球迷告白

何去何從

2009-05-06T05:27:00.000-07:00

作為阿仙奴擁躉，一早就知今季又會四大皆空（因為就算贏到曼聯，歐聯決賽對車仔或巴塞都必敗）。但係，被死敵曼聯清脆地擊倒，感覺特別難受（寧願被羅馬淘汰）。更難受就係兵工廠積弱多年，不敢面對/不願面對的傷口，被血淋淋地揭開，既然今季已無盃可爭，都係時候檢討得失，重新上路。

老實講，我唔係乜野老兵球迷，小時候喜歡利物浦（杜格利殊年代），而最憎最憎就係阿仙奴（悶蛋一比零足球）。點解最後過檔成為兵工廠擁躉呢？第一，與喜歡利物浦原因一致，因為愛上阿仙奴流水行雲般的進攻足球風格；第二，欣賞溫格限米煮限飯，艱苦經營的堅忍精神。但係針無兩頭利，偏偏呢兩點就正正係兵工廠近年的致命死穴。

首先，溫格教授「一招走天涯」一直飽受批評，排陣保守兼缺乏臨場應變能力，對此，我只有無奈與嘆息。教授力排眾議堅持己見確實可敬可佩，非有遠超常人的堅強信念不可，而且，幾年前阿仙奴人腳頂盛時，同一套進攻戰術曾經橫掃英超，打得群雄束手，證明個陣係冇問題，問題只出於人腳。

人腳問題當然源於萬惡的金錢，為左建成阿聯酋球場，阿仙奴舉債4億鎊，未來廿年每季起碼要償還二千五百萬鎊，只能不斷開源節流來應付。所以，高薪老兵要走頭，亨利、韋拉等人襯仲有價就要沽出，死慳死抵湊成一支童子軍，全隊加起來的身價比唔上曼聯的一個後備（貝碧托夫或泰維斯）。睇返數據，近五年來車仔收購球員淨支出超過兩億、曼聯就用左八九千萬、連窮鬼利物浦都洗左超過七千萬，而阿仙奴只係用左少得驚人的三百萬鎊，唔夠買朗尼一條腳毛。正所謂巧婦難為無米炊，咁o既人腳打到入歐聯四強，其實早已經係超額完成，點解仲被人話廢隊呢？

但係，兵工廠真係冇錢嗎？曼聯（6億鎊）、車仔（9億鎊）的欠債難道還少嗎？點解人地仲可以大魚大肉而小兵就要扎炮呢？相信除左一眾球迷，阿仙奴球員都係應該深有同感。所以，希比、法明尼寧願去巴塞、米蘭做後備，而艾迪巴約勉強留低但個心已經飛左去意大利，法比仔頂多報多一、兩年恩，最終都會重返西班牙…… 兵工廠已淪為頂級豪門的feeder club、一支英超的燕豪芬，試問咁又點同列強爭霸呢？

呻左咁耐，其實有冇解決辦法呢？有！學車仔囉，搵個油王泵水，拎返本無銀碼上限o既支票簿，同曼城鬥搶人囉。仲有，可以學曼聯，問銀行借貴利，撬晒對手的核心球員過檔，足可應付三線作戰。甚至可以學利物浦，亂石投林般買人返來試，唔o岩就踢走，總會扑中一兩件好野。但係，如果真係咁樣放棄信念隨波逐流，兵工廠就唔再係兵工廠，溫格亦唔會留效，我亦唔會再係阿仙奴球迷喇。

記得Nick Hornby在《Fever Pitch》中問自己做乜要係阿仙奴擁躉咁笨柒，搞到自己痛苦不堪？如果純粹係glory-hunter，鬼唔知捧曼聯最過癮咩？無盡的資金、無盡的錦標。但係，既然我相信教授的信念，就只能堅持做一個孤獨、痛苦、但堅定的兵工廠球迷。

因為，”In Arsène, We Trust” 。

完美中鋒

2008-12-07T07:50:00.000-08:00

講開金球獎，歷來只有三個人能夠三度封王，除左荷蘭球王告魯夫（Johan Cruyff）及法國球王柏天尼（Michel Platini）之外，就只有荷蘭中鋒雲巴士頓（Marco van Basten）。

與兩位經典球王經歷不同，雲巴士頓職業生命非常短暫。由1988至1992年間盡現光芒，到28歲時無奈被迫掛靴，猶如彗星般一閃而逝，令佢嘅事蹟更添傳奇色彩。

雲巴士頓嘅技術特點就係「全面」，基本上，一個中鋒應該有嘅質素，響佢身上都發揮到最極限。佢擁有一流嘅速度、理想嘅身高（188cm）、上乘嘅腳法（單對單一對二話過就過）、良好嘅閱讀球賽能力，但最可怕嘅，係佢嘅射術。

如果大家有睇過雲巴士頓嘅入球雜錦，肯定會驚嘆於其入球能力。無論係單刀波、中距離、長程炮、執死雞、倒掛金鉤、左右開弓、凌空抽射、落葉自由球、插水式頭槌......佢都能夠做到舉重若輕，瀟灑有型！

世有伯樂，然後有千里馬，如果唔係時任AC米蘭會長嘅貝魯士科尼（Silvio Berlusconi）慧眼識英雄，歷史又可能會改寫。1987年時，立志要振興米蘭嘅佢，重手以破世界紀錄轉會費羅致左歐洲足球先生古列治（Ruud Gullit）之後，仲想搵多隻中鋒拍檔，結果佢用左一分鐘時間睇雲巴士頓響阿積士嘅錄影帶之後，就決定放棄收購當時名滿天下嘅「入球機器」魯殊（Ian Rush）。

跟住嘅三年，米蘭連奪意甲及兩隻歐洲杯錦標，雲巴士頓嘅入球居功至偉。期間仲包括左88年嘅歐洲國家盃冠軍，雲巴士頓果球「零角度射門」，更被領隊米高斯（Rinus Micheals）譽為「一生只能有一次」（Once in a lifetime）咁難能可貴，同時更被廣大球評家認為係史上大賽決賽中嘅最精彩入球。

結果，憑著88年嘅歐國盃、89年嘅歐洲冠軍球會盃（歐聯前身）、92年創下AC米蘭58場聯賽不敗戰績，讓雲巴士頓三度登上歐洲足球先生寶座，同時又令佢跌入傷患嘅深淵。

由於雲巴士頓實在太難防禦，意甲嘅後衛選擇用最後一招 — 職業犯規！雲巴士頓響正面對抗時雖然大獲全勝，但就經常被人從後攔截。結果，經常被踢嘅腳踭嘅傷患不斷，到左92年終於都支持唔住。經過幾次失敗嘅手術後，雲巴士頓被迫退休。

事件震驚球壇，世界足協為亡羊補牢，遂定立從後攔截條例，保護攻方球員。最諷刺嘅係，呢條新條例嘅最大得益者，竟然係雲巴士頓嘅宿敵 — 德國人奇連士文（Jurgen Klinsmann），奇連士文仲因為「充份地」利用條例獲益，成為史上首位獲得「插水王」（Diver）稱號嘅球員。

雲巴士頓黯然引退後，足足休養左十年，直至2002年先重出江湖執教阿積士青年隊，兩年後臨危受命掌管國家一隊，終於將一眾球星彈壓收服。性格剛烈如雲尼斯達萊（Ruud van Nisterooy），都只能敢怒不敢言，鬼叫雲巴士頓係所有荷蘭球員嘅偶像咩？

好多年輕球迷都會覺得大哨細哨技術一流，或者C.朗、托里斯等好波又靚仔，但講到中鋒嘅級數，我仍然覺得雲巴士頓係超晒班！

皇者霸氣

2008-12-07T04:23:00.000-08:00

雖然有點out，但話晒都係球壇最重要個人獎項，點都要恭喜基斯坦奴朗拿度（Cristiano Ronaldo dos Santos Aveiro）榮獲本屆金球獎（Ballon D'Or）。

計落已經係近年第三位名為朗拿度嘅球星奪得金球，國內媒體稱肥哨為「羅尼」、朗拿甸奴為「小羅」，咁C.朗就順理成章變成「小小羅」，其實係唔多關事嘅。

因為Ronaldo只係C.朗middle name之一，原因也與大細哨無關。事緣佢父親大人嘅偶像係美國總統朗奴列根（Ronald Reagan），所以響乖仔名入面加左個Ronaldo以玆紀念。

