皇牌殺手

利物浦 1 vs 1 阿仙奴

賓尼迪斯不愧為盃賽專家，連聯賽都一樣用淘汰賽戰術。

先偷一粒守到完場，車仔響歐聯上食過嘅悶棍，今日差D輪到兵工廠領野。

明知隊波冇態，賓帥好巧妙咁利用針對性嘅中場卡位，徹底堵塞阿仙奴嘅攻力泉源 - 法比加斯（圖中）！

尤其係馬斯查蘭奴，繼歐聯決賽成功凍結卡卡後，再次發揮「皇牌殺手」嘅本領，令法比仔一籌莫展。

可惜兩大主力托里斯及阿朗素相繼傷出，令紅軍呢支疲兵雪上加霜。終於在體力下降情況之下，臨完場前走甩左法比仔一次，就慘被扳平。

反觀阿仙奴，縱然開季成績理想，但始終未曾與四大豪門交手，真正實力令人質疑。

今番作客早早落後，加上主隊悉心佈防，眼見難逃一敗（賓尼迪斯執教以來，利記主場對兵工廠全勝）。

但小兵仍能沉著應戰，扳平一球時，攻方三人同時走位反越位兼扯散主隊防線，實在精彩絕倫！如果唔係兩次射中柱，真係贏埋都仲得。

過到呢關，證明阿仙奴初具王者氣質，下週主場迎戰冠軍曼聯，可謂「最強對最強」，絕對期待！

身後之名

英超嘅被炒三人組中，摩連奴嘅繼任人格蘭被喻為面對「不可能的任務」。

既要保持摩帥時代所向披靡嘅戰積，又要贏得精彩有娛樂性，仲要照顧油王佢老人家班同鄉，實在冇乜可能。

新來嘅荷蘭助教唐卡迪（Ten Cate），仲話車仔會以現有班底，踢出「巴塞式」嘅全攻型足球（佢係前巴塞助教），奪取各大錦標，油王一定覺得好啱聽。

問題是：得咩？

結果，車自從作客反勝華西一戰之後，長勝至今。本週大炒以防守堅強著稱嘅曼城6:0，更加證明車仔改踢進攻足球嘅決心。

贏波後，油王見牙唔見眼，似乎笑緊摩連奴：邊個話冇你唔掂呀？邊個話踢攻擊足球唔掂呀？

保頓由前西布朗領隊麥臣（Gary Megson）接任，保頓球迷就唔多領情，覺得佢唔夠班，未必可以令球隊護級成功。咁老實講，麥臣的確從未帶領任何一支英超球隊成功護級，難怪球迷咁悲觀。

至於熱刺，情況就好唔同。

雖然被炒嘅約爾廣受熱刺球迷歡迎，但佢嘅繼任人來頭更大，名氣更響。

西維爾領隊拉莫斯（Juande Ramos見圖）嘅履歷啪啪聲，國王盃、西甲超級盃、歐洲超霸盃，更重嘅係連續兩屆歐協盃霸主，成績之彪炳令人聯想到波圖時代嘅摩連奴，或者華西時代嘅賓尼迪斯。

而且，拉莫斯帶令一批二線球員（如熱刺棄將簡路迪、巴塞棄將沙維奧拿），發光發熱。途中更不斷賣出優質主力（如雷耶斯、巴迪斯達、沙治奧拉莫斯等）套現，仍無損球隊實力，可見其功力深厚。

就算要比約爾最自豪嘅攻擊足球，都一樣比唔上拉莫斯麾下嘅西維爾，上屆歐協四強戰，熱刺正正係畀西維爾K.O.。強如巴塞、皇馬都對佢地嘅攻勢足球聞風喪膽，令拉莫斯成為新一代領隊中嘅典範。

熱刺班主覺得球會萬事俱在，就欠一個頂級領隊，所以對拉莫斯垂涎已久。問題是斟介過程畀狗仔隊斷正，令約爾提早變成行屍走肉（Dead man walking），直接陷球隊於護級漩渦，手法實在太唔漂亮。

