殘而不廢

球星，通常都得天獨厚。

靚仔如碧咸、聰明如告魯夫、有錢如朗拿度。

就算唔靚仔唔聰明唔有錢，起碼都一定有健康嘅體魄。

但係，世事總有例外嘅......

早兩日，西維爾嘅年輕國腳佩亞達（Antonio Puerta），就因為比賽中心臟病突發，與世長辭，享年22歲。

跟佢同病相憐嘅前輩，有尼日利亞國腳簡奴（Nwankwo Kanu）。

簡奴18歲就奪得奧運金牌，加入豪門國米，
點知驗出有心臟病，結果要做心臟手術，仲休息左幾年。

好彩阿仙奴夠膽搏，平價將佢購入，仲成為兵工廠主力。
到今年三張幾野，仲響老樸搏到張新約，老而彌堅！

簡奴同期仲有荷蘭國腳戴維斯（Edgar Davis），佢比較好彩，
只係衰青光眼，結果佢比賽戴住果個特製眼罩，成為左佢嘅標誌。（圖）

好笑在，因為眼鏡贊助合約問題，
佢醫返好對眼後，仍然要戴住果對野比賽。

至於最出名果個，就梗係當紅炸子雞美斯（Lionel Messi）啦。

佢12歲時被發現生長激素出問題以致發育遲緩，
家人缺定搏一鋪，舉家移民西班牙，方便佢求醫。

好彩，巴塞球探慧眼識英雄，
不但負擔全部醫藥費，仲養起佢全家。

如今美斯貴為天皇巨星，仍然對巴塞忠心耿耿，
就係因為巴塞冇因為佢係病人而放棄佢。

但論身體有缺憾而成就最高嘅球星，
必定係巴西國腳加連查（Garrincha ）！

雖然佢天生殘缺（真係好殘，天生長短腳，左腳仲係攣嘅），
但仍被世人公認為「盤球之王」，
扭波時落腳方向刁鑽，鬼神莫測。

人稱球王比利三奪世界盃，其實1962果屆比利受傷冇得踢，
巴西之稱霸，全靠綽號「小鳥」嘅加連查單天保至尊。

可惜嘅係，加連查雖然克服到身體嘅殘障，
但始終都未能克服自己嘅心魔。

1983年，「小鳥」因嚴重酗酒逝世，
臨死時，家財散盡，妻離子散，享年49歲。

一球成名

無錯，今次唔係講波，係講電影。

唔知大家有冇睇過電影《一球成名》（Goal!），當初聽到簡介都好期待，話晒Adidas打本，國際足協全力支持。

不但有真實比賽片段可用，甚至有球壇巨星親身客串，仲學《魔戒》咁樣一拍就三集，應該好有睇頭。

故事好簡單：阿根庭天才小子流落洛杉機，巧遇倒霉球探獲邀遠赴紐卡素試腳，由於隱瞞自己哮喘之患，險被開除，結局當然係逢凶化吉扶瑤直上轉會皇馬問鼎歐聯最後捧埋世界盃......咁就三集收工！

其中前段與曼聯中鋒沙哈（Louis Saha）當年去紐卡素試腳時遭遇一模一樣，唔知有冇畀返版權費沙哈呢？

講左咁耐，究竟好唔好睇呢？

套戲嘅製作有「畢直」，拍攝又認真，
如果你非常非常之得閒，咁當睇一部B級商業片殺殺時間，係無妨嘅。

但如果你想睇一套好睇嘅「足球故事」，恐怕會大失所望。

最大問題係：我敢肯定套戲嘅導演、編劇、甚至主角，都係完全唔識踢波嘅！

例如，球探第一次見到主角響業餘球隊大顯身手時，
原來主角只係耷低頭望住個波向前衝，
演防守球員嘅就好狼狽咁避開佢扮被佢扭過......

但咁未夠爆笑。更離譜係，主角雨中苦練罰球，
終於感動教練畀佢踢正選，但佢只係對住幾米外無人守嘅空門射球，
而個波就軟弱無力咁碌入正中間......

相信去麥花臣求祈搵個十歲嘅仔都冇可能踢得比佢更差。

好難想像，堂堂世界第一足球品牌Adidas再加國際足協嘅監察之下，
都會遇上咁大個騙局！

2005年時第一部曲《The Dream Begins》竟然有得響香港上畫，
唔洗講，套戲嘅票房當然好嚇人。

如果唔係今年響大陸見到第二部《Living the Dream...》四蚊一隻嘅老翻，真係以為套野已經胎死腹中。

傳聞話第三部仲堅持會響08年上演......
有時，越成功嘅人就越難承認自己所托非人，唯有死撐到底。

話說回來，歷史上好似冇乜關於足球嘅電影成功過，
而呢種電影實在好難滿足到觀眾要求。

鬼咩！你哋都識得講：利物浦半場輸緊三粒都可以響六分鐘內追返，真係好睇過戲呀！

光芒四射

曼聯 1 vs 0 熱刺

曼聯終於打開勝利之門，新兵蘭尼處子入球奠定勝局......但真正嘅光芒，來自兩個熱刺球員 - 貝碧托夫（Dimitar Berbatov）及比爾（Gareth Bale）。