與上兩屆金球得主朗拿甸奴及卡卡相比，C朗得獎並未得到相同的重視，反而有大量議論覺得佢名過於實，並為落敗的美斯（Lionel Messi）抱不平。平心而論，上季C.朗表現確實出類拔萃，42個入球鐵証如山，英超歐聯雙冠更加係不凡功業，佢拎金球獎都可謂實至名歸，仲有乜好拗呢？

原因好簡單，C.朗嘅公關形象太差。

首先講場內，C.朗初入曼聯時踢法非常獨食，畀人鬧足三季先有改善。而且佢球風偏軟，一碰即倒，並經常抱怨球證唔保護佢，係英超著名嘅「插水王」。加上響06世界盃「陷害」曼聯同袍英格蘭前鋒朗尼（Wayne Rooney），令佢經常成為被噓對象。

再講球場外，C.朗為人涼薄，唯利是圖。不顧費格遜對佢嘅栽培及保護，多次公然對皇家馬德里送秋波，並在轉會不成之際，叫經理人向曼聯施壓扭加薪（佢週薪本來已達12萬鎊之高）......忠誠及道義響佢眼中不值一文，自我中心得令紅魔球迷又愛又恨。

畢竟，C.朗只有23歲，加上條件太好成名太早，令佢成為一個被寵壞嘅孩子。佢果種世界圍著自己而轉嘅觀念，與80後一代年輕人如出一轍，難怪對C.朗嘅評價壁壘分明，愛之欲其生，惡之欲其死。比起細哨、卡卡之讓人心悅誠服，C.朗明顯係輸在欠缺皇者嘅氣質。

講到氣質，巴塞嘅美斯雖然更加年幼，但不論場內場外，阿根庭新球王所展現的霸氣都有凌駕C.朗之勢，除非曼聯今季仍有超卓成績，否則C.朗要衛冕金球，都可謂荊棘滿途。

無論如何，素有收集金球獎得主嘅皇馬一定會捲土重來，再次出手利誘C.朗，只要條件夠優厚，相信C.朗都唔會同老東家講仁義道德。下季佢到底會穿紅定著白，大家且拭目以待。

非勝不可

2008-11-30T10:16:00.000-08:00

車路士1 vs 2 阿仙奴

估唔到法比仔咁好腳頭，轉莊做隊長之後兩戰兩勝，總算暫時穩住隻船，冇令兵工廠危機擴大。

反而車仔就幾大鑊，由原本高踞榜首風光無限，變成聯賽、歐聯三場不勝，四強會師主場兩戰皆北，實在唔太好向油王交代。

講真句，雖然上半場靠粒老烏開紀錄唔夠清脆，但車仔響頭一粒鐘真係佔盡優勢，好難想象天殘地缺嘅兵工廠能夠反敗為勝。

我覺得最大關鍵係雙方嘅戰意。

雖然痛失三分，但車仔仍然領先阿仙奴七分之多，仍然係奪標大熱。相反，兵工廠再輸就落後13分，可以提早收咧，點會唔同你搏命？

最好笑就係，賽前車仔上下齊玩心理戰，希望加重小兵嘅壓力。門將施治（Petr Cech）提醒阿仙奴如果呢鑊輸波就等如今季提早畢業；傷將糟糕（Joe Cole）雖則冇份踢，都不忘伸多兩腳，話兵工廠好睇唔好食，年年食白果。

最攞命係領隊大菲哥，講明今仗不勝無歸。結果一旦被反先時，壓力就盡歸車仔，踢起來全無章法，豈能不敗？

睇返車仔兩場敗績，都可算非常失運。對利物浦時，阿朗素如果唔係省中人折射入網（師承自林伯？），車仔斷唔會窮追不果。今仗被雲佩斯扳平一球更加冤哉枉也，佢接應來球時少說越位左兩個身位，如果唔係假波就一定係個旁証發雞盲。

就咁睇，車仔幾蝕章。第一循環四強戰，車仔三個主場都踢晒，拎得一分咁大把，下半季仲要分別作客三大宿敵，點算好？

還好車仔今季作客威力強勁，開咧至今七戰七勝，話唔埋第二循環會不斷有驚喜（一月轉會窗重開，車仔又可大舉進補）。

回看阿仙奴，雖然再次遇強越強，但防守力薄弱加上狀態不穩嘅問題，始終不改。除非一月份真係有具份量援兵加盟，否則前途仍然一片暗淡。

撥亂反正

2008-11-24T06:40:00.000-08:00

繼熱刺鬧劇之後，另一家陷入危機嘅英超球會竟然係同城死敵阿仙奴！

聯賽踢左1/3，兵工廠已輸左五場，而且五場都係完敗！如果話阿仙奴仍然係奪標熱門，未免自欺欺人。

被候城反勝一役固然輸得肉酸，對熱刺大好形勢時，響補時連輸兩球被扳平，更加令元氣大傷。但要數兵工廠崩潰真相，相信要追溯到上季作客伯明翰城一仗。

溫格不愧為經濟學「教授」，數口好精，上季佢算到盡，將手上小兵潛能超額發揮，響聯賽早早發力，遙遙領先。但係，偏就算漏左伯明翰呢個大凶地。

該仗不但重創主力艾度亞度（Eduardo Da Silva），更嚴重嘅係暴露左隊長加拿斯（William Gallas圖左）性格上嘅缺陷。

原本，響阿仙奴陣中，無論資歷、球技、身價，31歲嘅法國老將加拿斯都算係名列前茅，處身一眾小兵群中，佢應該有足夠嘅威望領導群雄。

但係，加拿斯生性偏激（響車仔扭計鬧離隊時威脅會刻意擺老烏），行事我行我素（煲煙畀狗仔隊斷正），而且情緒容易波動（被逼和時坐地飲泣），絕非小將們的理想學習對像。

由於隊中確實並無大將，加上溫格有意攏絡加拿斯，所以一直隱忍至今。但到上週加拿斯主動向傳媒披露球隊內訌，終於令教授忍無可忍，怒斬加拿斯。

新隊長人選，正係眾望所歸嘅法比加斯（Francesc Fabregas圖右）。雖然法比仔只有21歲，但無論場內場外，佢都遠比大佢10年嘅加拿斯來得成熟。

阿仙奴鬧劇，又一次教訓大家：個人能力再高，都唔一定係好領袖。

一時瑜亮(2)

2008-11-12T07:31:00.000-08:00

呢個標題，原本係好行貨（已用過一次）。但係，多得吳宇森導演嘅作品《赤壁》，令到呢個成語多左一個「新意義」。

但講到球壇最不幸嘅一次命運相逢，就冇辦法唔再用呢個充滿幽默感嘅標題。

講嘅係兩個意大利球壇超頂級天才 — 羅拔圖巴治奧（Roberto Baggio）及迪比亞路（Alessandro Del Piero 圖）。

巴治奧嘅英雄事蹟可謂家傳戶曉，尤其是1994年世界盃以獨力帶領國家隊殺入決賽，最為人津津樂道。

至於迪比亞路，由於技術特點與巴治奧如出一轍，所以在非常長的一段時間都只被視為巴治迪嘅替身，直至後者退役，呢個陰影都冇消失過。

所謂人比人比死人，如果冇巴治奧，迪比亞路嘅日子應該過得好好。

因為佢係世上非常罕有嘅超級天才球星，有腳法、有速度、夠體力、有智慧，左右雙腳都一樣靈巧，兼備超一流射術，可勝任中鋒、輔鋒、左右雙翼、攻擊中場，甚至左右二閘各位置，遠射、執雞、頭槌、自由球...無一不達世界一級水平。

加上成名極早而且職業生命超長，年方弱冠就一直效力於歐洲最頂級球會（祖雲達斯）至今，令迪比亞路成為世上少有嘅富豪級球員。

就算從私生活衡量，佢都係無懈可擊。迪比亞路出名脾氣好，為人彬彬有禮，家庭生活幸福，從不鬧緋聞。而且對球會極度忠心（隨祖記降班意乙），兼且絕對服從指揮（卡比路執政兩年長坐冷板而無怨言），縱觀當今球壇，如此完人，只此一家別無分店。

