼顧比賽風格嘅就有如鳳毛麟角。

有別於傳統紅褲子出身嘅教頭，溫格開創智慧型「儒帥」嘅先河。

球員時代嘅溫格成就乏善可陳，但佢將勤補絀，靠滿腹經綸彌補威望上嘅不足，加上實戰佳積，逐步攀上頂級領隊行列。

後來者還有候利亞（Gerald Houllier）、賓尼迪斯（Rafa Benitez)及摩連奴（José Mourinho)。佢地用科學分析加上專業化管理來提升球隊戰積都學到足，問題是作戰風格都偏向保守功利，與溫格嘅足球哲學大相徑庭。

溫格對「漂亮足球」（The Beautiful Game）嘅追求，有著宗教般嘅虔誠。要贏，仲要贏得好好睇睇！

在佢指揮之下嘅兵工廠，揉合左巴西嘅靈巧、德意志嘅機動、荷蘭嘅創意、法蘭西嘅細膩、英格蘭嘅勇氣。為左貫徹呢個信念，佢夠膽同時排出四個「10號」型球員嘅中場線（路斯基、希比、法比加斯、丹尼遜）。

前中後場球員，無一不具備超卓個人技術，每個組織都絲絲入扣。而且溫格鼓勵球員張揚性格，攻勢猶如水銀瀉地，阿仙奴被公認為全歐洲踢法最悅目嘅球隊，絕對實至名歸。

然而，溫格對「追求完美」過份沉迷，令球隊攻強守弱，戰積起伏好大。佢嘅慳家兵團由2002年成形，到2004年不敗奪冠達至巔峰，之後開始進入四大皆空時代。

但溫格不愧為智慧型領隊，明知場面上好睇還好睇，球會始終要交數。今屆大膽賣走亨利、龍格堡、雷耶斯等大牌球員，重用冇乜名氣嘅小將，踢起來反而虎虎有威。

能夠量才而用，靈活變通，精打細算，但又能兼顧場面。溫格執教「窮鬼」豪門阿仙奴嘅經歷，絕對係中小企成功個案中嘅典範！

脫胎換骨

（續）溫格另一絕活就係改造球員。

佢相信每個球員都有巨大潛能，通過科學化嘅訓練、克制嘅食療、大膽嘅嘗試，可以將球員隱藏嘅才能完全爆發。

最佳傑作莫如亨利（Thierry Henry 圖）。

加盟阿仙奴之前，亨利頂多只係一個跑得幾快但技術粗糙嘅左翼，每季只入球兩、三粒波。當溫格表明要佢改踢正中鋒時，亨利尷尬地表示：「波士，我其實唔係好識入波...」

基於其翼鋒背景，亨利擁有普通中鋒欠缺嘅超卓盤扭及助攻技術，加上良師柏金點撥開竅之後，佢嘅入球開始源源不絕。

事實證明溫格獨具慧眼，亨利不但識入波，仲係出一個能傳能射能助攻，平均每季入三十球以上嘅超級射手！

另外，將防守中場羅倫改造成右閘、攻擊中場托尼改成中堅、左中場雲佩斯變成中鋒...都係溫格領隊嘅得意傑作。

最新實驗品係英格蘭新星禾確特（Theo Walcott），雖然佢被譽為「新亨利」，但領隊又要佢轉型為翼鋒，暫時睇落就效果麻麻。

但呢條o靚仔只有19歲，響溫格嘅魔法之下，可能好快會一飛沖天。
（待續）

小本經營

擾攘多時，阿仙奴領隊溫格（Arsène Wenger 圖）終於續約至2011年，粉碎左兵工廠主帥離隊、球員星散嘅流言。

點解溫格續約會成為歐洲球壇大新聞？因為佢係當今世上最搶手嘅領隊囉！

響呢個急功近利嘅時代，就算金牌領隊卡比路幫皇馬重奪西甲都要食無情雞...歐聯冠軍領隊安察洛堤上任A米之後，被炒傳聞從未停過...

響競爭更激烈嘅英超，連德高望重嘅曼聯費格遜都好幾次險被開除...