貝碧托夫上季登陸英超，能傳善射，腳法、速度、自由球都有一流造詣，盛傳曼聯費sir早想收為己用。今次正面交鋒，更加證明費sir法眼無差，貝碧托夫雖然帶傷上陣，仍然令曼聯後防風聲鶴唳。如果唔係「奧脫褔法則」再次發功，佢早應射入兩球，而維迪及布朗都要食紅牌離場。

另外，熱刺小將比爾首次參戰英超，表現遠比名氣更大嘅修咸頓師兄弟禾確特（Theo Walcott）出色！佢不但未有怯場，更多次利用高速與盤扭撕破曼聯防線，而且更包辦熱刺大部份死球，落點準確急勁，甚具大將之風。

四戰三敗之後，熱刺想請教練約爾（Martin Jol）食炒魷魚之聲，甚囂塵上，觀乎約爾買入嘅小將質素，可知佢係有料之人。奈何熱刺班主三心兩意、急於求成，呢個荷蘭教頭未必有機會等到修成正果一日。

半場報告

熱拿亞 0 vs 3 AC米蘭（半場結果）

雖然冇再用畸堡，攪到冇得睇西甲，好在NOW仲有意甲，結果都睇返一場賀開「咧」！

睇牌面，強弱懸殊，歐洲冠軍對升班馬，米蘭基本上贏梗，但估唔到贏得咁輕鬆。A米基本上都係上屆季尾班底上陣，排個451，基拿甸奴單箭頭，算係畀面對手，當打少一個。基拿甸奴亦「不負眾望」，不斷犯越位之餘，面對空門亦冇浪費任何「撻Q」嘅機會。可以想像，如果出左F.恩沙基或者大哨，恐怕主隊半場起碼要吞半打光蛋。

但係，「十人應戰」嘅米蘭仍然係銳不可擋，冇傷冇病嘅尼斯達（Alessandro Nesta）（見圖）絕對係我心中嘅世界第一中堅，殺波神準，無懈可擊！左右二閘贊古諾夫斯基及奧度不斷上前助攻，話過就過。在中場掃蕩上岩布仙尼及加度素仍殺晒；施多夫在走位及入滲都繼續保持良好狀態；派路嘅長傳直情好似裝左雷達咁準確；至於卡卡，平時賴賴閒，一攞到波就爆開晒對手後防，半場梅開二道，兵不血刃。

縱觀米蘭表現，悅目流暢，攻堅守穩。而且後備席仍有大哨、大恩、新兵艾瑪臣、比圖等枕戈待發，可以話係當今歐洲球壇最可怕嘅球隊！至於場波，套句國內述語：真係「毫無懸念」，冇乜心機睇落去......

事有湊巧

阿仙奴 1 vs 0 曼城

「曼城終於失球」、「長勝之師斷纜」可能係呢場波響體育版嘅標題，但更吸引我嘅係下半場阿仙奴果球12碼。由雲佩斯操刀射小舒米高把關嘅大門？心中即時湧起不詳之兆。

諗返1999年足總盃準決賽中，阿仙奴領先一球之下仲得到一球12碼，柏金操刀畀舒米高撲出後，曼聯最後奇蹟反勝晉級，最終完成三冠王霸業。因為呢單野，柏金以後都唔敢再射12碼。

小舒米高固然有乃父之風，雲佩斯嘅綽號正是「新柏金」，兩代傳人交手嘅結果，係歷史再次重演，都係唔入，邊會有咁邪架？

好彩，阿仙奴不愧為「後勁王」，狂攻80分鐘之下，終於由法比仔奠定勝局，總算補返雲佩斯隻鑊。曼城雖敗不辱，全場與兵工廠打成均勢，問題是欠缺一個有卡士嘅前鋒殺手，相信班主他信又要破財喇。

創意工業

英國佬話：想發達呀？一係去唱歌，一係去踢波！娛樂事業講創意靠包裝，原來足球事業都一樣。

風靡全球嘅英超聯，唔單止係足球界革命嘅商業操作，更加係「大危機變成大商機」嘅最經典個案。

你咪睇英超而家風光無限，佢成立之前的英甲簡直係頻臨絕境。由於85年希素球場慘劇（Heysel Stadium Disaster）及89年希斯堡球場慘劇（Hillsborough Disaster）導致過百球迷喪生，英格蘭球隊在歐洲被無限期禁賽。失去歐戰收入嘅同時，英國政府又勒令各球會必需徹底改建球場達致安全規格。當時大部份球場都只有簡陋嘅企位，要全部改成坐位起碼都要洗幾千萬鎊。大球會固然無力發展，細球會又頻臨破產，簡直係屋漏兼逢連夜雨，情況十分絕望。