偏偏，迪比亞路係好多意甲球迷嘅眼中釘。一方面係因為佢響祖記同國家隊，都搶走左萬人迷巴治奧個位，加上佢年輕時多次響關鍵戰役都表演失準，導致呢位好好先生遲遲得不到公允嘅評價。

不知不覺間，迪比亞路已連奪七屆聯賽冠軍，歐聯、世界盃等最高榮譽都一一成為佢囊中物。可惜，期間造就左隊友施丹、尼維特、簡拿華路等，佢就只能為他人作嫁衣嫦。

直至現在，34歲嘅迪比亞路仍然響歐聯發光發熱，雙殺皇馬之役佢就貢獻左三個精彩入球，連皇馬嘅主場球迷都忍唔住起立致敬。究竟意大利本土嘅球迷幾時先會放下成見，重新評價呢個上天賜畀佢地嘅奇材呢？

信念之戰

2008-11-10T06:57:00.000-08:00

阿仙奴2 vs 1 曼聯

由於兵工廠天殘地缺，賽前一面倒睇好曼聯，連C.朗都話阿仙奴此時不破，更待何時？

費蛇可能都有一般嘅心思，週中歐聯刻意留力，收起朗尼、貝碧準備一舉擒敵。

攤出來個陣容就已經嚇得死人，前線C.朗、貝碧、朗尼金鑽三叉擊，中場安達臣、朴智星、卡域克活力十足，後防好難得加利仔、維迪、李奧、艾華、雲達沙「夫添」上陣！

後備席仲坐擁泰維斯、夏格、奧沙、科士打、布朗、伊雲斯、拿尼、傑斯、史高斯......真係B隊都夠贏英超。

相比起阿仙奴連老弱婦孺（施維斯達、丹尼臣等）、受傷未癒（禾確特、沙拿）都悉數正選，前線打賓特拿一件廢柴，可以話係地庄應戰，無論點都睇唔到曼聯輸波嘅理由。

愚以為紅魔之敗，敗在費格遜！

上週，阿仙奴作客史篤城，踢到成篤屎咁樣，仲畀對手笑佢地冇「吉士」，係冇勇氣嘅懦夫。

溫格領隊反駁：我覺得夠膽正面挑戰敵人先係勇敢，響人背後施暗算嘅先係懦夫（是役兩小兵被對手從後攔截傷出）！

話係講得冇錯，但今時今日咁功利嘅氣候之下，仲邊有人陪你堂堂正正公平決戰丫............除左費爵爺。

如果話溫格係天真嘅攻勢足球完美主義者，咁費格遜可以話比溫格起步再早左十年。23年來，經歷左幾個朝代，曼聯響費格遜嘅領導之下，只有一個信念 — 全力進攻！

響阿聯酋球場，佢選擇左光明磊落地對攻，對阿仙奴而言，簡直係求之不得。結果曼聯三叉擊集體失準之下，被阿仙奴成功反底。

費蛇心知肚明，其實曼聯最應該亦有本錢踢穩守突擊，既可磨蝕對手小兵嘅銳氣，又可立於不敗之地。

但佢仍然一意孤行，因為，佢要對自己嘅信念負責！正如溫格，寧願付出戰敗嘅代價，都堅持踢漂亮足球，無怨無悔。

為左一個信念，今屆英超桂冠以至歐聯錦標，都可能會與呢兩位天真嘅主帥無緣。但係，為左眼前嘅三分，輸左做人嘅原則，雖勝猶敗！

現代社會，實在有太多講一套做一套嘅人，為左個人利益，可以放棄任何原則。

正因代價如此沉重，更覺兩位老教練貫徹始終，身體力行，實在可敬可佩！

戰意如紅

2008-11-10T04:49:00.000-08:00

三年前，托定咸熱刺花左一千萬鎊買左一個保加利亞人，領隊約爾話：我地終於都擁有一個屬於我地嘅亨利（Thierry Henry）喇！

對呢句評語，費格遜爵士覺得十分中肯，於是，今年九月曼聯動用左超過三千萬鎊將佢羅致。

呢個人，名叫貝碧托夫（Dimitar Berbatov 圖）。

貝碧綽號「隱形戰機」，可以成場波都玩失蹤，但失驚無神會出現置你於死地。

一劍封喉，好瀟灑！問題是，輸波時佢仲玩信步閒庭就一定會成為眾矢之的，例如作客兵工廠呢場。

相信大部份有睇直播嘅觀眾，都只會記得貝碧「助攻」阿仙奴拿斯利輸左果球波。至於進攻，恕我眼拙，真係唔記得佢有乜貢獻？

同一比賽日，貝碧嘅舊拍檔羅比堅尼（Robbie Keane）終於響聯賽為利物浦開齋，連入兩球帶領紅軍升上英超榜首，領先曼聯8分之多，總算苦盡甘來。

開季前，好多人都話賓尼迪斯老襯，花二千萬買一個年紀偏老（28歲）、技術一般（相比起貝碧）嘅夕陽戰士返來做乜？

但堅尼與貝碧嘅最大分別不在技術，你睇堅尼無論響列斯、熱刺、利物浦都表現出永不言敗嘅鬥志，毫無保留地奔走。講到呢一點，貝碧托夫係永遠都比唔上堅尼！

所以話，性格決定命運，那怕有通天嘅才能，如果沒有「為勝利付出所有」的覺悟，一切也屬枉然。

絕世強者

2008-11-06T07:23:00.001-08:00

續談球王往事。

如果響82年有人問：馬勒當拿有乜咁勁？我真係答唔出。

論入球能力，意大利羅斯遠勝之；論大局觀，法國柏天尼贏到開巷；論個人技術，巴西眾星只有過之而無不及...1982年的馬勒當拿，只係一個技術唔錯的南美小球星。

但同一個問題，響四年之後會有一個好明確嘅答案：

迪高.艾文度.馬勒當拿，就係世上最強的人！

有睇過1986年世界盃嘅觀眾，都不能否認馬勒當拿嘅「強」—— 最純粹嘅強、最可怕嘅強、無可爭議無法抗衡嘅強！

歷史一再話畀我地聽：世界盃，只屬於世界上最強嘅球隊，只屬於地球上技術最好、默契最強、戰術最精嘅頂級球隊。就算技術再高狀態再好，想以一人之力捧走世界盃，絕對係妄想！

1958年瑞典世界盃，法國人方亭（Just Fontaine）6戰射入13球，技驚四座，最終被群星拱照o既巴西隊淘汰。1966年英國世界盃，葡萄牙球王尤西比奧（Eusébio）更以一己之力帶領國家隊打入三甲，但亦僅此而已，難再寸進。

直至1986年......

經過一個失敗嘅82世界盃、兩年噩運與傷病纏身嘅西甲之旅後，馬勒當拿響意大利小球會拿玻里（SSC Napoli）治療身心創傷，重拾狀態。過去四年的西甲、意甲經歷雖然令馬勒當拿吃盡苦頭，但同時將佢鍛煉得更快、更強、更狡猾！

86年的阿根庭隊，陣容比四年前更弱，巴薩里拉走左、阿迪尼斯走左、甘巴斯走左，隊中只有效力皇家馬德里嘅前鋒華丹奴（Jorge Valdano）叫做有少少名氣，其他隊員只係湊夠數而已。

唯一變強左嘅只有隊長馬勒當拿，所以阿根庭嘅戰術好簡單，仍然係：搶波 > 交畀隊長 > 收工！

正因為戰術太簡單，無論任球隊對阿根庭，都會用返四年前果招「凍結馬勒當拿」，但今次個結果好唔同。

首先嘗試嘅係衛冕冠軍意大利隊，以防守能力稱霸世界嘅意大利派重兵釘防球王，加上已經一球在手，相信大局已定。但馬勒當拿冇放棄，佢把握住全場唯一機會用速度擺脫對手貼身攔截，再乘門將出迎間隙挑射空門，迫和1:1。阿根庭就憑呢場和局以首名晉級淘汰圈，成功避開左勁敵法國及巴西。

第二隊挑戰者，就係自66年世界盃冠軍隊以來最強o既英格蘭隊。由於實力旗鼓相當，加上最近在福克蘭群島英軍擊敗左阿根庭軍，令這8強大戰氣氛異常緊張，戰情陷入膠著狀態。

