科技白痴

富咸臨完場前攻入追成二比二平手的一球，點知兵荒馬亂之際，米堡門將把已完全越過白界o既足球撥返出去，旁證竟然判入球無效，富咸因而全失三分。

富咸職球員當然唔服氣，但更經典o既例子，應該係兩季前熱刺作客曼聯，完場前文迪斯遠射中楣反射入白界超過一米，竟然都被判唔入！如果球證旁證唔係齊齊發雞盲，就一定係傳說中o既「曼聯法則」** 在作怪。

人地美式足球N年前就開始用即場視頻重播，幫助球證判定具爭議性判決，國際足協以「重播視頻會影響球賽流暢度」而否決。前幾年又有一間德國公司發明左一套判定越位球系統，又被否決。舊年Adidas提議用「晶片足球」幫助判定足球入白界問題，同樣被國際足協否決。

先別說NFL、NBA等不斷隨住科技進步而改進o既聯賽，就算保守到極o既英國溫布頓網球賽，今年都引入左鷹眼系統，減少司線爭拗。究竟國際足協班老鬼有高科技恐懼症丫？定係要留返o的「人為」o既元素畀球證去自己「演譯」﹙造波）呢？

** 笑話一則：盛傳英超球證在奧脫褔只能作出對曼聯有利的判決，原因為何就無從稽考。