唯獨溫格領隊響阿仙奴地位穩如泰山，兵工廠董事局甚至送佢一塊「免炒金牌」，承諾佢份工可以做足一世（如果佢自己願意的話）。

如果溫格領隊願意轉工，相信最少會有不少於二十支頂級勁旅如皇馬、巴塞、米蘭、車仔等...會不惜天價重金禮聘佢過檔。

究竟佢又有何德何能？

佢嘅第一強項就係「精打細算」！

溫格生於法國小城斯特拉斯堡（鄰近德國邊境），除左擁有法國人崇尚浪漫嘅性格之外，更帶有德國人嘅嚴謹精明。佢通曉英、法、意、西、葡、德語，加上佢擁有經濟學碩士學位，故得到「教授」（The Professor）雅號。

佢覺得英倫三島球員技術粗糙但身價偏高，所以特別喜歡價廉質優嘅歐陸外援。加上阿仙奴財力緊絀，溫格唯有專挑有潛質但寂寂無聞嘅新人，來彌補資源嘅不足。

溫格嘅眼力之強，冠絕歐洲。例如1997年以50萬鎊買入安歷卡，兩年後以2250萬鎊轉售皇馬，已是經典。其他如韋拉、奧華馬斯、柏堤等都屬低買高賣，而當今陣中嘅皇牌球員法比加斯、高路托尼等竟然係免費嘅！

今屆英超各大球隊都大幅增兵，不但曼聯、利物浦等豪門揮金如土，就算中型班如熱刺、維拉、韋斯咸等都起碼燒幾千萬買人。惟獨阿仙奴反其道而行，甚至沽出高價球星，帳面更出現盈餘。現在，一隊中只有禾確特、加拿斯身價過千萬，整支正選陣容加埋都平過朗尼一人嘅身價。

但慳儉之下嘅效果一點都唔失禮，兵工廠至今仍能與實力大增嘅利物浦並列聯賽榜首，溫格調教球員嘅功力實在深厚！
（待續）

創意工業

英國佬話：想發達呀？一係去唱歌，一係去踢波！娛樂事業講創意靠包裝，原來足球事業都一樣。

風靡全球嘅英超聯，唔單止係足球界革命嘅商業操作，更加係「大危機變成大商機」嘅最經典個案。

你咪睇英超而家風光無限，佢成立之前的英甲簡直係頻臨絕境。由於85年希素球場慘劇（Heysel Stadium Disaster）及89年希斯堡球場慘劇（Hillsborough Disaster）導致過百球迷喪生，英格蘭球隊在歐洲被無限期禁賽。失去歐戰收入嘅同時，英國政府又勒令各球會必需徹底改建球場達致安全規格。當時大部份球場都只有簡陋嘅企位，要全部改成坐位起碼都要洗幾千萬鎊。大球會固然無力發展，細球會又頻臨破產，簡直係屋漏兼逢連夜雨，情況十分絕望。

無巧不成書，時值新聞集團主席梅鐸（Rupert Murdoch）創立收費電視天空頻道（SKY TV），由於缺乏重頭節目，訂戶反應極差。該台每天虧損以百萬鎊計，情況與當時嘅英國球會不相伯仲。後來梅鐸眼見英國人民對足球賽事嘅熱情，令佢靈機一觸，想到豪賭最後一鋪 - 從免費電視台手上奪取頂級聯賽嘅播映權！

於是，佢開始慫恿以曼聯、阿仙奴、熱刺、利物浦等大球會牽頭組成委員會，爭取脫離英足總管理，自組英格蘭超級聯賽，改變左原本球會同電視台個別議價獲取微薄轉播費嘅狀況，轉而由英超聯會代表所有英甲球隊統一招標爭取最大利益。結果，早有默契嘅天空頻道以數億鎊天價購下英超獨家播映權。從此，免費足球直播成為絕唱，而天空頻道有左英超呢個皇牌節目，上客量暴升，終於響一年之內從破產邊沿轉虧為盈，成為全歐洲收費頻道中嘅龍頭。

英超成立之後，形成一個「巨額轉播費幫助英格蘭球隊安然渡過難關，仲有餘力將球場重建 > 新球場座位大增，設施煥然一新 > 現場氣氛熱烈，觀眾入場率及直播收視率上升 > 球會收入大增，有盈餘收購世界級球星 > 結果帶動轉播費不斷攀升」嘅良性循環。時至今日，英超已經壓倒意甲、西甲成為世界第一聯賽，亦都係世界各地聯賽參考嘅楷模。

英超嘅成功，集齊天時地利人和嘅因素。如果冇梅鐸當年嘅靈光一閃，歷史可能會改寫，但更重要嘅係，英國人面對逆境時果種堅毅不拔，加上在規劃、包裝、經營的才能，令英國足球浴火重生。

香港政府成日話要攪創意工業，但多年來只係識得整埋晒D「乜乜港、物物港」，又或者響大學狂開課程訓練設計師、程式員。我建議班高官睇多啲英超，攪清楚乜野先至係「創意工業」。