之後發生嘅事可以話係家傳戶曉，馬勒當拿先以超人彈跳力加上絕頂蠱惑嘅陰招「上帝之手」（見圖）打破僵局，再以驚世駭俗嘅技術扭過英格蘭6名球員（順序是：荷度、列特、森臣、畢查、芬域、施路頓），射入「世紀金球」，寫下世界盃史上最具爭議的一役。

賽後，英格蘭人十分無奈，既對卑鄙的「上帝之手」深惡痛絕，同時又被完美的「世紀金球」彈壓得心服口服。從此，兩國球隊就結下不死不休嘅世仇，禍延至今未停。

面對鋒芒畢露嘅球王，老「朋友」比利時信心十足，因為四年前正係佢地首創嘅「鐵桶陣」圍死左馬勒當拿。加上有當屆最佳門將樸夫（Jean-Marie Pfaff）把關，可以話係毫無破綻。

比利時人嘅自信來自強大的防守力，佢地嘅戰略亦執行得好徹底：放棄其他雜魚，全力凍結球王！

好可惜，雖然一堵四人組成嘅移動城牆完美地封死左對手嘅射門角度，但當日嘅馬勒當拿已經進入左無堅不摧狀態，個人連下兩城，報盡新仇舊恨。尤其是千里走單騎果一球，再次證明對英軍時嘅光芒，唔係靠撞彩。

至於往後如何擊敗西德，都已經無關痛癢，因為馬勒當拿已經創造左一個傳奇 —— 「以一人之力，奪取世界！」

對世上少數的強者而言，歷史，還是有許多例外的。

壹玖捌貳

2008-11-06T00:43:00.000-08:00

講開老馬，本人對呢位阿根庭球王係特別有感情嘅。因為小時候冇乜點踢波，亦唔係特別喜歡睇足球，直至1982年小馬出現，情況先開始改變。

話說當年聽新聞報告，知道阿根庭有個號稱「新球王」嘅人以破世界紀錄（500萬鎊）轉會費投效巴塞隆拿，而佢將會隨母會小保加訪港，同精工足球隊踢一場表演賽。

後來睇《球迷世界》先知呢個只得21歲、五短身材（身高五呎五吋）、其貌不揚（小圖係球王穿上精工球衣的「雄姿」）嘅矮仔就係萬眾觸目o既明日之星？真係打死都唔信。

好奇之下睇返資料，原來馬勒當拿響1978年已經天才橫溢並已入選國家隊，但領隊文諾迪嫌佢太年輕，令佢錯過左國家首奪世界盃嘅機遇。

一年後，佢率領阿根庭青年隊以狂風掃落葉姿態勇奪世青盃，決賽3:1勝蘇聯一役更被視為經典決戰，主場嘅日本球迷睇到如癡如醉，難怪到今天響日本仍有大量「馬迷」。

到82年，馬勒當拿已貴為全球名氣最響嘅球星。政府大球場一戰，馬勒當拿帶領小保加以2:0擊敗左實力頗強嘅精工，但佢嘅表現平平，仍然唔知點解會值咁多錢？（大佬！八十年代五百萬鎊等如今日幾十億人仔咁多！）

眨下眼到左82年中，新球王率領阿根庭隊去西班牙衛冕世界盃。由於名氣太響目標太大，馬勒當拿首戰就被對手比利時隊特別「招呼」，眼見四個高大球員全場追纏圍毆一個矮仔，場面都幾震撼。結果阿根庭出閘脫腳輸0:1，面對超技術侵犯，呢個「球王」明顯唔夠經驗應付。

最後，阿根庭雖然勉強出到線入第二圈，但好不幸被編入死亡之組。首場對該屆最終冠軍隊意大利輸1:2，尾場硬撼被譽為「有史以來最強巴西隊」（包括薛高、蘇古迪斯、伊達、科高、祖利亞、加拉卡...每個都有歐洲足球先生級實力，太可怕喇！），慘敗1:3！

原本技不如人輸左波出左局，係衛冕失敗者，冇乜大不了，但馬勒當拿響臨完場前五分鐘，仲做左一件令佢終生遺憾嘅蠢事。

眼見踢足五場，場場孭重飛，唔係畀人踢到飛起，就係被對手搓到暈，獨力難支嘅小馬終於大爆發 — 以一記異常醜陋嘅飛踢，完全命中巴西中場巴迪斯達腹部！

一面紅牌！就係小馬響今屆賽事唯一得到嘅記念品。所謂「新球王」，以最醜惡嘅方式向世人宣告：馬勒當拿係一個最令人失望最名大於實嘅「次貨」。

雖然馬勒當拿嘅處子演出，可以用衰到貼地來形容，但我仍然覺得佢係十分值得同情嘅。

首先，雖說係阿根庭係衛冕冠軍隊，但78年時其實贏得唔多光彩（主場、造假、禁藥），更易成為眾矢之的。而且4年前果班骨幹球員已經狀態嚴重滑坡，加上球隊戰術單調，過份依賴小馬技術作個人突破。結果，全世界都知道擊敗阿根庭嘅「秘密」 — 凍結馬勒當拿！

賽後，78年冠軍隊成員如巴薩里拉、阿迪尼斯等淡出國家隊，阿根庭隊中再無具份量球員。馬勒當拿可算生不逢時，阿根庭歷來人才輩出，偏偏就響佢當打之年，碰到百年一遇嘅青黃不接危機，注定左佢要憑個人之力走出一條前無古人嘅「球王之路」。

皇者回歸

2008-11-05T19:57:00.001-08:00

不甘寂寞的老馬又返來喇！

作為近代球壇最具爭議性o既人物，球王馬勒當拿（Diego Armando Maradona）終於重歸阿根庭國家隊 —— 以主教練的身份。

雖然阿根庭隊近況低迷，但戰績未至於不能出線世界，為乜要出到球王領軍呢最後一著呢？

所謂「最後一著」並非對球王有貶意，論人氣、論號召力、論江湖地位，馬勒當拿都係不二之選，問題是：呢個球王o既性格太難捉摸喇。

球員時代嘅馬勒當拿固然有嚴重嘅生活作風問題（吸毒、禁藥、私生子），佢退役之後都係是非不斷（癡肥、槍擊記者、心臟病發）。更可怕嘅係球王短暫o既執教生崖，實在毫無說服力（27戰3勝）。老馬從來都冇上過正式教練班，兩次執教國內小球會都係以賓主反面收場。

所以話，唔到山窮水盡，都唔好諗要搵佢老人家出山。

坐擁美斯、阿古路、列基美、馬斯查蘭奴等球星嘅阿根庭隊，實在同山窮水盡相去甚遠。但正因為隊中球星如雲，但國家隊長期冇盃捧，先至令足總壓力越來越大。

阿根庭近年響青年隊及奧運隊級別賽事上，可以話係所向披靡，偏偏響大國腳級別賽事總係鎩羽而歸。論牌面逐隻秤，阿根庭比起巴西、德國、意大利都有過之而無不及，奈何每到關鍵時刻就會走樣落敗，情況令人擔心。

究其原因，眾星唔團結固然係死症，欠缺求勝決心更加係致命傷。以球王神一般嘅號召力，班國腳當然唔敢說不，加上老馬響團結大軍鼓舞士氣方面亦有一手，搵佢執教可說對症下藥。

但作為一個戰術文盲，加上會隨時劈炮，老馬渣旗實在太唔穩陣，所以阿根庭足總買左個雙保險。首先，重召球王嘅老上司86年世界冠軍主帥比拉多（Carlos Bilardo）做球隊經理，再加舊同袍兼國奧隊主帥巴迪斯達（Sergio Batista）做副手，希望可以應付球王嘅「神來之筆」。

雖然未知效果如何，但老馬出山呢個話題本身就夠晒震撼，期待本月十九號首戰蘇格蘭，可以睇下「球王魔法」靈唔靈！

否極泰來

2008-10-30T03:33:00.000-07:00

主席利維（Daniel Levy)斧底抽薪,不但怒炒哥莫利,連教練拉莫斯都被連根拔起,歐陸總監制度正式宣報破產,熱刺鬧劇暫時告一斷落！

面對空前降班危機,利維選擇回歸基本,召用最傳統英式的領隊哈利列納（Harry Redknapp),並且給他管理的全權,可以話系又一個極端走到另一個極端.