無巧不成書，時值新聞集團主席梅鐸（Rupert Murdoch）創立收費電視天空頻道（SKY TV），由於缺乏重頭節目，訂戶反應極差。該台每天虧損以百萬鎊計，情況與當時嘅英國球會不相伯仲。後來梅鐸眼見英國人民對足球賽事嘅熱情，令佢靈機一觸，想到豪賭最後一鋪 - 從免費電視台手上奪取頂級聯賽嘅播映權！

於是，佢開始慫恿以曼聯、阿仙奴、熱刺、利物浦等大球會牽頭組成委員會，爭取脫離英足總管理，自組英格蘭超級聯賽，改變左原本球會同電視台個別議價獲取微薄轉播費嘅狀況，轉而由英超聯會代表所有英甲球隊統一招標爭取最大利益。結果，早有默契嘅天空頻道以數億鎊天價購下英超獨家播映權。從此，免費足球直播成為絕唱，而天空頻道有左英超呢個皇牌節目，上客量暴升，終於響一年之內從破產邊沿轉虧為盈，成為全歐洲收費頻道中嘅龍頭。

英超成立之後，形成一個「巨額轉播費幫助英格蘭球隊安然渡過難關，仲有餘力將球場重建 > 新球場座位大增，設施煥然一新 > 現場氣氛熱烈，觀眾入場率及直播收視率上升 > 球會收入大增，有盈餘收購世界級球星 > 結果帶動轉播費不斷攀升」嘅良性循環。時至今日，英超已經壓倒意甲、西甲成為世界第一聯賽，亦都係世界各地聯賽參考嘅楷模。

英超嘅成功，集齊天時地利人和嘅因素。如果冇梅鐸當年嘅靈光一閃，歷史可能會改寫，但更重要嘅係，英國人面對逆境時果種堅毅不拔，加上在規劃、包裝、經營的才能，令英國足球浴火重生。

香港政府成日話要攪創意工業，但多年來只係識得整埋晒D「乜乜港、物物港」，又或者響大學狂開課程訓練設計師、程式員。我建議班高官睇多啲英超，攪清楚乜野先至係「創意工業」。

新太空人

都話中港融合越來越快，港人北上工作機會不斷增加（包括小弟），連香港足球界人士都唔例外。

最近NOW取得英超播映權，並招納資深旁述員丁偉傑，其實除左香港亞視體育，傑仔一直都有講開英超及歐聯，但就唔係香港o既電視台，而係廣州競賽頻道。響廣州東站撞過佢幾次，每次都行色匆匆面無表情，冇辦法，中港穿梭畢竟累人。

另一個香港球評人何輝溶入祖國就來得更徹底，離開星加玻ESPN後，佢就移居廣州長駐珠江體育，仲娶左珠江台o既靚女主持人，落地生根。但早排響廣州見到佢同件高少女拍緊拖（真係好索架！），喁喁細語，幾鬼煙靭，可能響呢方面輝哥都配合中國國情，入鄉隨俗，艷福不淺。

評述員北上，多少仲有點老本可咬，職業球員要北上發展就難得多喇。早年香港甲組足球聯賽走下坡後，香港足總曾建議香港球隊加入中國超級聯賽尋找出路，奈何中國早已非港燦眼中果個窮親戚，當然睬你都有味！要打入中超，唔係靠英文好、識吹水就得，靠o既係球員自己實力。好彩，香港仲有個吳偉超！（見圖）呢個南華小將23歲時毅然孤身北上試腳，吃盡苦頭，終於成為中超班霸上海申花o既主力，並以連續o既入球來證明自己。

比起好多自以為係香港人上到大陸就應該高人一等o既港燦，吳偉超o既成功來得特別珍貴，特別值得尊重！

奪冠保證

2006年初夏時，在意甲積分榜上，國際米蘭又已被祖雲達斯及AC米蘭遠遠甩開，自1989年以來未嘗奪標o既國米，又一次提早畢業。國際o既超級富豪會長格洛堤（Sergio Cragnotti）為左重溫意甲舊夢，十年來都掏出上億現金買球星，但結果都係食白果。呢次佢真係忍無可忍，要同佢個契仔領隊文仙尼（Roberto Mancini）講：「文仔，為左冠軍，我再冇選擇，只能夠搵卡比路。」卡比路何許人也？一個意大利藉o既老牌教頭囉。但佢有一項世上獨一無二o既紀錄 - 無論執教任何球隊，都必定能夠響第一季就奪得聯賽冠軍！最後，因為意甲爆出假波醜聞，祖雲達斯降班，卡比路著左草去皇家馬德里，文仙尼先可以留響國米。但卡比路o既不敗神話，響西斑牙延續落去......

