萬年老二

英超頭場，保頓領先之下被老樸反炒三比一，成為第一支三連敗o既球隊，如果冇乜大意外，保頓肯定係今季降班大熱。

上屆強人領隊艾拿戴斯出走紐卡素，由副手李森美瓜代。李森美都算醒目，一於蕭規曹隨，保留大部份主力，踢法上照板煮碗，繼續踢簡單足球，甚至連大Sam哥套大褸加耳機都抄埋，應該冇死喇卦？奈何形似神不在，揸旗第一場就撞正個舊老闆，半場未到就硬食三蛋，即時打回原形。

做副手，只要夠經驗夠盡責就OK，但坐正做領隊，就更需要領導魅力。大Sam哥雖然其貌不揚橫肉滿面，但佢果種果斷堅毅，就並非老好人李森美所能模仿。

以保頓投資咁噏縮，如果唔係艾拿戴斯，一早就應該降班。李森美個位睇唻坐唔到季尾，佢都係拿林搵返個助教位撈下，於人於己都係好事。