但賽場上永遠是成績說了算,列納上任後,效果可謂立桿見影.由八場不勝到主場兩球完勝保頓,打開勝利之門兼且表現虎虎有威.

難得是作客死敵阿仙奴,能夠在落後兩球之下在補時逼平對手,更凸顯出將士用命的氣勢,同拉莫斯時期的士氣低沉相比,直有雲泥之別.

贏保頓,有人話系行運醫生醫病尾,撞棍而已,但逼平兵工廠就絕對是超凡的表現.論執教功力,列納仲未到一流,但在知人善任鼓舞士氣方面,他肯定勝任有余.

上季紐卡素曾力邀列納執教,但卻被一口回絕,關鍵在于紐記堅持要保留足球總監制.如今熱刺一擊即中,全靠利維當機立斷,變得夠徹低.

雖然熱刺在積分榜還是奠底,但照這勢頭,護級大有希望.反觀紐卡素想變不敢變,前景仍然令人擔心.

畢竟,山不轉路轉,困境雖難撐,肯變自然通.

水深火熱

2008-10-19T23:05:00.001-07:00

史篤城 2 vs 1 熱刺，三談熱刺鬧劇及賓特利。

在英國北部Yorkshire地區嘅候城（Hull City）主場，1比0挫敗韋斯咸，候城實現三連勝，穩坐聯賽榜三甲。隊中後衛安迪多遜（Andy Dawson）一直響低組別球會打滾，今次終於吐氣揚眉。

同一時間，安迪果個名氣大得多嘅細佬米高（Michael Dawson），正在離候城百里之外嘅史篤城陷入苦戰。

熱刺在客場先有比爾響禁區犯天條，食左紅牌兼輸球12碼，到下半場米高多遜入替時，球隊已落後1:2。多遜貴為英格蘭國腳中堅，領隊拉莫斯竟然以右閘哥路卡客串，都唔願意用佢。沉唔住氣嘅多遜以一記愚蠢嘅飛剷換來一張紅牌加三場停賽，可算係對主教練最狠毒嘅報復。

但多遜嘅爆發只係冰山一角，球隊組合嚴重失衡、過多新加盟球員、戰術過份單一化... 都使熱刺輸得一榻糊塗。更致命嘅係，隊中雖然粒粒皆星，但眾星表現都大走樣，表表者當數大衛賓特利（David Bentley圖）。

24歲嘅賓特利出生於倫敦，自細響阿仙奴青訓系統中，表現算得上光芒四射。但佢生不逢時，碰正溫格教授任內最強嘅「無敵軍團」（The Invincibles），無法打入一隊，轉而外借諾域治、布歷般等二、三線球隊，終於響布歷般鬧修成正果，榮升英格蘭大國腳。

雖然賓特利嘅偶像係柏金，但礙於身形單薄，無法應付正前鋒面對嘅衝擊，佢逐步走上另一英超傳奇嘅道路 — 大衛碧咸（David Beckham）嘅黃金右中場之路。

同屬倫敦人，同樣金髮俊朗，同樣以急勁傳中球見稱，甚至連姓名及國家隊編號都十分相似（DB7），賓特利開始以碧咸接班人自居，連髮型打扮都學到足。問題是碧咸老而彌堅，有排都唔似會退下來，欠缺耐性嘅賓特利又再次等唔切。為左上位，佢做左兩個令佢後悔不已嘅決定。

首先，為左同碧咸爭位踢歐國盃，賓特利臨時反口唔踢歐青盃，激到少帥皮亞斯跳起，同時亦搞㷫晒英格蘭球迷。自此逢親有佢落場踢太公波，主場球迷定必噓聲四起，咁又點會有運行？結果，英格蘭響外圍賽已經緣盡歐國盃，賓特利不但枉作小人，更落得一個反口覆舌嘅名聲，美夢到頭一場空。

其次，賓特利未有深切反醒，反而歸咎於效力布歷般呢種小球會嘅身份，決定要攀高枝 — 以1700鎊天價加盟國腳如雲嘅熱刺。結果，賓特利不但長期發揮失準，更連累狀態較佢好嘅艾朗連儂（Aaron Lennon）要轉打左中場，形成雙輸局面。

卡比路上場之後，不但完全冇考慮過賓特利，反而召左阿仙奴師弟禾確特（Theo Walcott）瓜代右中場一職，仲踢到識飛咁滯。見到師弟咁凌厲嘅表現，唔知賓特利會唔會後悔當初冇留響兵工廠呢？

縱觀賓特利嘅經歷，可以話係「機關算盡太聰明」，事情做得太盡，太過急功近利，簡直就係熱刺境況嘅縮影。

輸埋畀尾二嘅史篤城，熱刺終於打破百年紀錄，奪得有史以來最差開季成績。更大鑊嘅係，史上差不多從未有球隊開季咁差而最終唔洗降班嘅（1999年修咸頓係唯一例外）。

由於月尾開始硬仗連場（阿仙奴、利物浦、曼城），下仗主場對保頓就係最後一個打開勝利之門嘅機會。偏偏碰到比爾、多遜停賽，哥路卡、京治受傷，加上本身陣容失衡，熱刺前路可謂荊棘滿途。

不在其位

2008-10-10T06:38:00.000-07:00

續談熱刺鬧劇。

上季同期，托定咸熱刺一樣處身水深火熱境地，結果以解顧領隊約爾作結。一年之後，球會重蹈覆轍，但球迷並未有苛責領隊拉莫斯，反而將矛頭直指足球總監哥莫利（Damien Comolli）。

哥莫利何許人也？

法國人哥莫利高大英俊，儀表不凡，擁有法律學位，能操法、英、西斑牙幾種語言。

球員時代效力法甲摩納哥隊，及後執教該會青年隊，最大成就係響阿仙奴領隊溫格手下做過七年球探，期間發掘過高路托尼（Kolo Toure）及基列治（Gael Clichy）等潛質新星。

由於熱刺一直以同城阿仙奴為假想敵，主席利維就響05年禮聘哥莫利過檔，並委以足球總監重任，企圖將兵工廠網羅歐陸新秀嘅策略響熱刺複製。

哥莫利利用自己嘅球探網絡，為熱刺大舉搜羅各地球星，代表作包括貝碧托夫（Dimitar Berbatov）及比爾（Gareth Bale）。

聽落成績唔錯，問題係佢同時仲買左大堆高價庸才，例如犯規王索高拿（Didier Zokora - £8.2m），冷板王保定（Kevin-Prince Boating - £5.4m），烏龍王卡普爾（Younes Kaboul - £8.2m）等，不能盡錄，耗費上億英鎊。

入錯貨最多係唔見錢，最大鑊係呢個足球總監嘅權力仲大過領隊，經典事件莫如收購戴倫賓特（Darren Bent - £16.5m）。

上季約爾講明欠一個中堅，哥莫利竟然出高價（其時查爾頓已降班等錢洗）買來賓特，令本已擁有三大前鋒（貝碧、堅尼、迪科爾）矛盾激化。結果，約爾被炒，迪科爾被賤賣，貝碧及堅尼蟬過別枝，而賓特就響後備席雪藏一年，可說一練七傷，無人幸免。

正所謂他朝君體也相同，拉莫斯最善長442雙前鋒戰術，但今季熱刺前鋒線走淨賓特一件。原本領隊想買輔鋒艾沙雲（Andrei Arshavin）以補不足，偏偏哥莫利貪平，買左同賓特同類型嘅柏夫列真高（Roman Palvlyuchenko），搞到而家只能打單箭頭，每仗皆北。正因為犯錯連連，哥莫利開始成為眾矢之的。