卡比路（Fabio Capello）執教生涯始於米蘭青年隊。九十年代初期，佢按掌AC米蘭後，不但即時奪冠，仲係罕有o既意甲三連霸。1996年皇馬被巴塞羅拿「夢之隊」壓得抬唔起頭時，卡比路應邀赴任，並即時壓倒巴塞奪得西甲冠軍。之後佢輾轉回歸意甲，竟然同樣響執教o既第一個full season就令弱旅羅馬封王！然後，卡比路令人意外地跳槽祖雲達斯，效力兩季再拿下兩個意甲冠軍。直至舊年，卡比路轉戰西甲，再次帶領皇馬壓服橫掃歐洲o既巴塞夢幻二隊。

卡比路的必勝之道，在於：

1. 敢於用人 - 請得起卡比路o既老闆都係超級巨富，佢亦唔會幫老細慳住洗，從A米年代天價買入波班、沙維斯域，到皇馬時o既沙維斯域、羅拔圖卡路士，再到羅馬o既巴迪斯圖達及中田英壽......卡帥買人從不手軟，只要o岩用，幾多都畀！套句國內同胞o既話：「大氣啊！」同時，卡比路又好夠膽用新人，A米時o既彭路基、皇馬o既魯爾、羅馬o既迪羅斯都經佢一手提拔而扶瑤直上，用人唯才係佢o既不變原則。

2. 鐵面無私 - 年輕時卡比路係一個以硬朗見稱o既防守中場，佢仲將鐵血原則帶到球隊更衣室，紀律永遠行先，天王都冇情講。例如上季佢響皇馬時，世界足球先生朗拿度都要入雪柜；情同父子o既卡辛奴都冇情講；甚至十年前佢親手帶到皇馬o既門生卡路士都冇得留低...其他球員更加不敢做次。所以，卡帥治下，軍令如山，學吳孟達話齋：「而家唔係踢波，係打仗呀！」

3. 必勝信念 - 卡比路擁有永不言敗o既精神，有時甚至知其不可為而為之，對佢手下有強大o既感染力。上季一度遭逢西甲三連敗，積分被巴塞及西維爾遠遠甩開，但卡比路仍堅信自己金漆招牌，並在多場賽事中逆轉反勝。加上知人善任，在其手下重獲新生的球員如簡拿華路、魯爾、古迪等，都對領隊能力深信不疑，結果皇馬奇蹟地後上壓倒巴塞及西維爾奪標。

不幸o既係，皇馬重蹈覆轍，再次響主帥奪標後就殺功臣炒教頭。觀乎新帥蘇斯達每戰皆北o既狀況，皇馬而家應該十分後悔。好有興趣知道卡比路仲會唔會再出山呢？下次又會將奇蹟帶到邊支球隊呢？

自由後衛

年輕一代球迷可能未必知乜野叫「清道伕」呢個old school名詞。

「清道伕」（sweeper）又稱「自由人」，響上世紀七、八十年代十分盛行。由荷蘭飛人（The Flying Dutchman）開創全攻全守o既「全能足球」（Total Football）開始，足球戰術產生左革命性o既變化。為左對抗荷蘭人，「清道伕」踢法應運而生，由德國史上最偉大球員碧根鮑華（ Franz Beckenbauer）發明，在整隊全攻全守之餘，再加多一個自由後衛。

佢冇固定o既站位，防守時會響中堅之後包抄，又會引球出擊，成為轉守為攻o既樞鈕。所以，自由人需要具有超卓o既大局觀，瞻前顧後o既視野，以及跑唔完o既氣力。「凱撒大帝」（The Kaiser）踢攻擊中場出身，但到佢事業最高峰o既1974年西德世界盃時，已經完全轉型為清道伕。當年西德擊敗荷蘭固然得力於主場之利，但後世球評多認為清道伕碧根鮑華o既踢法先至係盡得「全能足球」精粹，其實西德人只係以「以彼之道還施彼身」！

此後雖有如西德人歐真泰拿（Klaus Augenthaler）及法國人阿武羅（Manuel Amoros）般出色o既自由人，但下一個世界級「清道伕」卻來自意大利。

八十年代荷蘭三劍俠率領AC米蘭橫掃歐洲，但全隊o既攻守核心其實係隊長F.巴里斯（Franco Baresi見圖）。佢集中堅與清道伕於一身，係世上唯一令碧根鮑華自愧弗如o既自由後衛。學Peter話齋，雖然佢「走得慢、冇速度、唔夠快」，而且技術粗枝大葉，但佢擁有超強o既閱讀球賽能力、先知般o既包抄能力、加上精準o既長傳，而且經常引球出擊，令敵衛防不勝防。F.巴里斯令「清道伕」踢法達致前所未有o既高峰，而且佢悠長的職業生涯只效力過AC米蘭，更曾隨隊降班都不離不棄。為左記念呢個米蘭隊史上最偉大o既後衛，佢o既球衣跟隨佢一齊退役，AC米蘭自此就再冇6號球員。

隨著戰術變化，球員分工越來越細，能一身兼數職o既自由後衛買少見少。自東德自由人森瑪（Matthäus Sammer）退役之後，世上就再冇真正意義上o既清道伕踢法。

不過，能夠以一人之力照應前中後場，只會發生於22人咁大o既足球場內。大部份中小企業老闆創業時都好鬼「清道伕」，好多時身兼數職胼手底足湊大公司，問題是規模變大之後，點樣將權力下放，同時又能保持看透全局o既視野？咁先至係企業轉型o既樽頸。