原本，拉莫斯嘅責任係打入英超前四，而家就變成護級大戰，實非始料所及。何況，眼見領導層對上手領隊之反面無情，恐防他朝君體也相同。

如果唔係傳說中嘅四百萬鎊年薪，相信拉莫斯係唔敢冒呢個險嘅，可見有錢洗得鬼推磨，實在不假。

死不瞑目

英超領隊「搏炒榜」上，摩連奴爆冷跑出。但結果榜首雙雄 - 保頓李森美同熱刺約爾（圖）都響一週之內「順利」下馬。

李森美自上季尾突然接任後，就一直冇人睇好過，加上成績糟糕，炒得順理成章。同是係由助教升正，約爾就走得更難堪。

以熱刺一嬲「穩佔」英超7至10名嘅實力，約爾執教嘅兩個full season都名列第五，僅次於四大班霸，不可謂無功。

而且，熱刺在約爾麾下，輕常能踢出流暢悅目嘅攻勢足球，連崇尚進攻嘅熱刺球迷都滿意收貨，此為其第二功績。

加上呢幾季，熱刺組軍出色。收購貝碧托夫、比爾、多遜、連儂等既年輕又出色嘅球員，都令人對熱刺前程產生無限憧憬。

約爾之死，原因有三：

一、班主急功近利 - 連續兩季熱刺爭取歐聯席位都失諸交臂，今季眼見穩守第四嘅阿仙奴隨著主將出走實力大減，熱刺主席利維（Daniel Levy）豪擲5000萬鎊，企圖一舉攻入前四名。問題是熱刺始終欠缺豪門底蘊，不但開季連敗，更被脫胎換骨嘅兵工廠作客大炒，難怪主席會遷怒領隊約爾。

二、領隊口不擇言 - 由於上兩季都超標完成，約爾就好似大部份荷蘭同胞一樣咁直腸直肚，開始語無論次。佢會直踩董事局自吹自擂要求加薪，更自誇外面有大把球隊等住請佢過檔。同時，佢又講明以熱刺現在班底而論，聯賽第五已是極限，要打入四強必須再大幅增兵先有得傾。最唔啱聽果句都講埋，老細點會唔搵佢祭旗。

三、人事角力敗陣 - 約爾之能上位，全靠有體育總監晏歷臣撐腰，結果篡位成功，有得坐正。但隨著晏歷臣去左車仔高就，約爾與新總監哥莫利（Damien Comolli）話不投機，受到處處制肘。致有要求買中堅，球會竟然用天價買左載倫賓特返來坐冷板，導致熱刺季初後防不穩嘅困境。

英超領隊響更衣室可以呼風喚雨，好容易令人忘記 - 其實佢只係一個打工仔。

唔識審時度勢，又唔曉韜光養晦，更唔識同高層打好交道，約爾只不過係楊修嘅翻版。

一時瑜亮

本週冇聯賽，睇左一場太公波，英格蘭主場強壓弱隊愛沙尼亞，結果仍然係3:0，無驚無險，但未到終點。

場波就冇乜睇頭，但焦點人物並非場上打生打死果堆，而係場邊坐冷板果個林柏特（圖），因為今次係四年來首次林伯被貶為後備。

最終佢都有得踢，但落場時竟引來主場球迷一片噓聲，實在尷尬萬分。

好多球評家都話唔明點解英國球迷唔鍾意佢，話晒都係英超最頂級中場球星，難得佢又願意為國效力，點解會遭逢此辱？

有人話係「車仔效應」，唔喜歡車路士財大氣粗嘅人，噓林伯洩憤，但點解又唔見車仔隊長泰利畀人柴台呢？歸根究底，主要係因為逢親林伯落場，英格蘭一定踢得唔好！

論球技，林伯係班霸車仔嘅中場發電機，球技毋庸置疑。但兩年來響國家隊未有佳作，開始有人話佢係「球會級球員」。

講到尾，林伯不受歡迎，罪不在己，在於同場仲有一個謝拉特！兩人同屬英超班霸嘅中場指揮官，不論年齡、踢法、位置，都與林伯十分接近，但謝仔係「大賽球員」，踢太公波時特別醒神。

以國家隊教練「將名氣最大嘅球員放晒落場」嘅鐵則，謝老四及林伯被迫「合作」左幾年。更大鑊嘅係領隊麥卡倫傾向以林伯為主、謝拉特為副嘅弱智擺法。結果，兩人走位重疊、隊友群龍無首、林伯浪射頻頻、謝仔疲於奔命......

林伯受傷後，替代嘅巴利與謝仔夾得出奇地好，只因巴利願意為謝拉特做擦鞋仔，等謝仔放心進攻。林伯並非球技不濟做唔到，只係響車仔做慣大哥，唔願意幫人做下手。

所以，林伯之犯眾憎，係因為太講面子，拖累大局，難怪球迷唔畀面佢。

雖然「以謝為主」嘅戰術既定，但英格蘭嘅問題又點呢一個。朗尼同奧雲、費定南及泰利兩對，都好有撈亂骨頭feel，領隊麥卡倫如果唔夠果斷，下下要顧住班大哥嘅面子，再輸波就隨時炒魷，冇得留低。

峰迴路轉

英超第九週賽事

曼聯 4 vs 0 韋根

睇比數，一場典型嘅主場大捷，其實曼聯贏得並不輕鬆。上半場對韋根老鼠拉龜之餘，維迪及奧沙都傷出，好彩下半場泰維斯打開缺口，C朗及朗尼發威，終於瓦解左韋根嘅頑抗。

要我選最佳球員，一定係傑斯！雖然已經三張幾野，但傑斯一舉手一投足都仍然係世界級。曼聯陣中幾個年輕新星名氣極響，但球隊嘅真正主宰，始終都係'92一代嘅人。

至於韋根，真係睇唔出佢有響英超生存嘅實力，相信命運會同打比郡一樣......