奪冠保證

2006年初夏時，在意甲積分榜上，國際米蘭又已被祖雲達斯及AC米蘭遠遠甩開，自1989年以來未嘗奪標o既國米，又一次提早畢業。國際o既超級富豪會長格洛堤（Sergio Cragnotti）為左重溫意甲舊夢，十年來都掏出上億現金買球星，但結果都係食白果。呢次佢真係忍無可忍，要同佢個契仔領隊文仙尼（Roberto Mancini）講：「文仔，為左冠軍，我再冇選擇，只能夠搵卡比路。」卡比路何許人也？一個意大利藉o既老牌教頭囉。但佢有一項世上獨一無二o既紀錄 - 無論執教任何球隊，都必定能夠響第一季就奪得聯賽冠軍！最後，因為意甲爆出假波醜聞，祖雲達斯降班，卡比路著左草去皇家馬德里，文仙尼先可以留響國米。但卡比路o既不敗神話，響西斑牙延續落去......

卡比路（Fabio Capello）執教生涯始於米蘭青年隊。九十年代初期，佢按掌AC米蘭後，不但即時奪冠，仲係罕有o既意甲三連霸。1996年皇馬被巴塞羅拿「夢之隊」壓得抬唔起頭時，卡比路應邀赴任，並即時壓倒巴塞奪得西甲冠軍。之後佢輾轉回歸意甲，竟然同樣響執教o既第一個full season就令弱旅羅馬封王！然後，卡比路令人意外地跳槽祖雲達斯，效力兩季再拿下兩個意甲冠軍。直至舊年，卡比路轉戰西甲，再次帶領皇馬壓服橫掃歐洲o既巴塞夢幻二隊。

卡比路的必勝之道，在於：

1. 敢於用人 - 請得起卡比路o既老闆都係超級巨富，佢亦唔會幫老細慳住洗，從A米年代天價買入波班、沙維斯域，到皇馬時o既沙維斯域、羅拔圖卡路士，再到羅馬o既巴迪斯圖達及中田英壽......卡帥買人從不手軟，只要o岩用，幾多都畀！套句國內同胞o既話：「大氣啊！」同時，卡比路又好夠膽用新人，A米時o既彭路基、皇馬o既魯爾、羅馬o既迪羅斯都經佢一手提拔而扶瑤直上，用人唯才係佢o既不變原則。

2. 鐵面無私 - 年輕時卡比路係一個以硬朗見稱o既防守中場，佢仲將鐵血原則帶到球隊更衣室，紀律永遠行先，天王都冇情講。例如上季佢響皇馬時，世界足球先生朗拿度都要入雪柜；情同父子o既卡辛奴都冇情講；甚至十年前佢親手帶到皇馬o既門生卡路士都冇得留低...其他球員更加不敢做次。所以，卡帥治下，軍令如山，學吳孟達話齋：「而家唔係踢波，係打仗呀！」

3. 必勝信念 - 卡比路擁有永不言敗o既精神，有時甚至知其不可為而為之，對佢手下有強大o既感染力。上季一度遭逢西甲三連敗，積分被巴塞及西維爾遠遠甩開，但卡比路仍堅信自己金漆招牌，並在多場賽事中逆轉反勝。加上知人善任，在其手下重獲新生的球員如簡拿華路、魯爾、古迪等，都對領隊能力深信不疑，結果皇馬奇蹟地後上壓倒巴塞及西維爾奪標。

不幸o既係，皇馬重蹈覆轍，再次響主帥奪標後就殺功臣炒教頭。觀乎新帥蘇斯達每戰皆北o既狀況，皇馬而家應該十分後悔。好有興趣知道卡比路仲會唔會再出山呢？下次又會將奇蹟帶到邊支球隊呢？

自由後衛

年輕一代球迷可能未必知乜野叫「清道伕」呢個old school名詞。

「清道伕」（sweeper）又稱「自由人」，響上世紀七、八十年代十分盛行。由荷蘭飛人（The Flying Dutchman）開創全攻全守o既「全能足球」（Total Football）開始，足球戰術產生左革命性o既變化。為左對抗荷蘭人，「清道伕」踢法應運而生，由德國史上最偉大球員碧根鮑華（ Franz Beckenbauer）發明，在整隊全攻全守之餘，再加多一個自由後衛。