世界上，又有幾多個F.巴里斯呢？

巨星偶像

超級球星都係萬人偶像，但佢地自己o既偶像卻好多時會令人意外。

比較正常o既有前阿仙奴球星亨利，佢堅持要著14號球衣以表示對偶像告魯夫（Johan Cruyff）o既敬仰，今季佢轉投巴塞，穿上荷蘭球王留下o既14號球衣，可說心願得償。

亨利o既新拍檔細哨原名朗拿度，為左避佢偶像大哨朗拿度（Ronaldo)之諱，改稱「小朗拿度」（Ronaldino）。還好朗拿甸奴踏著偶像的足印，不但平左大哨三奪世界足球先生紀錄，更青出於藍，成為新一代巴西球王。

細哨少年時正值朗拿度如日方中，封佢做偶像一o的都唔奇。但當世第一球星o既偶像就十分之騎呢，AC米蘭巨星卡卡（Kaka）個偶像就係巴西傳奇球星蘇古迪斯..............個細佬萊爾（Rai）！萊爾曾經同卡卡一樣係巴西國家隊十號球衣o既主人，但佢響1990年世界盃o既表現就被廣泛評為「有史以來最弱的巴西十號」，十分丟架。

但更令人尷尬o既選擇係來自阿根庭首席球星美斯（Lionel Messi），雖然被公認為球王馬勒當拿o既最佳接班人，但佢o既偶像唔係老馬，竟然係薩拉哥薩中場艾瑪（Pablo Aimar）！美斯每次講起第一次取得艾瑪親筆簽名時，都會興奮得手舞足蹈，可憐艾瑪響阿根庭國家隊只係大後備，有得落場都只係能夠做美斯o既替補。美斯冇機會同偶像同場獻技，都只能夠怪自己太過好波，攪到佢偶像都冇得踢。

不過，最離譜o既應該係法國球王施丹（Zinedine Zidane），佢偶像當然唔係柏天尼，但都冇理由會係法蘭斯哥利（Enzo Francescoli）卦？法蘭斯哥利（見圖）係八十年代o既烏拉圭國腳，響歐洲球壇成就乏善足陳，但由於施丹係死忠馬賽隊（Olympique Marseille）擁躉，當年踢馬賽o既「王子」法蘭斯哥利o既球技令施丹著迷。廣為世人傳頌o既「施丹轉身」其實係模倣「王子」o既絕招「馬賽迴旋」（The Marseille Turn），施丹首次在法甲對陣馬賽時，仲追住偶像唔放要求交換球衣。後來，施丹仲將長子取名Enzo Zidane（個衰仔仲幾鬼好波，請看下面條link），估唔到施丹外表冷傲，原來竟然係一個瘋狂Fans！

每次接受訪問時，對於有一個比自己好波十倍兼出名一百倍o既「粉絲」，法蘭斯哥利都顯得十分尷尬兼冇癮。有時，受人愛戴都唔一係定係好事......

《Enzo Zidane's Video》

第十二人

利物浦 1 vs 1 車路士

豪擲四千萬鎊之後，利物浦終於都展現皇者霸氣！面對宿敵車仔，利記首次在全方位擁有壓倒性優勢，不但防守嚴密，而且進攻流暢，托里斯開齋一球更加有亨利o既影子。連車仔一嬲o既強項 - 後備兵源都被利記壓倒，相信冇邊支英超隊擁有巴布、高治、馬斯查蘭奴、禾朗連、班拿約等球員，都能夠擺晒響冷板曬太陽。

車仔全場受壓，落後一球時亦冇板斧再變，勢估唔到球證史泰奧斯(Rob Styles)會「私人醒」一個子虛烏有o既12碼畀佢地，加上施治、艾辛演出神勇，車仔得以全身而退。利記球員投訴，球證仲整多件黃牌你嘆，真係好鬼型，a referee with Styles!

陰謀論時間：球證幾個關鍵判決都匪夷所思，唔通車仔表面上閂水喉唔再投資買大牌球星，實際上係「精鋼用在刀口上」，學意甲豪門一樣玩「打多一件」？

科技白痴

富咸臨完場前攻入追成二比二平手的一球，點知兵荒馬亂之際，米堡門將把已完全越過白界o既足球撥返出去，旁證竟然判入球無效，富咸因而全失三分。

富咸職球員當然唔服氣，但更經典o既例子，應該係兩季前熱刺作客曼聯，完場前文迪斯遠射中楣反射入白界超過一米，竟然都被判唔入！如果球證旁證唔係齊齊發雞盲，就一定係傳說中o既「曼聯法則」** 在作怪。

人地美式足球N年前就開始用即場視頻重播，幫助球證判定具爭議性判決，國際足協以「重播視頻會影響球賽流暢度」而否決。前幾年又有一間德國公司發明左一套判定越位球系統，又被否決。舊年Adidas提議用「晶片足球」幫助判定足球入白界問題，同樣被國際足協否決。