阿仙奴 3 vs 2 新特蘭

挾著九連勝加上無敵主場，兵工廠應該大勝可期。事實上，13分鐘已領先兩球，更加令全世界都以為主隊贏硬。

可惜，小兵們傲慢輕敵嘅弱點又出現，加上新特蘭嘅「堅尼精神」驅使，大舊佬鍾斯兩次衝散左閘基治嘅城防，意外地扳成二比二平手。下半場頭三十分鐘都變成阿仙奴圍攻之勢，但場面又急又亂，又中楣又空門，就係冇入球。

但阿仙奴勝在底子厚，後備伊保、禾確特嘅高速改變左形勢。臨完場憑禾確特一個瀟灑無比嘅助攻，加上雲佩斯妙到毫巔嘅快射，險勝三比二。

雲佩斯終於都展現「新柏金」嘅射手潛質，禾確特仍有待琢磨，但兵工廠已經十連勝，霸氣越來越盛。

利物浦 2 vs 2 熱刺

利物浦週中剛踢出賓尼迪斯執教以來嘅最差敗仗（歐聯負馬賽0-1），碰到情況水深火熱嘅熱刺，非勝不可。

又係羅賓遜甩手讓利記早早打開紀錄，但謝拉特自由球中柱揭開左放虎歸山嘅序幕。

羅比堅尼在換邊前後兩度挑射得手，曝露左加歷查、希比亞兩人欠速度嘅弱點。更壞嘅係連中場都畀熱刺嘅流暢互傳控制左，利記連個勢都輸埋。

補時托里斯頭槌扳平，造成兩敗俱傷之局。熱刺聯賽只嘗一勝，領隊祖爾可以執定包袱。利物浦再失兩分，已被榜首三雄甩開，原本季初嘅良好開局煙消雲散。

曼聯擁有豪華嘅正選陣容，但後備力量薄弱。利物浦剛剛相反，後備強得嚇人，但總排唔出一支必殺嘅11人陣容。阿仙奴則由於正選表現太強，令一眾後備人滿為患，口出怨言。

英超三紅，各有各的煩惱。

物極必反

華倫西亞 1 vs 2 車路士

後摩連奴時代嘅車仔，厄運不斷。

聯賽四場不勝、陣中傷兵滿營、新教練格蘭被質疑唔夠班......

首場歐聯分組賽讓摩連奴落馬，次場對華西極可能係格蘭嘅最後遺作。

態沉勢弱嘅車仔，此時要作客對狀態大勇嘅華倫西亞，簡直係不能再差嘅時刻。

而且，華西主場密斯托拉球場（Estadio Mestalla）係著名嘅「英超墳墓」，不論利物浦、阿仙奴作客到此，一律有輸冇和。

巧合地，史上嘅唯一敗戰，就係上屆歐聯八強戰，被車仔反勝1:2一役。

所謂「趁佢病攞佢命」，華西報仇心切，九分鐘就由韋拿先開紀錄，之後更壓住來打，連穩健嘅馬基尼尼都出現大量傳送失誤，弱勢嘅車仔似乎面對一場大屠殺。

但係柳暗花明，車仔憑一個烏龍球扳平，下半場開始沉著應戰，此消彼長之下，華西反而越踢越沉。結果，全靠祖高爾一個世界級直線傳球，帶傷上陣嘅杜奧巴不負所託，以一個快速反擊完成驚天逆轉。

歷史再次重演嘅原因，除左係西班牙人慣性嘅後勁不繼，更重要嘅係車仔部署成功。

馬基尼尼、米基爾及艾辛三個力量型防中，將中後場空間都堵死，加上泰利、卡華奴呢對最佳中堅拍檔，今華西攻勢變成隔靴搔癢。

正所謂「瘦死駱駝都比馬大」，車仔雖然落難，但球員質素仍然超班。祖高爾、馬路達、杜奧巴等靈光一閃，就足以置敵於死地。

而且，領隊格蘭響以色列以善帶弱隊著名，初教強隊車仔面對弱旅死守顯得一籌莫展。難得對華西時被一面倒睇淡，被逼要踢穩守突擊，簡直係開正佢果瓣。

一場勝仗可以改變風向，如果車仔乘勝響英超再次奏捷，相信格蘭帥位暫時可保。