佢冇固定o既站位，防守時會響中堅之後包抄，又會引球出擊，成為轉守為攻o既樞鈕。所以，自由人需要具有超卓o既大局觀，瞻前顧後o既視野，以及跑唔完o既氣力。「凱撒大帝」（The Kaiser）踢攻擊中場出身，但到佢事業最高峰o既1974年西德世界盃時，已經完全轉型為清道伕。當年西德擊敗荷蘭固然得力於主場之利，但後世球評多認為清道伕碧根鮑華o既踢法先至係盡得「全能足球」精粹，其實西德人只係以「以彼之道還施彼身」！

此後雖有如西德人歐真泰拿（Klaus Augenthaler）及法國人阿武羅（Manuel Amoros）般出色o既自由人，但下一個世界級「清道伕」卻來自意大利。

八十年代荷蘭三劍俠率領AC米蘭橫掃歐洲，但全隊o既攻守核心其實係隊長F.巴里斯（Franco Baresi見圖）。佢集中堅與清道伕於一身，係世上唯一令碧根鮑華自愧弗如o既自由後衛。學Peter話齋，雖然佢「走得慢、冇速度、唔夠快」，而且技術粗枝大葉，但佢擁有超強o既閱讀球賽能力、先知般o既包抄能力、加上精準o既長傳，而且經常引球出擊，令敵衛防不勝防。F.巴里斯令「清道伕」踢法達致前所未有o既高峰，而且佢悠長的職業生涯只效力過AC米蘭，更曾隨隊降班都不離不棄。為左記念呢個米蘭隊史上最偉大o既後衛，佢o既球衣跟隨佢一齊退役，AC米蘭自此就再冇6號球員。

隨著戰術變化，球員分工越來越細，能一身兼數職o既自由後衛買少見少。自東德自由人森瑪（Matthäus Sammer）退役之後，世上就再冇真正意義上o既清道伕踢法。

不過，能夠以一人之力照應前中後場，只會發生於22人咁大o既足球場內。大部份中小企業老闆創業時都好鬼「清道伕」，好多時身兼數職胼手底足湊大公司，問題是規模變大之後，點樣將權力下放，同時又能保持看透全局o既視野？咁先至係企業轉型o既樽頸。

世界上，又有幾多個F.巴里斯呢？

萬年老二

英超頭場，保頓領先之下被老樸反炒三比一，成為第一支三連敗o既球隊，如果冇乜大意外，保頓肯定係今季降班大熱。

上屆強人領隊艾拿戴斯出走紐卡素，由副手李森美瓜代。李森美都算醒目，一於蕭規曹隨，保留大部份主力，踢法上照板煮碗，繼續踢簡單足球，甚至連大Sam哥套大褸加耳機都抄埋，應該冇死喇卦？奈何形似神不在，揸旗第一場就撞正個舊老闆，半場未到就硬食三蛋，即時打回原形。

做副手，只要夠經驗夠盡責就OK，但坐正做領隊，就更需要領導魅力。大Sam哥雖然其貌不揚橫肉滿面，但佢果種果斷堅毅，就並非老好人李森美所能模仿。

以保頓投資咁噏縮，如果唔係艾拿戴斯，一早就應該降班。李森美個位睇唻坐唔到季尾，佢都係拿林搵返個助教位撈下，於人於己都係好事。

失業中年

近年英超受外資入侵，最受歡迎的外藉班主應該係泰國人他信。原因並非佢豪洗幾千萬英鎊買起垃圾球會曼城（比較車仔油王，只算九牛一毛），更加同動用四千萬鎊大肆擴軍無關，他信o既最大貢獻，就係請左待業中o既前英格蘭領隊艾歷臣，幫英足聰慳返每年四百萬鎊冤枉錢，英國佬點會唔多謝佢！

艾歷臣在任六年，帶領英格蘭兩度殺入世界盃八強，成績算得中規中舉。但英國佬除左討厭佢果套永恆不變o既442戰術，更討厭佢層出不o既花邊新聞，好色、蠱惑、死板、滑頭，就係老艾o既公眾形象。

蟄伏兩年，老艾獲重金禮聘重出江湖，大家都覺得他信做硬水魚。點知兩輪英超過後，英國球迷不但發覺曼城兩戰兩勝零失球位列榜首，更驚人o既係，艾歷臣兩場波轉左四套戰術，但竟然冇用過442！英國佬如夢初醒，原來六年來一直都畀人揸流攤！

撞o岩聽日（8月19日）曼城會迎戰宿敵曼聯，更撞正曼聯出閘脫腳，C朗、朗尼雙雙缺陣，如果曼城乘機收埋費sir皮，相信班英國佬先會記起當初為乜要重金禮聘艾歷臣來做英格蘭教頭......