放眼球圈之外，其實哥莫利呢種人無處不在。佢地深得大老闆信任，對公司大小事務能管則管，不厭其煩。而且自覺多才多藝，喜歡以外行管內行，累誤戎機。

響古代，大家都尊稱呢種大哥為太監，去到現代，佢地仍活躍於大大小小機構高層，可以話係一個歷欠不衰嘅行業。

欲速不達

2008-10-09T04:41:00.001-07:00

最近英超新聞除左超級大笑柄紐卡素之外，就數包尾大幡熱刺最富娛樂性。

自1912年以年，熱刺從未試過開季七場不勝咁兜痞，今季人強馬壯，竟然只得二和五負，令人大跌眼鏡。

托定咸熱刺一直被譽為英超第五強，論牌面逐隻秤，真係粒粒皆星國腳如雲，比之四大豪門一點都唔失禮。

經過荷蘭教頭約爾（Martin Jol）努力調教之後，熱刺已有力連續兩季（06、07）獲得聯賽第五名，隊中擁有半支英格蘭國家隊，加上英超最強前鋒組合（貝碧托夫 + 羅比堅尼），進軍歐聯的目標，似乎觸手可及。

主席利維（Daniel Levy）係非常成功o既生意人，善長營運及講價。響佢領導之下，熱刺年生意額高達一億三千萬鎊，純利超過三千萬，而且係英超少數無負責球會。

利維覺得萬事俱備，只欠名帥，上季毅然利誘西班牙領隊拉莫斯（Juande Ramos）加盟，並將約爾無情地踢走。拉莫斯亦確係好腳頭，走馬上任隨即奪得聯賽盃，風頭一時無兩。

為確保今季能順利打入四強，拉莫斯重金收購左克羅地亞中場核心摩迪（Modric）、「新碧咸」賓特利（Bentley圖）、巴西鋼門高美斯，加上來自巴塞o既杜斯山度士及原有班底o既贊拿斯、索高拿、比爾，熱刺中場o既技術含量大大提升。

大好形勢之下出閘脫腳，熱刺歸咎於貝碧托夫同羅比堅尼跳草裙舞（最後分別去左曼聯及利物浦），搞到佢地冇前鋒用。但聞戰鼓思良將，上季中又係邊個天才堅持要送走英格蘭國腳迪科爾（Jermaine Defoe）呢？今季作客樸次茅夫被倒戈o既迪科爾首開紀錄時，唔知拉莫斯有乜感受？

如果話前鋒危機係因為內部兵變的話，咁中場線崩潰就真係咎由自取。雖則話一朝天子一朝臣，但拉莫斯偏重技術流球員，除左購入上述新仔之外，佢仲大手清除約爾留低o既珍貴「遺產」。占邦達、馬白蘭基、泰尼奧、羅賓遜等沙場戰將被集體拋售，拉莫斯希望一步到位，複製另一支技術細膩o既西維爾。

上手遺臣雖然未算頂班，但總算組成左一套行之有效o既作戰體系。拉莫斯急於求成，令熱刺充斥大量技術一流但欠缺英超經驗o既球員，加上磨合需時，所以呢支攻守失衡o既新軍，被英超中下游對手衝擊得潰不成軍。

所謂新官上任三把火，好多新領導都對舊人睇唔順眼，必欲盡去之而後快。問題是轉變需時，新人事未必即時見功，舊電池也有發光發熱之時。若不量才而用，僅以黨同伐異一刀切劃清界線，所冒風險實在太大。

熱刺經過幾年刻苦經營造就o既好形勢，會唔會因為一個錯誤決定而土崩瓦解呢？

小家碧玉

2008-09-20T21:52:00.001-07:00

週中歐聯分組賽場上，英超四雄強勢依舊，兩勝兩和，但重回國內聯賽，就必需面對現實打爛仔交。

利物浦主場對升班馬史篤城，計正贏少過兩球都可以當輸，估唔到係一對光蛋，悶和！

領隊賓尼迪斯對開賽初段謝拉特嘅詐糊耿耿於懷，加上全場廿次角球及無數次射門都徒勞無功，難怪佢氣頂，但紅軍球員谷唔起係不爭嘅事實。

賓帥係「輪換之王」，今季雖已有改善，但馬斯查蘭奴及巴布兩員虎將仍被收起，面對史篤城嘅死守，猶如老鼠拉龜。上週力擒曼聯時，仲以為利物浦終於有力問鼎英超，點知一個星期唔到就打回原形。

講到尾，賓尼迪斯嘅哲學係靠效率、紀率，加上球星嘅個人能力爆發。但係出死力壓制對手只能偶一為之，旨意個別球員靈光一閃就更唔可靠，聯賽流流長，咁踢法實在太易失分。

季初買唔成巴利，賓帥又怨球會唔肯投資，買唔到好球員，但係利記以經連續幾季四、五千萬鎊咁掟錢買人，咁係代表本身個班底太廢，定係領隊連續幾季都買錯人呢？

愚見係利記唔係冇洗錢，而係洗得好戇居。賓尼迪斯鍾意向中下游球隊出手「執筍野」，即係果D可能有潛質嘅中下價貨。例如賓納、高治、施素高、艾比路亞、奧拿里奧、杜辛拿之流。逐件計唔算貴，大約五至八百萬鎊，但加起來都用左幾千。

呢種球員雖未至於係濫竽充數，但就絕對唔係可以脫胎換骨嘅星級球員。睇返隊中真係叫有卡士嘅星，由托里斯、堅尼、巴布到阿朗素，邊件唔係過千萬鎊買返來呢？

先別說自給自足嘅阿仙奴，就算以往嘅「冤大頭」車路士，都比利記花得精明。雖然油王老細係大把，但史高拉利一上任就斬左賓希姆、保拉路斯、胡禮菲、薛維爾、舒夫真高等人，精簡人手，再重金補入保辛華及迪高兩人，針對性地解決左右閘及中場中嘅桎梏。人雖然係貴，但勝在有保證。

國內同胞講做事要「大氣」，手面闊除左要有銀彈支持，都好講「氣質」嘅。相比費蛇一擲千金面不改容，賓帥實在太鍾意計婆仔數。到佢響籮底執到隻靚橙出來，可能已經係二十年之後嘅事......

處子登場

2008-09-14T03:43:00.001-07:00

利物浦 2 vs 1 曼聯

雖然C朗尚未復出，但朗尼、泰維斯、貝碧托夫合組的攻擊鐵三角已經足夠令人期待。

果然，身價高達三千萬鎊嘅貝碧一開波已經表現出超卓嘅個人能力，妙傳泰維斯首開紀錄。果邊廂利物浦新兵尼亞拿表現生硬，更與隊友欠缺默契，對比強烈。

然而，貝碧及曼聯的強勢只維持左二十分鐘。佢嘅熱刺老拍檔羅比堅尼雖然全場冇乜建設性貢獻，但勝在鬥智旺盛肯緊迫曼聯後防。加上尼亞拿入局後越戰越勇，曼聯開始變得舉步為艱。

雖然缺少左皇牌謝拉特及托里斯，但利物浦沉著應戰，並以馬斯查蘭奴為首嘅硬朗攔截型中場線壓垮左曼聯！不但迫到布朗擺老烏、傑斯輸辜寒波，連一向穩建嘅維迪都魯莽領紅牌，下場作客車仔更會停賽。

賓尼迪斯上任五年來聯賽首勝曼聯，除左令紅軍心理上佔左優勢之外，更加為其他強隊展示左打敗曼聯嘅良方。相信紅魔鬼呢隊雙料冠軍嘅衛冕之路將會十分崎嶇。

曼城 1 vs 3 車路士

貝碧雖然身價高，但英超標王始終係同城宿敵曼城隊嘅巴西國腳羅賓奴（圖）。

無獨有偶，呢位「新比利」一樣有個好開始，13分鐘已經用一粒世界級自由球征服車仔。加上倒戈相向嘅胡禮菲臘斯踢得特別搏命，曼城在上半場竟可與車仔打成均勢。

但羅馬唔係一日就建成，車仔亦唔係省油的燈。憑迪高指揮若定，卡華奴八面玲瓏，加上林伯妙絕嘅攻門，最終車仔反勝三球，盡顯四大豪門的絕強實力！

可惜泰利過於魯莽，竟然響領先兩球時大意職業犯規領紅，如果因此而缺陣下週戰曼聯一役，甚至會影響英超冠軍誰屬！

如果阿拉伯油王要認真挑戰傳統四強，恐怕要買左十幾件「標王」先有得傾。

兩個神童

2008-09-11T04:10:00.000-07:00

克羅地亞 1 vs 4 英格蘭

唔係講笑，響英格蘭大戰克羅地亞之前已經預感禾確特（Theo Walcott 圖）會唻料，但點都估唔到佢一開齋就玩帽子戲法咁激。

老實講，禾確特響阿仙奴表現認真麻麻，鋒唔似鋒翼唔似翼，身體薄弱一撞就散，入球率低進步緩慢，令人懷疑溫格有冇入錯貨。卡比路畀佢正選出戰兩場重要大戰，其膽量不下於兩年前的艾歷臣。