先別說NFL、NBA等不斷隨住科技進步而改進o既聯賽，就算保守到極o既英國溫布頓網球賽，今年都引入左鷹眼系統，減少司線爭拗。究竟國際足協班老鬼有高科技恐懼症丫？定係要留返o的「人為」o既元素畀球證去自己「演譯」﹙造波）呢？

** 笑話一則：盛傳英超球證在奧脫褔只能作出對曼聯有利的判決，原因為何就無從稽考。

萬年老二

英超頭場，保頓領先之下被老樸反炒三比一，成為第一支三連敗o既球隊，如果冇乜大意外，保頓肯定係今季降班大熱。

上屆強人領隊艾拿戴斯出走紐卡素，由副手李森美瓜代。李森美都算醒目，一於蕭規曹隨，保留大部份主力，踢法上照板煮碗，繼續踢簡單足球，甚至連大Sam哥套大褸加耳機都抄埋，應該冇死喇卦？奈何形似神不在，揸旗第一場就撞正個舊老闆，半場未到就硬食三蛋，即時打回原形。

做副手，只要夠經驗夠盡責就OK，但坐正做領隊，就更需要領導魅力。大Sam哥雖然其貌不揚橫肉滿面，但佢果種果斷堅毅，就並非老好人李森美所能模仿。

以保頓投資咁噏縮，如果唔係艾拿戴斯，一早就應該降班。李森美個位睇唻坐唔到季尾，佢都係拿林搵返個助教位撈下，於人於己都係好事。

虎父犬子

講起曼城，初初望見佢個龍個名，嚇左一跳，叫「舒米高」（Kasper Schmeichel），乜咁大整蠱？聽旁述講先知，原來真係丹麥傳奇鋼門舒米高個仔，唔怪得個樣咁鬼死似...小舒米高成就如何，有待觀察，但係球壇上名將第二代下場都唔多好，希望佢好自為之。

一心繼承父業o既有尤迪.告魯夫（Yordi Cruyff)，平心而論佢都算係技術出眾o既天才球員，踢過巴塞羅拿、曼聯、艾拉維斯等勁旅，以一般人來講，有佢咁o既成就都應該十分滿意。奈何佢老豆約翰（Johan Cruyff)名氣太大，相比起堂堂三屆「歐洲足球先生」、「二十世界歐洲最偉大球員」、「荷蘭球王」，小告魯夫o既表現實在上唔到台盤。

不過，另一個球王之後際遇更加不堪。號稱「球王中o既球王」比利（Pele）個仔艾甸奴（Edinho）曾經係山度士門將，職業生涯一事無成，咁都算喇。退役後佢仲衰謀殺、販毒，多次被判入獄，最近先出冊，唔知幾時又會發作。比利貴為巴西體育部長，真係乜面都畀佢丟晒。

含住銀匙出世，起步時固然快人一步，但係如果自己冇真材實料，父母o既顯赫反而害左佢。每次睇見李氏兄弟，都會諗起果句「養不教，父之過」，首富又如何......

