梟雄落難

車仔就仲未知能否重奪英超桂冠，但話口未完，領隊摩連奴就首先帥位不保，果然係「一語成箴」......

就算係摩連奴嘅敵人，都不得不承認佢嘅能力。三年英超生涯奪兩超聯、兩聯賽盃、一個足總盃，實在前無古人。

佢囂張、口臭、狂妄、自戀，但佢吋得起，亦冇人會介意。要數遺憾，相信就係車仔太過功利嘅踢法，同埋未曾染指嘅歐聯錦標。

偏偏，呢兩件就係油王最希望得到嘅野，亦成為賓主決裂嘅導火線。

風暴嘅核心 - 舒夫真高，坐擁英超最高轉會紀錄（三千萬鎊！）及十三萬磅週薪，但場上表現卻叫人不敢恭維。礙於老舒係油王老板嘅死黨，摩帥勉強重用，情形有D似港產片老細鍾意安插情婦做女主角力捧。

奈何名帥都回天乏力，責任卻盡在領隊身上，難怪摩連奴極之唔順超。

加上響車仔，左有行政總簡朗，右有球隊總監晏歷臣，分去左摩帥嘅行政及購買球員權力。今年仲新增一個技術顧問格蘭，擺明插手教波事務。

摩連奴心高氣傲，點會甘心被老細擺佈？

好多領隊羨慕摩連奴有無限金錢，可以組建世界明星隊，卻不知摩連奴嘅對頭費格遜及溫格先至令佢妒忌不已。

費格遜響曼聯有無上權威，一呼百應；溫格響兵工廠對財政、人事、營業事務都「一把抓」，說一不二，絕非飽受制肘嘅摩帥可比。

盛傳上季皇馬同國米都嘗試重金禮聘，但都不得要領，相信係因為兩會會長都有一舖「手指指」癮，鍾意插手球隊事務。摩帥正因前車之鑑，肯定會搵返間對佢絕對信任嘅新東家。

油王以為金錢無所不能，卻不知金錢只能買到多D選擇，但你揀人時人揀你。無足夠嘅尊重，真正嘅人才係唔會屈就嘅。

各奔前程

巴塞羅拿 3 vs 0 里昂
阿仙奴 3 vs 0 西維爾

由於身子孱弱，以致歐聯報告大遲到。

cut左畸寶之後，冇得睇西甲，好耐都冇機會睇亨利獻技。

呢個英超第一球星出走西甲，一方面令人對巴塞「神奇四俠」滿懷憧憬，同時又為頓失支柱嘅兵工廠擔心不已。

難得兩軍同日出擊，可以睇下邊個「活得比你好」？

里昂雖然係法甲六冠皇，但今季將帥出走，聯賽開局不利，已全然失去往日嘅霸氣。作客魯營球場，竟淪為巴塞嘅試招沙包，可算堪苛。

但巴塞都唔見得好好，細哨缺態，伊圖奧倦勤，全靠美斯單天保至尊。亨利踢足全場，但狀態、默契、光芒都欠奉，如果唔係補時執返一粒，實在愧對金靴美譽。

除左美斯，巴塞三個入球都係靠少年軍帶動，如「後備王」恩尼斯達、杜斯山杜士、及年僅17嘅小將赫傑（B. Krkic）。

果然，拳怕少壯！果邊廂「童子軍」阿仙奴更能證實呢句說話。

除左繼續閃耀嘅法比加斯之外，希比、雲佩斯及路斯基都十分出色。

不得不提左閘基治（Gael Clichy）同前鋒艾迪巴約（Emmanuel Adebayor）兩人無私嘅跑動，助攻助守，令實力超強嘅歐聯新丁西維爾上左慘痛一課。

亨利在兵工廠陣中享受住眾星拱月嘅禮遇，去到新東家要重新學習點樣做綠葉。反而一眾小兵響群小無首之際，竟然團結一至地踢出全能足球。遇合之奇，猶如做戲。

當初預言兵工廠會響英超四甲不入嘅專家，而家都應該收晒口。

藍獅憂鬱

車路士 0 vs 0 布力般流浪

如果唔係車仔前鋒S.卡奴（Salomon Kalou）嘅入球被枉判詐糊，如果唔係流浪個龍費度（Brad Friedel）撲到上身，車仔應該可以食魚生粥小勝。

但事實係，缺少左中場林柏特（Frank Lampard）及前鋒「魔獸」杜奧巴（Didier Drogba）嘅車仔，只係一隻冇牙老虎！

情況好似上季失去後衛泰利（John Terry）及鋼門施治（Petr Cech）一樣，佢地前、中、後、龍四人組成嘅中軸線，缺一不可。

作為富豪球會，車仔後備力量仍然強橫，可惜，缺態嘅舒夫真高（Andriy Shevchenko 圖）已非當日嘅米蘭金靴，射門軟弱無力，速度亦完全欠奉，多次門前失機。