難怪06世界盃後，謝拉特公開批評「禾確特根本冇資格入選國家隊」！

還好，禾確特仲有良師溫格護航保駕，溫帥話過：禾確特能夠響兵工廠一隊立足就證明佢夠晒資格踢國家隊 — 因為大把英格蘭國腳都未夠水平踢阿仙奴！

呢番說話固然係臭吋無比o既歪理，但以溫格孤寒成癖兼出名鳳凰無寶不落o既作風，肯出到一千萬鎊買一隻16歲小朋友，一定有點過人之處。

論潛質，禾確特不但有遠超同齡球員o既超卓球技，而且具有驚人的快放及變速能力。更重要係佢樸素而成熟o既生活習慣，不煙不酒不慕虛榮（佢仲係渣緊架VW Golf），響紙醉金迷的英超球圈猶如一股清流。

睇返場波，禾確特的三個入球其實唔算好清脆。第一球係對方後衛送禮，第二、三球就因為已經打多一件，加上朗尼o既靚直線，入得冇乜難度。

反觀朗尼就真係打出身價，一個入球兩個助攻，完全係世界級表現！22歲就已經有咁成熟演出，加上禾確特上位，卡比路督師，英格蘭真係前途無可限量。

經濟危機

2008-09-04T05:00:00.000-07:00

有人漏夜趕科場，阿聯酋油王君臨曼城，加劇左英超貧富懸殊局面。

同屬「中產階級」o既韋斯咸同紐卡素，分別傳出易帥消息，而且原因不約而同為「與球會高層產生嚴重分歧」。

個「分歧」係乜，就係錢囉！

首先下馬o既古比士利（Alan Curbishly）之下台，據韋斯咸官方答案講係「領隊為轉會事務失當而請辭」。

的而且確，古帥上季買入o既龍格堡、戴亞、比拿美可以講係「不能再差的收購」，領隊下台有理。但古帥前季助球隊奇蹟地護級成功，足可功過相抵，點解要響開咧第三週就手起刀落呢？

更加混亂o既係紐卡素，領隊基瑾（Kevin Keegan）實際上已經停職，但班主話冇炒過佢，基瑾又話自己冇請辭，好一出《羅生門》！對比起上季賓主相見歡o既情況，實在太過科幻。

兩間球會面對o既相同之處就係：閂水喉！

韋斯咸個冰島富豪班主，由上場後豪擲五千萬鎊招兵買馬，到今季大舉裁員錄得轉會盈利，關鍵在於祖家o既大水喉冰島銀行受環球金融危機影響，收入大跌，被迫開源節流。

同時，紐卡素o既運動用品大亨艾殊利（Mike Ashley）都係因為公司業績大倒退，惟有對增兵勒住勒住，減輕皮費。

本來，同老細共渡時艱，天經地義。偏偏呢兩位老細都選擇左相同o既應變手段 — 另請高明制肘主帥。

因此，古比士利身邊多左個體育總監拿尼（Nani），幫佢送走左主力球員費定南同埋麥卡尼。

而基瑾上面都請多左個韋斯（Wise）做行政總裁，越過領隊直接買賣球員，務求開源節流。

撞正兩位都係老派英式主帥，習慣人事戰術一把抓，自然激到生蝦咁跳。

所謂疑人莫用，用人莫疑，兩位班主o既節流手段太激進，搞到領隊響轉會事務上形同架空。就等如酒樓大廚，連買乜材料都無權置啄，又點會煮得出好菜呢？

大勢所趨之下，除左超重量級主帥如費蛇、溫格之流，英超眾領隊都面對前所未有壓力。

既要有成績、又要踢得漂亮、仲要響轉會市場交足功課？

人無完人，相信往後下台o既英超領隊有排都數唔晒......

無冕之王

2008-06-30T03:47:00.000-07:00

個標題原本係屬於荷蘭嘅，但自從88年荷蘭勇奪國家盃之後，似乎用來形容西班牙更為貼切。

雖云西班牙曾經贏過64年國家盃，但上世紀六十年代西班牙仍身處暗無天日的弗朗哥獨裁政權之下，主場擊敗前蘇聯奪標，當中所含水份極高。

可能係因果報應，此後西班牙無論人腳有幾齊全，牌面幾高班，都難逃8強出局嘅命運。差不多半個世紀過後，當西班牙人自己都覺得冠軍只係水月鏡花之時，新一代鬥牛勇士卻打破宿命結界。

西班牙排在最難打嘅下線，連挫最大黑馬俄羅斯、頑強堅韌嘅瑞典、世界冠軍意大利、及大賽專家德國，六戰全勝，實至名歸。決戰雖然只係小勝德國一球，但全場所佔優勢並不比準決賽狂數俄羅斯一役為小。

老帥阿拉干尼斯繼續顯示其大膽果斷的作風，排出攻力最強嘅4-1-4-1戰陣，並在領先一球之後，英明地以防守力強的阿朗素取代被凍結的法比加斯，其後更換入古爾沙及卡蘇拿，保持西班牙的進攻活力，並有多次擴大優勢機會。

反觀德國，除左上下半場初段嘅虛火之外，因受制於西班牙精巧嘅互傳，全場食塵。波歷克帶傷上陣雖敗不辱，但普度斯基及史韋恩史迪加踢到章法全無，就更令人覺得德軍能入決賽十分符碌。

更冇章法嘅係領隊路維，以信心盡失嘅贊臣入替拿武固然係昏招之最，換入古蘭爾及高美斯打高波，更加係藥石亂投方寸大亂之舉。

對西班牙來講，贏得國家盃係為國家足球隊正名，首次堂堂正正地技壓群雄，登上歐洲之巔。但對世界球壇而言，重要性不止於此。

自88年國家盃荷蘭隊以攻擊足球橫掃奪冠之後，90及96年嘅德國、92年丹麥、94及02年巴西、98及00年法國、04年希臘及06年意大利隊，莫不以功利嘅穩守突擊稱霸一時，追求漂亮足球頓變過時嘅幻想。

終於，擇善固執嘅西班牙，堅持要贏取場面，仲要贏得比賽。結果佢地以瀟灑流麗嘅進攻足球，掃平群豪，奪標而回，可謂大快人心。

漂亮足球，萬歲！

世紀黑仔

2008-06-29T14:18:00.000-07:00

西班牙就打破左宿命，勇奪冠軍。但有個人就總係宿命難違，佢就係絕世黑仔王波歷克喇！

先別說2002年嘅四亞王事件，單係今季，唔計果隻盃仔慈善盾，克仔都「囊括」左聯賽盃、英超聯、歐聯三大賽事嘅銀牌，難怪畀人話「天生一條二奶命」。

六年前踢利華古遜時，球隊實力有限，但仍堅持三線作戰，難免顧此失彼。到加盟人強馬壯嘅車仔時，又撞正曼聯第三皇朝興起。響國家隊面對人材凋零，波歷克單天保至尊，能夠多次殺入決賽已算有交代。

西洋人說十三不詳，偏偏波歷克響球會及國家隊都穿上13號球衣，甚至連響車仔嘅週薪都係13萬鎊。結果搞成咁，你都唔好話唔邪！

決戰前夕

2008-06-29T09:01:00.000-07:00

終於等到08球季最後一戰！

德國對西班牙，絕對唔係熱門嘅決賽戲碼。

一如以往，德國響分組賽踢得一榻糊塗，入到淘汰賽又脫胎換骨，過關斬將殺入決賽，經常發揮超水準，難怪係賽前最大熱門。

過往西軍號稱「外圍賽之王」，而且入到大賽分組都會斬瓜切菜段挺進次圈。但一入淘汰賽就即時走樣，曳兵棄甲。

今屆西班牙能夠一反常態，開局順利，而且越踢越有，與領隊阿拉干尼斯有直接關系。

過往西班牙空有巨星如雲，但內耗嚴重。由於歷史因素，象徵獨裁政府佛朗哥將軍嘅首都一哥皇家馬德里，同代表反政府勢力嘅加泰隆球會巴塞羅拿，一直關系都勢成水火。無論國家隊由皇馬系或巴塞系人掌權，隊內都出現壁壘分明的對抗。內爭不休，又談何團結一致槍口對外爭錦標呢？