講波之王

講到足球，當然不能不提華人足球評述員中o既皇者 - 燈神黃興桂！

Peter Wong除左買大開細專畀山埃貼士之外，更厲害o既係佢o既「創意」！唔係講笑，有時撞正場波悶到飛起，好彩有皮蛋黃插科打諢，真係齋聽佢9噏都值回票價。


附上網上流傳《燈神語錄101條》。

1. 領先一“粒”
2. 波係圓，係用來踢既
3. o係今場波邊隊能夠入一“粒”先，果隊就會有優勢
4. 睇波呢家野，睇得波多咪睇到多d好波囉
5. 防守“生”波
6. 罰波
7. 好急勁既罰波
8. 呢個罰波係o係右路偏左既位置
9. 每隊波都要有個好既死球專家 <-----經典...
10. 每隊波都要入“燕梳”既第二球
11. 所以話，現代既足球每隊波一定要有一個罰波專家12. 現代既足球，係將皮球送入網窩裡面既
13. 現代足球講求有實力，有速度
14. 現代足球最緊要攻守兼備
15. 呢球波拉得咁行，唔係用腳背，係用腳既肉心呀
16. 射波最緊要射中個龍門
17. “浪射”
18. 當一隊波進攻既時候，另一隊就需要去防守
19. 十二碼呢家野呢，有兩個可能性，一係入，一係唔入
20. 呢球波一係入，一係龍門救到，一係出界
21. 呢球波，如果冇龍門就入喇
22. 呢球波射得恰到好處，唔太高，唔太矮，唔太勁又唔太遠，總之就入啦
23. 一個好既守門員可以令到場波由輸變和，由和變嬴
24. 哈哈，龍門最好既朋友係邊個呀？咪係龍門柱囉
25. 呢球波 keeper 有反應
26. xx龍門又再一次勇救險球
27. 幾時都話，後防好緊要，紐卡素就差係呢度〔利記對紐卡素重覆了大約十次〕
28. 防守球員犯左腦筋上既錯誤
29. 拿…做防守球員最緊要係咩呀？咪“安全第一囉”
30. 條防線包得無深度，裝越位失敗，咁咪失波咯
31. 個防守球員回波比龍門回得唔好，不過唔緊要，佢地好friend架，唔會鬧佢架
32. 做前鋒最緊要有力
33. 識轉身既前鋒好值錢
34. 後生、有身材、有活力 (唔係講緊女丫)
35. 當打、有態、有身材 (都唔係講緊女丫)
36. 呢位球員打法好經濟
37. 呢隊波好有性格
38. 睇下隊波肯唔肯打d藍領足球
39. 場波已經擺左落雪櫃
40. o拿，傑仔！呢 D 咪就係好波囉
41. 波唔使講架，球迷自己識睇
42. 呢場比賽我只可以用“一個字”黎形容---精采
43. 嘩！睇呢場波就興奮過食興奮劑
44. 球迷們有福喇
45. 球迷們，足球就是這樣的
46. 好波不妨一睇再睇<---正
47. 本死無大害
48. 在傷口上加鹽
49. 有時呢 D 野真係時也命也喇
50. 陰溝裏反船
51. 陰philosophy裏反船
52. 西班牙球會奧沙辛拿(Osasuna)=「奧沙桑拿」
53. 新特“能”
54. D 利物浦球迷唱緊佢地既會歌——你永遠唔會一個人行路
55. 呢場波利物浦唔理嬴幾多球，總之一定要嬴
56. 呢球波係咪真係紅軍既利物浦出界架？好似擦到藍軍球員既波襪架喎
57. 愛華頓呢隊波蔗渣o既價錢，但係踢出燒鵝o既味道
58. 巴路士，淨係識得一味去，冇諗過交俾身邊既隊友
59. 利物浦的巴路士同列斯的巴基.....兩個都係姓巴........（英文名呀大佬）
60. 伯明翰同埋保頓，兩隊波都係“Ｂ”字頭
61. 保方保方，保住後方
62. 保定保定，保住就定
63. 梅度梅度，梅開二度，跟住加多句“林伯特差Ｄ入多球，變埋梅度”
64. 近排加利仔狀態唔夠fit呀–第一佢跑得慢！第二佢唔夠快！！第三速度唔高！！！
65. 呢球波史高斯好有機會入波，但係無機會起腳
66. 希斯基，力的表現!
67. “O”雲仔
68. 呢球波“O”雲仔好巧妙咁編(騙)過對手﹗
69. “O”雲仔一心自己去，一定架啦......英倫三島的前鋒係唔會交波架......
70. 呢球波碧咸傳得好靚架，不過前面羅唔到咋嘛
71. 亨利：12碼都唔入，30碼又點會入呀
72. 柏金呢隻老馬就好似星期三晚夜馬隻駿先鋒咁，追極都追唔到呀！
73. 托度咁好波，D前鋒邊夠膽射佢呀
74. 哈素賓基個名咁長，個 Shoulder 冇返咁橫都印唔晒個名
75. 沙華治係中場殺手，唔係情場殺手
76. 睇下巴布爾幾大力呀，條頸幾粗呀
77. 佢既全名係冼拿馬‧邦高利，如果是旦叫冼拿馬或者邦高利就係唔岩既，你有無人叫歐陽做阿歐架？歐陽就歐陽，司徒就司徒架嘛，佢就係咁樣樣喇，冼拿馬邦高利冼拿馬‧邦高利，如果我今晚叫到你全名6次，我就請你食宵夜
78. Free.......dle (注︰要拉長尾音)
79. 呢場波可能係英倫三島兩個最佳左後衛既對決 --- (阿仙奴 vs列斯--艾殊利高爾 vs 夏迪)
80. 做唔成英雄，就做罪魁
81. 打波既野有時要睇「食送」食飯。
82. 單蹄馬
83. 球証巴巴先生
84. 唔會俾牌，英倫三島既球證唔會咁易俾牌.......真係比喎.....球證太過嚴
85. 藍色衫打得好過紅色衫
86. 今日藍色波襪踢得好過白色波襪
87. 利物浦對車仔：球場上一係藍衫，一係紅衫
88. xx 球員，今日生日啦.
89. 呢d波仲唔生日
90. 列斯領先2:1︰領先緊一球就梗係同你死守,守住個勝果紐卡素扳平2:2︰拿,呢個就係打死守既後果
91. 阿仙奴開波幾分鐘就入波，好打好多。（被追和後）我都話，太早入波未必好架......因為有大把時間比人追丫嘛
92. 無論o係邊個時刻邊個時辰，英超既每一隊波都會有表現既
93. 領隊谷隊谷得好“應”！
94. ESPN–“超級星期天”變“和和星期天”
95. 呢D老鬼，食鹽多過你食米
96. 入到禁區就係皇帝
97. 又快又怪，又帶個波出界
98. 大家都係巴西腳，所以知你想點去架啦
99. 奧尼爾開心到跳起，跳得高過NBA果個奧尼爾
100. 睇佐敦，有今生，冇來世
101. Lets go, rock and roll