來自雷丁嘅薛維爾（Steve Sidwell）瓜代「林伯」嘅中場分波工作，勤力有餘但卡士不足。覺得佢正走緊柏加（Scott Parker）條舊路，希望通過混入豪門再上層樓，無奈幾多成名國腳響車仔都爭唔到後備一席。

因為車仔有的是錢，隨時可以購入世上每個位置嘅最佳球員，根本唔會花時間培養本土人才。薛維爾睇來有點痴心妄想，睇怕坐多一兩年高薪冷板就要出去面對現，搵過頭好人家。

另一方面，錢又並非萬能。事實上，車仔近年買入嘅巨星都明顯水土不服，舒夫唔計，單係波歷克（Michael Ballack）就傷患纏身。始終拳怕少壯，球員過左而立之年，莫講話要適應新環景，能夠無傷無病落到場踢都偷笑。

車仔現在響主場仍然虎虎生威，靠嘅係領隊摩連奴嘅謀略。將一班技術一流嘅國腳級球員，操到肌肉橫生，再訓身全場緊逼踢擦鞋仔波。

場上一堆藍衣巨人橫衝直撞，面目模糊，乖巧嘅洛賓及杜夫下堂求去，以往充滿靈氣嘅祖高爾已被改造成筋肉超人，甚至連老鼠仔胡禮菲都變得硬朗蠻幹...成績係有左保證，但呢種功利足球絕非班主艾巴莫域所樂見。

而且，同一招「力量型」足球已經被睇穿，馬克曉士就話我地「暴力般」都有得出賣。結果，中游隊對車仔嘅恐慌不再，反而峙機偷雞。

車仔已連續兩場對中游隊失分，勢頭實在唔好，如果今屆仍然不能重奪英超桂冠，相信摩帥個位會凍過水。

同城死敵

熱刺 1 vs 3 阿仙奴

講開阿仙奴，就不得不提熱刺（Tottenham Hotspur）。

有別於其他打比戰，熱刺同阿仙奴絕對係歡喜冤家。不但因為佢地同係倫敦最有實力嘅傳統勁旅，而且兩隊更可以話係身負血海深仇。

首先，早在1913年阿仙奴遷址至北倫敦，好揀唔揀，揀著鄰近熱刺主場白鹿徑（WHite Hart Lane）嘅高貝利球場（Highbury）。呢下擺明踩場，已令兩會關係緊張。

估唔到幾年之後，英甲賽會改制，由18隊增至20隊，原本排包尾18名嘅熱刺有望留級，點知畀乙組排第五嘅阿仙奴，洗橫手搶走最後一個英甲位置。英國人最重視公義，熱刺黯然降班之餘，對阿仙奴嘅仇恨已到左不死不休嘅地步。

自此之後，每次兩軍交鋒都踢到飛沙劈石，以性命相搏。但自從二次大戰前阿仙奴傳奇領隊卓文（Herbert Chapman）出現並橫掃英倫之後，熱刺一直都活在兵工廠嘅陰影之下。

至今，阿仙奴已共奪得十三次頂級聯賽冠軍，熱刺則只有可憐嘅兩次。近年車路士獲得油王入股實力大增之下，更連贏兩冠超越左原本嘅「二哥」熱刺，更令其球迷恨得牙癢癢。

好喇！講返場波！熱刺賽前五戰三負一和，領隊祖爾已聞到魷魚香。今場仲係主場對死敵，更要加多兩錢肉緊。

15分鐘就由光芒四射嘅比爾憑死球打開紀錄，實在係不能再好嘅開局。但兵工廠「後勁王」美譽並非白叫嘅，下半場憑艾迪巴約及法比加斯連入三球反勝，熱刺應該敗得心服口服。

熱刺其實踢得唔曳，全場轉捩點係下半場1:1時，見碧托夫勁射被基列治護空門，轉頭就畀法比仔射球世界波反超前。加上見碧托夫及戴倫賓特兩次單刀失機，整定熱刺跌入水深火熱嘅命運。

反觀阿仙奴，上屆此時此地，同樣係早段失波而反勝兩球，最終響補時被熱刺中場贊拿斯勁射扳平，和局終場。今年面對同樣情況，一眾小兵不急不燥，逐點收復失地，踢起來信心十足。