然而，現任領隊阿拉干尼斯顯然是個異類，從球員時代到執教生涯，佢都係馬德里體育會嘅不貳之臣。既不屬皇馬，也跟巴塞沾不上邊，正好能中和隊中嘅對抗性。

結果，強如巴塞也只得佩奧、沙維及恩尼斯達入圍，聯賽冠軍皇馬更加只有門將卡斯拿斯及右閘拉莫斯入選。而本季狀態巔峰嘅皇馬隊長魯爾更被無情地放棄，阿拉公公可說盡地一煲。

相比之下，佢更加倚重護級隊華倫西亞（大偉韋拿、大偉施華及馬真拿）與英超兵團（法比加斯、阿朗素、雷拿、艾比路亞都入選大軍）。佢甚至為左安插法比加斯入正選而強行加插與沙維組成雙指揮塔怪陣，結果飽受評擊。

阿拉公公好偏心，但又好鐵腕。當年佢為左鼓勵雷耶斯話左亨利一句「死黑鬼」弄出軒然大波，搞到差D要落台，今年見雷耶斯響馬體會冇表現就即刻叮佢走。甚至連佢響馬體會由細睇到大嘅契仔托里斯都冇情講，國家盃場場都被換出。

結果，西班牙竟然達至前所未有般團結，除左兩炒俄羅斯光芒四射外，肴低意大利及瑞典兩場苦戰，更加顯出呢班後生仔嘅成熟一面。

所以，德國雖然仍係奪標呼聲最高嘅大賽球隊，但我仍然希望呢隊西班牙隊能夠打破宿命，威返一次！

艾度亞悼

2008-02-25T05:31:00.000-08:00

寫左咁耐blog，從未有一刻好似而家心情咁沉重，希望有朝一日，能夠再見到呢個天才前鋒嘅場上英姿。

(敬告各位：唔好因為好奇而上youtube搵呢段片段來睇，因為過程實在太過凶殘喇。更可怕嘅係行凶者仲得到「斯文」、「君子」等讚語，令人十分費解。）

百感交集

2007-12-29T20:24:00.000-08:00

英超07最後一戰

一念天堂韋斯咸 2 vs 1 曼聯

費蛇成日都話：冠軍球隊最重要嘅就係穩定，狀態好時固然會大勝，踢得唔好時都可以「淆」出勝果，尋日作客韋斯咸佢地就差啲做到左。

雖然大部份時間都被槌仔幫壓住來打，但皇牌C朗再顯神通，一個頭槌令曼聯領先上半場。

如果下半場佢球12碼入埋，又會係另一場曼聯表現一般但又險勝之役，可惜，今次嘅對手係格連（Robert Green）。

唔知係唔係因為知道格連響英超已經三度撲出12碼，C朗主射時攞得大盡而宴客，但若呢球入左，就唔會有之後嘅大逆轉。

由贏波英雄變輸波罪人，C朗果然係「關鍵先生」！

以貌取人車路士 2 vs 1 紐卡素

近期，紐卡素領隊艾拿戴斯（Sam Allardyce）比較鍾意作客比賽，因為響主場佢會畀自己球迷噓到暈。

所以，尋日佢雖然輸波（仲輸得好唔抵），但睇到主場領隊格蘭（Avram Grant）被噓，應該會慨歎「吾道不孤」。

論表現，格蘭其實唔失禮，響戰術運用及臨場調度都有板有眼。

被噓？應該唔關戰績事，畀我估，應該係因為佢副尊容。

上手領隊摩連奴被公認為「世界第一靚仔主帥」，典型嘅拉丁情人，忽然換左個老醜、駝背、古縮嘅猶太老坑格蘭，反差的確太大。

所以，到左一月時，隨左襯轉會窗重開可以買下新球員，有時間格蘭都應該去美容院執執佢。

面對現實愛華頓 1 vs 4 阿仙奴

過去七季作客愛華頓輸左四場，拖肥糖簡單直接又略帶細膩嘅踢法，比保頓更剋到阿仙奴。

上半場愛華頓佔盡優勢兼領先一球，早已預感兵工廠將會錄下第二場敗仗。

點知，下半場阿仙奴改變戰術，竟然大踢長傳急攻，仲竟然奏效！關鍵係因為佢地多左一個機會主義者達施華（Eduardo Da Silva）。

呢個前鋒，成場都冇踢過一腳好波，同其他隊格格不入，簡直好似搭檯一樣。但只要你將個波斬上去，佢就有本事送球入網，十分神奇。

溫格領隊多年來一直評擊英超對手高Q大棍，而自己堅持地面進攻，但今場四球中有三球係大腳擁入。

到底係教授自打嘴巴？定係佢已經學精左，知道「一招走天涯」行唔通呢？

英倫國殤

2007-11-24T10:11:00.001-08:00

英格蘭隊終在峰迴路轉嘅情形之下出局，正式與08年嘅歐洲國家盃緣盡。

鞭撻大反派領隊麥卡倫嘅文章如山似海，對其戰術、用人、應變能力，都狠批得體無完膚，詳情不贅。

此時再加一腳抽抽水，已經全無意義。倒不如睇睇英格蘭足球究竟出左乜野事？

球員名過於實：論知名度，碧咸、朗尼、謝拉特、林柏特個個都響噹噹，絕對係家傳戶曉嘅名字。但係點解會唔夠克羅地亞砌呢？

球星名氣響，得力於英超嘅影響力，若論真功夫，英格蘭眾星嘅個人技術同一個巴西二流球員冇乜分別。加上英格蘭絕少有球員出外搵食，形成球風更單一化，遇上技術優秀嘅外援軍團克羅地亞，唔死就奇。

（ps. 英格蘭響世界盃外圍賽又抽中左克羅地亞，真係冤家路窄呢。）

本土帥材凋零：曾經名帥輩出嘅英格蘭，已經淪落到無人可選嘅地步，英超發展越蓬勃，本土領隊就越少空間。

英超成立十多年來，從來未有英藉領隊奪標，而對上一個響四大豪門執教嘅，已經係1998年離任嘅伊雲斯（Roy Evans）。反而，英超嘅雄厚財力成為左培植法國、西班牙、蘇格蘭、葡萄牙名帥逐鹿之地。

相比而言，麥卡倫雖然水皮，但佢已經係係英藉領隊中少有嘅好選擇。

青訓斷層湧現：英格蘭球員個人技術曳，已經唔係秘密。但以往英軍踢嘅所謂「血性足球」，高Q大棍，的確唔多需要技術。偏偏近年四大豪門都重用洋帥，大打歐陸足球，形成本土球員陷入兩頭唔到岸狀況。

而且，英超球隊過於急功近利，傾向買入外來嘅半成品加工（以阿仙奴為表表者），削弱左本土新秀嘅上位機會，令潛質新人只能廁身中下游球隊，大踢粗枝大葉嘅衝撞足球。

兼且，英足總原來想仿傚法國克萊楓丹學校(Clairefontaine)（曾培養亨利、安歷卡、查斯古特）建立國家足球中心，後來為重建溫布萊球場將預算耗盡，令國家級青訓計劃停頓。而家惡果浮現，只怪當初太過短視。

心理壓力太大：英格蘭一直以足球大國自詡，國內傳媒對國家隊成員死咬唔放，所以英軍領隊有「英國第二號人物」（僅次於首相）嘅稱謂。

球員若能榮登英國國腳，往往代表住以萬鎊計週薪及豐厚廣告合約。結果，未夠班嘅死往上爬（如賓特利David Bentley事件），上左位嘅，又怕犯錯驚失去席位，踢起來縛手縛腳。

結果，響名利壓力之下，英格蘭隊每每陷入「越強越強，越弱變弱」嘅怪圈。

講到尾，以巴域克（Brian Barwick圖）為首嘅英格蘭足總高層當然難辭其咎，傲慢、保守、僵化、官僚嘅作風，令國家隊發展停滯不前。如果呢班老X忽唔洗心革面，相信英軍只會繼續沉淪落去。