再加送燈神updated新經典：

# 魯爾係一個好有觸覺既球員，當佢冇觸覺個時，真係冇曬觸覺；但當佢有觸覺個時，入波阻都阻唔住。
# It ain't over till it's over!
# 正如一個魔術師，玩到完晒喇！比人除晒衫喇！都能夠啊……喺頂帽度啊……抽隻……白兔出嚟架！你話係咪魔術師喇吓？...
# Captain Fabulous 神奇隊長謝拉特！
# 神奇！頂級！超卓！任你點樣去演譯啊......都係，妙絕，嘅......
# (高治打倒掛失敗) 哎呀! 唔倒掛鳩勾...金勾哩個高佬下!
# 我欣賞車路士後衞泰利，因佢頭槌好、制空力強、同埋跳得高。
# 車路士出番依個彼德……施治會好好多，畢竟古迪仙尼都只係比較靈活。嗱，你睇下依球手鎚呀？真係龍門生得矮啲都打唔到呀！施治呢，我相信佢打多車仔兩年既話……就會開始……甩頭髮架喇！你睇佢今年嘅頭髮都已經少過舊年架喇！
# AC米蘭呢隊波好多老人牌桂格燕麥片。
# 利物浦嘅球迷們，你們唔怕了！三比一嘅記錄呀，奇蹟出現嘞利物浦。你唔會呢自己一個人行路嘞利物浦！(2004-05歐聯分組賽利物浦主場對奧林比亞高斯)
# 足球係要將個波射入網。
# 射罰球，最緊要唔好射高同埋射斜。
# 唔駛問阿桂……即係唔駛問我啦！
# 炮竹一聲除舊歲，好波共你賀新春。
# 盃賽決賽：我希望呢場波有雙冠軍啦！
# Stevy G 謝拉特。
# 「柏智星」(韓國球員朴智星Park Ji-sung誤讀做)。
# 江忠德，依家下半場打了四十五分之一。
# (2007歐聯決賽 AC米蘭對利物浦) 呢場波利物浦有兩個機會可以贏波，第一係渺茫，第二係冇機會。
# (2007歐聯四強次回合利物浦對車路士)呢啲波球證呢可罰就唔罰，因為利物浦佔主場之利，人之常情啫。
# (2007歐聯四強次回合利物浦對車路士)麥包夾火腿
# 百步穿楊即係跑左一百步之後射入咁解。
# 呢班人擊鼓……唔係鳴怨呀嘛？(佢自己都笑埋...果度係有班人半場休息時間係度打鼓表演姐)
# 打波要有火，講波都要有火呀！
# 孫繼海喺曼城真係越踢越好，更加可以融入球隊打法…… (三分鐘後) 最近孫繼海狀態表現麻麻，有好幾次曼城由贏波變和波，同埋和波變輸波，都係因為佢同施文配合得唔好，有誤會……
# 依個就係澳洲無能教練，教得澳洲一定係無能教練！(2007年亞洲盃分組賽 泰國對澳洲 對澳洲教練Graham Arnold的評價)
# 依個就係唔識入波既攻擊球員喇！(2007年亞洲盃分組賽 泰國對澳洲 對澳洲十四號球員Brett Holman的評價)
# 澳洲隊個教練冇翻雲覆雨嘅能力。

神奇！頂級！超卓！

失業中年

近年英超受外資入侵，最受歡迎的外藉班主應該係泰國人他信。原因並非佢豪洗幾千萬英鎊買起垃圾球會曼城（比較車仔油王，只算九牛一毛），更加同動用四千萬鎊大肆擴軍無關，他信o既最大貢獻，就係請左待業中o既前英格蘭領隊艾歷臣，幫英足聰慳返每年四百萬鎊冤枉錢，英國佬點會唔多謝佢！

艾歷臣在任六年，帶領英格蘭兩度殺入世界盃八強，成績算得中規中舉。但英國佬除左討厭佢果套永恆不變o既442戰術，更討厭佢層出不o既花邊新聞，好色、蠱惑、死板、滑頭，就係老艾o既公眾形象。

蟄伏兩年，老艾獲重金禮聘重出江湖，大家都覺得他信做硬水魚。點知兩輪英超過後，英國球迷不但發覺曼城兩戰兩勝零失球位列榜首，更驚人o既係，艾歷臣兩場波轉左四套戰術，但竟然冇用過442！英國佬如夢初醒，原來六年來一直都畀人揸流攤！

撞o岩聽日（8月19日）曼城會迎戰宿敵曼聯，更撞正曼聯出閘脫腳，C朗、朗尼雙雙缺陣，如果曼城乘機收埋費sir皮，相信班英國佬先會記起當初為乜要重金禮聘艾歷臣來做英格蘭教頭......

開波大吉

睇波廿幾年，不但是工餘興趣，過程中更獲益良多。

正所謂世事洞明皆學問，研究球會的人事、理財、公關之道，實在甚有得著。

希望開個新BLOG，將一些關於足球的故事在此分享！