五戰四勝一和高據榜首，又要再一次向溫格領隊至敬！

漂亮足球

（續）世界上，經營有道及目光如炬嘅領隊都有唔少，但同時能兼顧比賽風格嘅就有如鳳毛麟角。

有別於傳統紅褲子出身嘅教頭，溫格開創智慧型「儒帥」嘅先河。

球員時代嘅溫格成就乏善可陳，但佢將勤補絀，靠滿腹經綸彌補威望上嘅不足，加上實戰佳積，逐步攀上頂級領隊行列。

後來者還有候利亞（Gerald Houllier）、賓尼迪斯（Rafa Benitez)及摩連奴（José Mourinho)。佢地用科學分析加上專業化管理來提升球隊戰積都學到足，問題是作戰風格都偏向保守功利，與溫格嘅足球哲學大相徑庭。

溫格對「漂亮足球」（The Beautiful Game）嘅追求，有著宗教般嘅虔誠。要贏，仲要贏得好好睇睇！

在佢指揮之下嘅兵工廠，揉合左巴西嘅靈巧、德意志嘅機動、荷蘭嘅創意、法蘭西嘅細膩、英格蘭嘅勇氣。為左貫徹呢個信念，佢夠膽同時排出四個「10號」型球員嘅中場線（路斯基、希比、法比加斯、丹尼遜）。

前中後場球員，無一不具備超卓個人技術，每個組織都絲絲入扣。而且溫格鼓勵球員張揚性格，攻勢猶如水銀瀉地，阿仙奴被公認為全歐洲踢法最悅目嘅球隊，絕對實至名歸。

然而，溫格對「追求完美」過份沉迷，令球隊攻強守弱，戰積起伏好大。佢嘅慳家兵團由2002年成形，到2004年不敗奪冠達至巔峰，之後開始進入四大皆空時代。

但溫格不愧為智慧型領隊，明知場面上好睇還好睇，球會始終要交數。今屆大膽賣走亨利、龍格堡、雷耶斯等大牌球員，重用冇乜名氣嘅小將，踢起來反而虎虎有威。

能夠量才而用，靈活變通，精打細算，但又能兼顧場面。溫格執教「窮鬼」豪門阿仙奴嘅經歷，絕對係中小企成功個案中嘅典範！

脫胎換骨

（續）溫格另一絕活就係改造球員。

佢相信每個球員都有巨大潛能，通過科學化嘅訓練、克制嘅食療、大膽嘅嘗試，可以將球員隱藏嘅才能完全爆發。

最佳傑作莫如亨利（Thierry Henry 圖）。

加盟阿仙奴之前，亨利頂多只係一個跑得幾快但技術粗糙嘅左翼，每季只入球兩、三粒波。當溫格表明要佢改踢正中鋒時，亨利尷尬地表示：「波士，我其實唔係好識入波...」

基於其翼鋒背景，亨利擁有普通中鋒欠缺嘅超卓盤扭及助攻技術，加上良師柏金點撥開竅之後，佢嘅入球開始源源不絕。

事實證明溫格獨具慧眼，亨利不但識入波，仲係出一個能傳能射能助攻，平均每季入三十球以上嘅超級射手！

另外，將防守中場羅倫改造成右閘、攻擊中場托尼改成中堅、左中場雲佩斯變成中鋒...都係溫格領隊嘅得意傑作。

最新實驗品係英格蘭新星禾確特（Theo Walcott），雖然佢被譽為「新亨利」，但領隊又要佢轉型為翼鋒，暫時睇落就效果麻麻。

但呢條o靚仔只有19歲，響溫格嘅魔法之下，可能好快會一飛沖天。
（待續）

小本經營

擾攘多時，阿仙奴領隊溫格（Arsène Wenger 圖）終於續約至2011年，粉碎左兵工廠主帥離隊、球員星散嘅流言。

點解溫格續約會成為歐洲球壇大新聞？因為佢係當今世上最搶手嘅領隊囉！

響呢個急功近利嘅時代，就算金牌領隊卡比路幫皇馬重奪西甲都要食無情雞...歐聯冠軍領隊安察洛堤上任A米之後，被炒傳聞從未停過...

響競爭更激烈嘅英超，連德高望重嘅曼聯費格遜都好幾次險被開除...

唯獨溫格領隊響阿仙奴地位穩如泰山，兵工廠董事局甚至送佢一塊「免炒金牌」，承諾佢份工可以做足一世（如果佢自己願意的話）。

如果溫格領隊願意轉工，相信最少會有不少於二十支頂級勁旅如皇馬、巴塞、米蘭、車仔等...會不惜天價重金禮聘佢過檔。

究竟佢又有何德何能？

佢嘅第一強項就係「精打細算」！

溫格生於法國小城斯特拉斯堡（鄰近德國邊境），除左擁有法國人崇尚浪漫嘅性格之外，更帶有德國人嘅嚴謹精明。佢通曉英、法、意、西、葡、德語，加上佢擁有經濟學碩士學位，故得到「教授」（The Professor）雅號。

佢覺得英倫三島球員技術粗糙但身價偏高，所以特別喜歡價廉質優嘅歐陸外援。加上阿仙奴財力緊絀，溫格唯有專挑有潛質但寂寂無聞嘅新人，來彌補資源嘅不足。

溫格嘅眼力之強，冠絕歐洲。例如1997年以50萬鎊買入安歷卡，兩年後以2250萬鎊轉售皇馬，已是經典。其他如韋拉、奧華馬斯、柏堤等都屬低買高賣，而當今陣中嘅皇牌球員法比加斯、高路托尼等竟然係免費嘅！

今屆英超各大球隊都大幅增兵，不但曼聯、利物浦等豪門揮金如土，就算中型班如熱刺、維拉、韋斯咸等都起碼燒幾千萬買人。惟獨阿仙奴反其道而行，甚至沽出高價球星，帳面更出現盈餘。現在，一隊中只有禾確特、加拿斯身價過千萬，整支正選陣容加埋都平過朗尼一人嘅身價。

但慳儉之下嘅效果一點都唔失禮，兵工廠至今仍能與實力大增嘅利物浦並列聯賽榜首，溫格調教球員嘅功力實在深厚！
（待續）

一語成箴

職業足球圈係名利場，好多人一朝得志都會語無論次。

車仔領隊摩連奴（José Mourinho）以吋出名，佢嘅名句包括：

"We have top players and, sorry if I'm arrogant, we have a top manager."（原諒我果人係咁直，我隊波唔止有最頂級球員，仲有最頂級領隊 - 即係我！）

"Please don't call me arrogant, but I'm European champion and I think I'm a special one."（唔好話我吋，作為歐洲冠軍，我諗我都算係好特別嘅領隊！）

自此之外，英國傳媒都諷刺地稱佢為「the special one」（跟Harry Potter世界嘅人叫Voldemot做"You-know-who"一樣，互相輝映！）。

另外，利物浦名宿阿倫漢辛（Alan Hansen 圖）響1995批評曼聯，話費蛇打算以碧咸、史高斯等小將為主力係失策之極，因為："You'll never win anything with kids."（靠果班仔，蛇都死啦！）

結果條費蛇當然冇死，班仔連三冠王都贏埋，可憐阿倫伯就畀人講到今日，成為英超史上最大笑柄。

但最估唔到，連生性謹小慎微嘅溫格（Arsène Wenger）領隊都領過嘢。

2002年阿仙奴全季只失三場捧盃，而且整季作客不敗。

溫格「博士」豪言要以全季不敗捧盃："It's not impossible. I know it will be difficult for us to go through the season unbeaten. But if we keep the right attitude it's possible we can do it."

點知話口未完，就響作客愛華頓一場被16歲嘅神童朗尼（Wayne Rooney）一腳射死。更慘嘅係，不敗身被破之後，兵工廠連輸五場，最後將幾已到手嘅冠軍讓畀曼聯。

費蛇當然唔放過機會，狠狠地嘲笑老對手嘅失言。但一年之後，費蛇就笑唔出喇。因為，2003/04英超球季，阿仙奴果然以不敗之身奪標，更創下49場不敗紀錄。

呢隊冠軍隊，史稱「無敵雄師」（The Invincibles）。

所謂遲到好過冇到，溫格領隊同費sir都畀人笑足一年，但時間最終會證明誰對誰錯。

心理質素

阿仙奴 3 vs 1 樸次茅夫

主場加半場揸住兩粒，對兵工廠班後生仔來講，係順風波，好好踢。

好可惜，論盡嘅辛達路斯又一次闖禍食紅牌。

畀著上季，班小兵會頂唔住壓力自亂陣腳，然後畀如狼似虎嘅老樸追和。

但今次班小朋友成熟左，頂住對手反撲之餘仲偷雞整多一粒，縱使簡奴扳回一球，都改變唔到結果。

呢兩季，兵工廠綽號後勁王，下半場末段竟然壓住打多一件嘅老樸來打，初生之犢真係唔講得笑！

中場巨人

利物浦 6 vs 0 打比郡

雖然對手只係降班膽打比，雖然打比呢場亦發揮失常，但係六比零嘅戰果仍然未能反映賽程有幾一面倒。

阿朗素及托尼斯都梅開二度，連敗家仔巴布都開齋，但最令人印象深刻嘅，應該係阿根庭國腳馬斯查蘭奴（Javier Mascherano 圖）。

雖然馬斯仔五短身材（身高1.75米），但佢意識好、卡位靚、剷波準，加上超強嘅閱讀球賽能力，差不多每次一觸球就會轉守為攻。

利記全場佔盡優勢，瀟灑流暢，在當今英超所有球隊中，最具冠軍相！